UAE Heavy Rainfall; യുഎഇയുടെ വിവിധ ഭാഗങ്ങളിൽ കനത്ത മഴയ്ക്ക് സാധ്യതയുണ്ടെന്ന കാലാവസ്ഥാ മുന്നറിയിപ്പിനെത്തുടർന്ന് രാജ്യം അതീവ ജാഗ്രതയിൽ. മുൻകാലങ്ങളിൽ ഉണ്ടായ മഴക്കെടുതികളിൽ നിന്ന് പാഠമുൾക്കൊണ്ട്, ഇത്തവണ കൂടുതൽ മുൻകരുതലുകളുമായാണ് താമസക്കാരും വ്യാപാരികളും മുന്നൊരുക്കങ്ങൾ നടത്തുന്നത്. കഴിഞ്ഞ വർഷങ്ങളിൽ ഫുജൈറയിലും കൽബയിലും ഉണ്ടായ വെള്ളപ്പൊക്കത്തിൽ നിരവധി വീടുകൾക്കും വാഹനങ്ങൾക്കും വ്യാപാര സ്ഥാപനങ്ങൾക്കും കനത്ത നാശനഷ്ടങ്ങൾ സംഭവിച്ചിരുന്നു. ഈ അനുഭവത്തിന്റെ പശ്ചാത്തലത്തിൽ, ഇത്തവണ അപകടസാധ്യതയുള്ള പ്രദേശങ്ങളിൽ നിന്നും വാഹനങ്ങൾ സുരക്ഷിതമായ ഉയർന്ന സ്ഥലങ്ങളിലേക്ക് മാറ്റി പാർക്ക് ചെയ്യാൻ ആളുകൾ ശ്രദ്ധിക്കുന്നുണ്ട്. മഴ ശക്തമാകുന്നതിന് മുൻപ് തന്നെ കുടിവെള്ളവും മറ്റ് അത്യാവശ്യ സാധനങ്ങളും മുൻകൂട്ടി വാങ്ങി സൂക്ഷിക്കാനും പലരും തയ്യാറെടുക്കുന്നു. കഴിഞ്ഞ മഴയിൽ കടകളിലേക്ക് വെള്ളം കയറി സാധനങ്ങൾ നശിച്ചതിന്റെ കൈപ്പേറിയ അനുഭവമുള്ള വ്യാപാരികൾ ഇത്തവണ നേരത്തെ തന്നെ മുൻകരുതൽ എടുക്കുന്നു. കടയിലെ സാധനങ്ങൾ ഉയർന്ന ഷെൽഫുകളിലേക്ക് മാറ്റാനും, അത്യാവശ്യ ഘട്ടങ്ങളിൽ മുൻകൂട്ടി കടകൾ അടച്ചിടാനും ഇവർ തീരുമാനിച്ചിട്ടുണ്ട്. ഫാം ഹൗസുകളിലെയും മറ്റും അറ്റകുറ്റപ്പണികൾ താൽക്കാലികമായി നിർത്തിവെച്ചതായും റിപ്പോർട്ടുകളുണ്ട്. പൊതുജനങ്ങൾ അതീവ ജാഗ്രത പാലിക്കണമെന്ന് യുഎഇ ആഭ്യന്തര മന്ത്രാലയം കർശന നിർദ്ദേശം നൽകി. അടിയന്തര സാഹചര്യങ്ങളിൽ വാഹനമോടിക്കുമ്പോൾ വേഗത കുറയ്ക്കണമെന്നും, വാദികൾക്കും വെള്ളക്കെട്ടുകൾ രൂപപ്പെടുന്ന പ്രദേശങ്ങൾക്കും സമീപത്തേക്ക് പോകരുതെന്നും മന്ത്രാലയം ഓർമ്മിപ്പിച്ചു. അടിയന്തര സാഹചര്യങ്ങളിൽ സഹായം എത്തിക്കാൻ കൈരളി കൾച്ചറൽ അസോസിയേഷന്റെ ഫുജൈറ-കൽബ യൂണിറ്റ് പോലുള്ള സന്നദ്ധ സംഘടനകളും സജ്ജമായി രംഗത്തുണ്ട്.
കഴിഞ്ഞ തവണത്തെ വെള്ളപ്പൊക്കത്തിൽ വാഹനങ്ങൾക്കും വീട്ടുസാധനങ്ങൾക്കും ഉണ്ടായ നഷ്ടങ്ങൾ ഇത്തവണ ഒഴിവാക്കാൻ സാധിക്കുമെന്ന പ്രതീക്ഷയിലാണ് യുഎഇ നിവാസികൾ. അധികൃതരുടെ നിർദ്ദേശങ്ങൾ കൃത്യമായി പാലിച്ച് മുൻകരുതലുകൾ സ്വീകരിക്കുന്നതിലൂടെ വലിയൊരു ദുരന്തത്തെ പ്രതിരോധിക്കാനാണ് ജനങ്ങൾ ശ്രമിക്കുന്നത്.  യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t