ഷാർജയിലെ പങ്കിട്ട താമസസ്ഥലത്ത് ഉണ്ടായ തർക്കം പരിഹരിക്കാൻ ഇടപെട്ട അക്കോമഡേഷൻ സൂപ്പർവൈസർ തന്നെ ആക്രമണത്തിൽ പ്രതിയായി. സഹതാമസക്കാരനെ ഇരുമ്പുവസ്തു ഉപയോഗിച്ച് ആക്രമിച്ച് പരിക്കേൽപ്പിച്ച ഏഷ്യൻ സ്വദേശിയെ ഷാർജ മിസ്‌ഡിമീനർ കോടതി കുറ്റക്കാരനായി കണ്ടെത്തി. കേസിൽ പ്രതിക്ക് മൂന്ന് മാസം തടവിന് പകരം സമൂഹസേവനം നടത്താൻ കോടതി ഉത്തരവിട്ടു. സംഭവത്തിന് തുടക്കം പങ്കിട്ട താമസസ്ഥലത്തെ മുറിയിൽ നിന്നാണ്. പുറത്തുപോയി തിരിച്ചെത്തിയ യുവാവ് തന്റെ വസ്ത്രങ്ങൾ ചിതറിക്കിടക്കുന്നതായി ശ്രദ്ധിച്ചു. പോകുന്നതിന് മുമ്പ് വസ്ത്രങ്ങൾ ക്രമപ്പെടുത്തി വെച്ചിരുന്നതായിരുന്നു. തുടർന്ന് തന്റെ കിടക്കയിൽ ഒരു സഹതാമസക്കാരൻ ചായക്കേട്ടിൽ വെച്ചിരിക്കുന്നതായും കണ്ടെത്തി.

ഇതിനെ തുടർന്ന് യുവാവ് സംഭവത്തിന് ഉത്തരവാദിയായ സഹതാമസക്കാരനോട് വിശദീകരണം ആവശ്യപ്പെട്ടു. ചോദ്യം ചെയ്യൽ പിന്നീട് വാക്കുതർക്കത്തിലേക്ക് നീങ്ങി. ബഹളം കേട്ടെത്തിയ അക്കോമഡേഷൻ സൂപ്പർവൈസർ ഇരുവരെയും ശാന്തരാക്കാനും പ്രശ്നം പരിഹരിക്കാനും ശ്രമിച്ചു.
എന്നാൽ പിന്നീട് സൂപ്പർവൈസറും യുവാവും തമ്മിൽ വാക്കുതർക്കമുണ്ടാകുകയും സ്ഥിതിഗതികൾ നിയന്ത്രണാതീതമാകുകയും ചെയ്തു. പ്രകോപിതനായ സൂപ്പർവൈസർ ഇരുമ്പുവസ്തു ഉപയോഗിച്ച് യുവാവിനെ ആക്രമിക്കുകയായിരുന്നു. ആക്രമണത്തിൽ യുവാവിന് നിരവധി പരിക്കുകളും അസ്ഥി പൊട്ടലുകളും സംഭവിച്ചു. തുടർന്ന് ഇയാൾ അധികൃതർക്ക് പരാതി നൽകുകയും കേസ് നീതിന്യായ അധികാരികൾക്ക് കൈമാറുകയും ചെയ്തു.

കുറ്റം ചുമത്തപ്പെട്ടപ്പോൾ, തർക്കം പരിഹരിക്കാനാണ് ആദ്യം ഇടപെട്ടതെന്ന് പ്രതി സമ്മതിച്ചു. എന്നാൽ പിന്നീട് യുവാവുമായുണ്ടായ വാക്കുതർക്കം തന്നെ പ്രകോപിപ്പിച്ചതിനെ തുടർന്നാണ് ആക്രമിച്ചതെന്ന് ഇയാൾ മൊഴി നൽകി. കക്ഷികളുടെയും സാക്ഷികളുടെയും മൊഴികളും കേസിലെ രേഖകളും തെളിവുകളും പരിശോധിച്ച ശേഷമാണ് കോടതി പ്രതിയെ കുറ്റക്കാരനായി കണ്ടെത്തിയത്. മൂന്ന് മാസത്തെ തടവിന് പകരം സമൂഹസേവനം ചെയ്യണമെന്നാണ് കോടതി വിധിച്ചത്. ചെറിയൊരു താമസസ്ഥല തർക്കം ഒടുവിൽ അക്രമത്തിലും ക്രിമിനൽ കേസിലും എത്തുകയായിരുന്നു. പ്രശ്നം പരിഹരിക്കാൻ എത്തിയ സൂപ്പർവൈസർ തന്നെ പിന്നീട് ആക്രമണത്തിൽ പ്രതിയായതാണ് കേസിലെ ശ്രദ്ധേയമായ വശം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t