Air India emergency landing; വിമാനം തട്ടിക്കൊണ്ടുപോകാൻ (ഹൈജാക്ക്) നീക്കം നടക്കുന്നുവെന്ന അപായ സന്ദേശത്തെത്തുടർന്ന് ജർമ്മനിയിലെ ഫ്രാങ്ക്ഫർട്ടിൽ നിന്ന് ന്യൂഡൽഹിയിലേക്ക് പറന്ന എയർ ഇന്ത്യ വിമാനം രാജസ്ഥാനിലെ ജയ്പൂർ അന്താരാഷ്ട്ര വിമാനത്താവളത്തിൽ അടിയന്തിരമായി നിലത്തിറക്കി. ബുധനാഴ്ച രാവിലെ വ്യോമയാന സുരക്ഷാ ഏജൻസികളെ മുൾമുനയിൽ നിർത്തിയ സംഭവത്തിൽ, എയർ ഇന്ത്യയുടെ AI-2030 വിമാനമാണ് ജയ്പൂരിൽ സുരക്ഷിതമായി ലാൻഡ് ചെയ്തത്. തുടർന്ന് സുരക്ഷാ മുൻകരുതലുകളുടെ ഭാഗമായി വിമാനത്തെ ഉടൻ തന്നെ പ്രത്യേക ഐസൊലേഷൻ ബേയിലേക്ക് മാറ്റി. അഹമ്മദാബാദ് എയർ ട്രാഫിക് കൺട്രോളിന് (എടിസി) വിമാനത്തിൽ നിന്ന് അടിയന്തര സിഗ്നൽ ലഭിച്ചതോടെയാണ് അതീവ ജാഗ്രതാ നിർദ്ദേശം പുറപ്പെടുവിച്ചത്. വിമാനം തട്ടിക്കൊണ്ടുപോകാൻ ശ്രമം നടക്കുമ്പോൾ അന്താരാഷ്ട്രതലത്തിൽ പൈലറ്റുമാർ ട്രാൻസ്പോണ്ടർ വഴി നൽകുന്ന അപായ കോഡ് ഏതാനും സെക്കൻഡുകളിലേക്ക് പ്രവർത്തിച്ചതാണ് ഉന്നതതല സുരക്ഷാ സന്നാഹങ്ങൾക്ക് കാരണമായത്. തുടർന്ന് വിമാനം ജയ്പൂരിലേക്ക് വഴിതിരിച്ചുവിടാൻ നിർദ്ദേശം നൽകുകയായിരുന്നു. വിമാനം നിലത്തിറങ്ങിയ ഉടൻ യാത്രക്കാരെയും ജീവനക്കാരെയും അതീവ സുരക്ഷാ നിരീക്ഷണത്തിൽ പുറത്തിറക്കി. രാജസ്ഥാൻ ഭീകരവിരുദ്ധ സേനയും (എടിഎസ്) ലോക്കൽ പോലീസും എയർപോർട്ട് സുരക്ഷാ വിഭാഗവും പ്രദേശം വളഞ്ഞ് വിമാനത്തിൽ സമഗ്രമായ പരിശോധന നടത്തി. സ്ഥിതിഗതികൾ നേരിടുന്നതിനായി ന്യൂഡൽഹിയിൽ നാഷണൽ സെക്യൂരിറ്റി ഗാർഡിനെയും (എൻഎസ്ജി) സജ്ജമാക്കി നിർത്തിയിരുന്നു. യാത്രക്കാരുടെയും അവരുടെ ലഗേജുകളുടെയും സുരക്ഷാ പരിശോധനകൾ പൂർത്തിയായി വരികയാണ്. പൈലറ്റിന്റെ ഭാഗത്തുനിന്നുണ്ടായ അബദ്ധമാണോ, സാങ്കേതിക തകരാർ മൂലമാണോ അതോ മറ്റേതെങ്കിലും കാരണത്താലാണോ ട്രാൻസ്പോണ്ടർ വഴി ഹൈജാക്ക് സിഗ്നൽ പോയത് എന്നതിനെക്കുറിച്ച് സുരക്ഷാ ഏജൻസികൾ വിശദമായ അന്വേഷണം ആരംഭിച്ചിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t