Dubai Municipality; ദുബായിലെ ജനവാസ മേഖലകളിൽ ജോലി ചെയ്യുന്ന ശുചീകരണ തൊഴിലാളികളുടെ ജോലിഭാരം കുറയ്ക്കുന്നതിനും നഗരശുചീകരണം കൂടുതൽ കാര്യക്ഷമമാക്കുന്നതിനുമായി ദുബായ് മുൻസിപ്പാലിറ്റി പരിസ്ഥിതി സൗഹൃദ ഇലക്ട്രിക് ബൈക്കുകൾ പുറത്തിറക്കി. കഠിനമായ വേനൽക്കാലത്ത് വെയിലത്ത് ജോലി ചെയ്യുന്ന ജീവനക്കാരുടെ ശാരീരിക അധ്വാനം ലഘൂകരിക്കുക എന്ന മാനുഷിക പരിഗണന കൂടി മുൻനിർത്തിയാണ് ഈ പുതിയ നീക്കം. മുൻസിപ്പാലിറ്റിയുടെ ഫീൽഡ് ക്ലീനിംഗ് വിഭാഗത്തിൽ പുതുതായി ഉൾപ്പെടുത്തിയ ഈ ബൈക്കുകൾ, ഉയർന്ന താപനിലയുള്ള സമയത്തും റെസിഡൻഷ്യൽ ഏരിയകളിലൂടെ എളുപ്പത്തിൽ സഞ്ചരിക്കാൻ സഹായിക്കുന്ന രീതിയിലാണ് രൂപകൽപ്പന ചെയ്തിരിക്കുന്നത്. നഗരസഭാ സേവനങ്ങളെ സ്മാർട്ടും സുസ്ഥിരവുമായ സംവിധാനങ്ങളിലേക്ക് മാറ്റുന്നതിന്റെ ഭാഗമായാണ് ഈ പദ്ധതി നടപ്പിലാക്കുന്നത്. മണിക്കൂറിൽ 45 കിലോമീറ്റർ വേഗതയുള്ള ഈ ബൈക്കുകൾ, ഒറ്റത്തവണ ചാർജ് ചെയ്താൽ 8 മുതൽ 10 മണിക്കൂർ വരെ തുടർച്ചയായി പ്രവർത്തിപ്പിക്കാം. ഇത് ജീവനക്കാർക്ക് ഒരു ഷിഫ്റ്റ് മുഴുവൻ തടസ്സമില്ലാതെ ജോലി ചെയ്യാൻ സൗകര്യമൊരുക്കുന്നു. ഓരോ ബൈക്കിലും 180 മുതൽ 240 ലിറ്റർ വരെ ശേഷിയുള്ള മാലിന്യ സംഭരണ പാത്രങ്ങളുണ്ട്. ഏകദേശം 90 കിലോഗ്രാം മാലിന്യം വരെ വഹിക്കാൻ ഈ ബൈക്കുകൾക്ക് സാധിക്കും. ഇത് ശേഖരിച്ച മാലിന്യങ്ങൾ ഇടയ്ക്കിടെ നീക്കം ചെയ്യാൻ പോകേണ്ടി വരുന്ന യാത്രകളുടെ എണ്ണം കുറയ്ക്കുന്നു. കടുത്ത ചൂടും ഈർപ്പവുമുള്ള കാലാവസ്ഥയിൽ ശുചീകരണ ജീവനക്കാർക്ക് സുരക്ഷിതവും സൗകര്യപ്രദവുമായ തൊഴിൽ അന്തരീക്ഷം ഒരുക്കാൻ ഈ ഇലക്ട്രിക് ബൈക്കുകൾ വലിയ സഹായകമാകുമെന്ന് ദുബായ് മുനിസിപ്പാലിറ്റി വ്യക്തമാക്കി. നഗരത്തിന്റെ പച്ചപ്പും ശുചിത്വവും നിലനിർത്തുന്നതിനൊപ്പം ജീവനക്കാരുടെ ക്ഷേമത്തിനും ഈ പദ്ധതി മുൻഗണന നൽകുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t