യുഎഇയിൽ ഔദ്യോഗിക ദുഃഖാചരണം പ്രഖ്യാപിക്കുമ്പോൾ ഏറ്റവും ശ്രദ്ധേയമായ മാറ്റം ദേശീയ പതാക പകുതി താഴ്ത്തിക്കെട്ടുന്നതാണ്. എന്നാൽ ദുഃഖാചരണം പ്രഖ്യാപിച്ചു എന്നതുകൊണ്ട് മാത്രം സർക്കാർ സ്ഥാപനങ്ങളും സ്കൂളുകളും സ്വകാര്യ സ്ഥാപനങ്ങളും അടച്ചിടണമെന്നില്ല. ഇത് പ്രധാനമായും മരിച്ച വ്യക്തിയോടുള്ള രാജ്യത്തിന്റെ ഔദ്യോഗിക ആദരസൂചകമായാണ് കണക്കാക്കുന്നത്. ദുഃഖാചരണ കാലയളവിൽ പതാക പകുതി താഴ്ത്തിയാണ് പ്രദർശിപ്പിക്കുക. പതാക ഉയർത്തിയിട്ടില്ലെങ്കിൽ ആദ്യം കൊടിമരത്തിന്റെ മുകളിലേക്ക് ഉയർത്തിയശേഷം മധ്യഭാഗത്തേക്ക് താഴ്ത്തും. ഇതിനകം പതാക ഉയർത്തിയിട്ടുണ്ടെങ്കിൽ ആദ്യം താഴേക്ക് എത്തിച്ച് പിന്നീട് പകുതി ഉയരത്തിലേക്ക് ഉയർത്തുന്നതാണ് ചട്ടം.

ദുഃഖാചരണവും അവധിയും രണ്ടാണ്. ദുഃഖാചരണത്തിന്റെ ദിവസങ്ങളുടെ എണ്ണം അനുസരിച്ച് അത്രയും ദിവസം ഓഫീസുകൾ അടച്ചിടുമെന്ന് കരുതരുത്. ജോലി നിർത്തിവയ്ക്കുകയോ അവധി പ്രഖ്യാപിക്കുകയോ ചെയ്യണമെങ്കിൽ ബന്ധപ്പെട്ട അധികാരികൾ പ്രത്യേകം അറിയിപ്പ് നൽകണം. ഉദാഹരണത്തിന്, 2022ൽ ശൈഖ് ഖലീഫ ബിൻ സായിദ് അൽ നഹ്യാന്റെ നിര്യാണത്തെ തുടർന്ന് 40 ദിവസത്തെ ഔദ്യോഗിക ദുഃഖാചരണത്തോടൊപ്പം മൂന്ന് ദിവസത്തെ ജോലി അവധിയാണ് പ്രഖ്യാപിച്ചത്. 2021ൽ ശൈഖ് ഹംദാൻ ബിൻ റാഷിദ് അൽ മക്തൂമിന്റെ നിര്യാണത്തിലും 10 ദിവസത്തെ ദുഃഖാചരണത്തോടൊപ്പം മൂന്ന് ദിവസത്തെ സർക്കാർ അവധി പ്രഖ്യാപിച്ചിരുന്നു.

അതേസമയം, 2026 ജൂലൈയിൽ ശൈഖ് ഹമദ് ബിൻ ഖലീഫ അൽഥാനിയുടെ നിര്യാണത്തെ തുടർന്ന് നാല് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചെങ്കിലും ജോലി നിർത്തിവയ്ക്കാനുള്ള ഉത്തരവ് ഉണ്ടായിരുന്നില്ല. ഇതോടെ ദുഃഖാചരണവും അവധിയും വ്യത്യസ്ത നടപടികളാണെന്ന് വ്യക്തമാകുന്നു.
പൊതുപരിപാടികൾക്കും വിനോദ പരിപാടികൾക്കും ദുഃഖാചരണ കാലയളവിൽ സ്വമേധയാ സമ്പൂർണ വിലക്ക് ബാധകമാകില്ല. ഏതെങ്കിലും പരിപാടി റദ്ദാക്കുകയോ മാറ്റിവയ്ക്കുകയോ ചെയ്യേണ്ടതുണ്ടെങ്കിൽ ബന്ധപ്പെട്ട അധികൃതർ പ്രത്യേകമായി അറിയിക്കും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t