വിവാഹവാഗ്ദാനം നൽകി ലൈംഗികമായി ചൂഷണം ചെയ്തെന്നും സാമ്പത്തികമായി കബളിപ്പിച്ചെന്നും ആരോപിച്ച് മലയാളി യുവതി ദുബായ് പൊലീസിനും കേരള ഡിജിപിക്കും പരാതി നൽകി. ആലപ്പുഴ സ്വദേശിയും യുഎഇയിലെ പ്രമുഖ പ്രവാസി സംഘടനയുടെ നാഷനൽ കമ്മിറ്റി സെക്രട്ടറിയുമായ ബിസിനസുകാരനെതിരെയാണ് പരാതി. തിരുവനന്തപുരം സ്വദേശിനിയായ യുവതി കഴിഞ്ഞ വർഷം ജൂലൈ മുതൽ സംഘടനയുടെ പ്രവർത്തനങ്ങളിൽ സജീവമായിരുന്നുവെന്നാണ് റിപ്പോർട്ട്. രണ്ട് കുട്ടികളുടെ അമ്മയായ താൻ കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്നതിനിടെയാണ് ആലപ്പുഴ സ്വദേശിയുമായി പരിചയത്തിലായതെന്ന് പരാതിയിൽ പറയുന്നു. ബാങ്ക് വായ്പകൾ തീർക്കാൻ സഹായിക്കാമെന്നും മക്കളുടെ ഭാവി സംരക്ഷിക്കാമെന്നും വിവാഹം കഴിച്ച് കൂടെ കൂട്ടാമെന്നും ഇയാൾ ഉറപ്പുനൽകിയതായി യുവതി ആരോപിക്കുന്നു. യുഎഇയിൽ നിയമപരമായി വിവാഹം കഴിക്കാമെന്ന് വിശ്വസിപ്പിച്ചതിന് പിന്നാലെ ദുബായിലെയും കായംകുളത്തെയും വീടുകളിൽ എത്തിച്ച് പലതവണ ലൈംഗികമായി ചൂഷണം ചെയ്തെന്നും പരാതിയിൽ ആരോപണമുണ്ട്. 2025 ഡിസംബറിൽ മകളുടെ വിവാഹം കഴിഞ്ഞശേഷം വിവാഹക്കാര്യം തീരുമാനിക്കാമെന്ന് പറഞ്ഞ് ഇയാൾ സമയം നീട്ടിക്കൊണ്ടുപോയെന്നും, മകളുടെ വിവാഹം കഴിഞ്ഞതോടെ വാഗ്ദാനങ്ങളിൽ നിന്ന് പിന്മാറിയെന്നും യുവതി പരാതിയിൽ പറയുന്നു.

തുടർന്ന് ദുബായ് ഖിസൈസിലെ ഇയാളുടെ സ്ഥാപനത്തിലെത്തി കാര്യം അന്വേഷിച്ചപ്പോൾ കയർത്തുസംസാരിക്കുകയും അപമാനിച്ച് പുറത്താക്കുകയും ഭീഷണിപ്പെടുത്തുകയും ചെയ്തതായും യുവതി ആരോപിച്ചു. സ്ഥാപനത്തിലെ മറ്റ് രണ്ട് വനിതാ ജീവനക്കാരുമായി ബന്ധപ്പെട്ടും വീസ തട്ടിപ്പിന്റെയും മാനസിക പീഡനത്തിന്റെയും പരാതികൾ പിന്നീട് അറിഞ്ഞതായും യുവതി പറയുന്നു. തനിക്കുണ്ടായ സംഭവത്തെക്കുറിച്ച് പ്രവാസി സംഘടനയിലെ മുതിർന്ന ഭാരവാഹികളോടും ബന്ധപ്പെട്ട വ്യക്തികളോടും പരാതി പറഞ്ഞെങ്കിലും പിന്തുണ ലഭിച്ചില്ലെന്നും, പിന്നീട് തനിക്കെതിരെ ലൈംഗികച്ചുവയുള്ള വ്യാജ പ്രചാരണങ്ങൾ നടത്തി അപകീർത്തിപ്പെടുത്താൻ ശ്രമിച്ചെന്നും പരാതിയിൽ ആരോപിക്കുന്നു.

ഓഗസ്റ്റ് അഞ്ചിന് ദുബായിൽ തിരിച്ചെത്തിയ ശേഷം ആലപ്പുഴ സ്വദേശിയെ ഫോണിൽ ബന്ധപ്പെടാൻ ശ്രമിച്ചെങ്കിലും ഫോൺ സ്വിച്ച്ഡ് ഓഫ് ആയിരുന്നുവെന്നും, ഇയാളെ ഒളിവിൽ പോകാൻ ചിലർ സഹായിക്കുന്നുണ്ടെന്നും യുവതി ആരോപിച്ചു. സംഭവത്തിൽ വിശദമായ അന്വേഷണം നടത്തി നീതി ഉറപ്പാക്കണമെന്നാണ് യുവതിയുടെ ആവശ്യം. താൻ ഉന്നയിച്ച ആരോപണങ്ങൾക്ക് തെളിവുകൾ കൈവശമുണ്ടെന്നും പരാതിക്കാരി വ്യക്തമാക്കിയതായി റിപ്പോർട്ട് പറയുന്നു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t