പുതിയ മോഡൽ ഫോണുകൾ വിപണിയിലെത്തുമ്പോൾ മുൻ തലമുറ മോഡലുകൾക്ക് വില കുറയുന്നതാണ് സാധാരണ കണ്ടുവരുന്നത്. എന്നാൽ ഇത്തവണ സ്ഥിതി വ്യത്യസ്തമാണ്. പുതിയ ഫോണുകൾക്കൊപ്പം വിപണിയിൽ നേരത്തെ എത്തിയ മോഡലുകൾക്കും വില വർധിപ്പിക്കുന്ന അസാധാരണ സാഹചര്യമാണ് ആഗോള സ്മാർട്ട്ഫോൺ വിപണി നേരിടുന്നത്. യുഎഇയിൽ ഒരു വർഷം മുൻപ് 3,399 ദിർഹത്തിന് ലഭിച്ചിരുന്ന ഐഫോൺ 17-ന്റെ വില ഇപ്പോൾ 3,799 ദിർഹമായി ഉയർന്നിട്ടുണ്ട്. ഫോണിൽ കാര്യമായ മാറ്റങ്ങളൊന്നുമില്ലാതെയാണ് 400 ദിർഹത്തിന്റെ വില വർധന. പുതിയ ഐഫോൺ 18 പ്രോ മോഡലുകൾ അവതരിപ്പിച്ചതിന് പിന്നാലെ അമേരിക്കയിൽ ഐഫോൺ 16, ഐഫോൺ 17, ഐഫോൺ എയർ, ഐഫോൺ 17e എന്നിവയ്ക്കും 100 ഡോളർ വീതം വില കൂട്ടിയിരുന്നു. യുഎഇയിൽ ഐഫോൺ 17, എയർ, 17e മോഡലുകൾക്ക് 400 ദിർഹം വീതമാണ് വർധന. മറ്റ് പ്രമുഖ ബ്രാൻഡുകളിലും സമാനമായ സാഹചര്യമാണുള്ളത്. പുതിയ ഗാലക്സി ഫോൾഡ് 8 അൾട്രയ്ക്ക് കഴിഞ്ഞ വർഷത്തെ മോഡലിനേക്കാൾ 400 ദിർഹം അധികമാണ്. ഗൂഗിൾ പിക്സൽ 11 പ്രോയുടെ വിലയും 100 ഡോളർ വർധിപ്പിച്ചിട്ടുണ്ട്. ഇതിനൊപ്പം അടിസ്ഥാന മോഡലിലെ റാം 16 ജിബിയിൽ നിന്ന് 12 ജിബിയായി കുറയ്ക്കുകയും ചെയ്തു. കൗണ്ടർപോയിന്റ് റിസർച്ചിന്റെ കണക്കുകൾ പ്രകാരം വിപണിയിലുള്ള സ്മാർട്ട്ഫോണുകളുടെ ശരാശരി വിലയിൽ 15 ശതമാനം വരെ വർധനയുണ്ടായിട്ടുണ്ട്. മിഡിൽ ഈസ്റ്റ് വിപണിയിൽ ഇത് 18 ശതമാനമാണ്. പുതിയതായി പുറത്തിറങ്ങുന്ന ഫോണുകളുടെ വിലയിൽ 25 ശതമാനം വരെ വർധന രേഖപ്പെടുത്തിയതായും റിപ്പോർട്ടുകൾ വ്യക്തമാക്കുന്നു.

വിലക്കയറ്റത്തിന് പ്രധാന കാരണം ഫോണുകളിൽ ഉപയോഗിക്കുന്ന റാം, ഫ്ലാഷ് മെമ്മറി ചിപ്പുകളുടെ വിലയിലുണ്ടായ കുതിച്ചുചാട്ടമാണ്. കഴിഞ്ഞ വർഷത്തെ അപേക്ഷിച്ച് മെമ്മറി ചിപ്പുകളുടെ വില 300 ശതമാനത്തിലധികം ഉയർന്നതായാണ് കണക്കുകൾ. നേരത്തെ പ്രീമിയം ഫോണുകളുടെ നിർമ്മാണച്ചെലവിന്റെ ഏകദേശം പത്തിലൊന്ന് മാത്രമായിരുന്ന മെമ്മറി ചെലവ് ഇപ്പോൾ മൂന്നിലൊന്നിനോട് അടുത്തെത്തിയിരിക്കുകയാണ്. എഐയുടെ വളർച്ചയും പ്രതിസന്ധി രൂക്ഷമാക്കുന്നുണ്ട്. സാധാരണ സ്മാർട്ട്ഫോൺ റാമിന് പകരം കൂടുതൽ ലാഭകരമായ എഐ ഡാറ്റാ സെന്ററുകൾക്കായി ഉപയോഗിക്കുന്ന ഹൈ ബാൻഡ്വിഡ്ത്ത് മെമ്മറി (HBM) ചിപ്പുകളുടെ ഉൽപ്പാദനത്തിലേക്ക് മെമ്മറി നിർമ്മാതാക്കൾ കൂടുതൽ ശ്രദ്ധ തിരിച്ചതാണ് സാധാരണ റാമിന്റെ ലഭ്യത കുറയാനുള്ള പ്രധാന കാരണങ്ങളിലൊന്ന്.

പ്രതിസന്ധി ഏറ്റവും കൂടുതൽ ബാധിക്കുന്നത് 100 ഡോളറിൽ താഴെയുള്ള ബജറ്റ് സ്മാർട്ട്ഫോൺ വിഭാഗത്തെയാണ്. ഈ വിഭാഗത്തിലെ ഫോണുകളുടെ വില 50 ശതമാനത്തിലധികം ഉയർന്നതോടെ വിലകുറഞ്ഞ സ്മാർട്ട്ഫോണുകൾ തേടുന്ന ഉപഭോക്താക്കൾക്ക് തിരിച്ചടിയാകുകയാണ്. മെമ്മറി ചിപ്പുകളുടെ ഉൽപ്പാദന മുൻഗണനകളിലെ ഈ മാറ്റം ഉടൻ അവസാനിക്കാനുള്ള സാധ്യത കുറവാണെന്നാണ് വിപണി വിലയിരുത്തൽ. ഇതോടെ കുറഞ്ഞ വിലയിൽ പുതിയ സ്മാർട്ട്ഫോണുകൾ ലഭിച്ചിരുന്ന കാലം കൂടുതൽ ബുദ്ധിമുട്ടേറിയതാകുമെന്ന സൂചനയാണ് വിപണി നൽകുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t