യുഎഇ ഉൾപ്പെടെയുള്ള ഗൾഫ് രാജ്യങ്ങളിൽ ജോലി നേടാൻ ആഗ്രഹിക്കുന്നവരെ ലക്ഷ്യമിട്ട് വ്യാജ വിസ വാഗ്ദാനങ്ങളിലൂടെ പണം തട്ടുന്ന സംഘങ്ങൾക്കെതിരെ ജാഗ്രതാ നിർദേശവുമായി ഇന്ത്യൻ നയതന്ത്ര കാര്യാലയങ്ങൾ. ഇത്തരം തട്ടിപ്പുകളിൽ വീണ് ഉദ്യോഗാർത്ഥികൾക്ക് സാമ്പത്തിക നഷ്ടമുണ്ടാകുന്ന സാഹചര്യത്തിൽ അബുദാബിയിലെ ഇന്ത്യൻ എംബസിയും ദുബായിലെ ഇന്ത്യൻ കോൺസുലേറ്റുമാണ് മുന്നറിയിപ്പ് നൽകിയത്. സമൂഹമാധ്യമങ്ങളിലെ ആകർഷകമായ പരസ്യങ്ങൾ വിശ്വസിച്ച് പണം കൈമാറരുതെന്നും അധികൃതർ ആവശ്യപ്പെട്ടു. ഫേസ്ബുക്ക്, ഇൻസ്റ്റഗ്രാം, വാട്സ്ആപ്പ് തുടങ്ങിയ പ്ലാറ്റ്‌ഫോമുകളിലൂടെയാണ് പല വ്യാജ ഏജൻസികളും ഉദ്യോഗാർത്ഥികളെ സമീപിക്കുന്നത്. ഉയർന്ന ശമ്പളം, സൗജന്യ താമസസൗകര്യം, വേഗത്തിൽ ലഭിക്കുന്ന തൊഴിൽ വീസ തുടങ്ങിയ വാഗ്ദാനങ്ങൾ നൽകി വിശ്വാസം നേടിയശേഷം അപേക്ഷാ ഫീസ്, പ്രോസസിങ് ചാർജ് തുടങ്ങിയ പേരുകളിൽ പണം ഈടാക്കുകയാണ് തട്ടിപ്പുകാരുടെ രീതി. പണം കൈപ്പറ്റിയശേഷം ബന്ധപ്പെടാനുള്ള മാർഗങ്ങൾ ഒഴിവാക്കി അപ്രത്യക്ഷമാകുന്ന സംഭവങ്ങളും റിപ്പോർട്ട് ചെയ്യപ്പെടുന്നു.
വീസ ഉറപ്പെന്ന വാഗ്ദാനത്തിൽ വീഴരുത്
തട്ടിപ്പുകളിൽനിന്ന് രക്ഷപ്പെടാൻ ചില കാര്യങ്ങൾ പ്രത്യേകം ശ്രദ്ധിക്കണമെന്ന് ഇന്ത്യൻ അധികൃതർ നിർദേശിക്കുന്നു. വീസ ശരിയാക്കിത്തരാമെന്ന് പറഞ്ഞ് ആവശ്യപ്പെടുന്നവർക്ക് മുൻകൂറായി പണം നൽകുന്നതിന് മുമ്പ് ഏജൻസിയുടെ വിശ്വാസ്യതയും നിയമപരമായ അംഗീകാരവും ഉറപ്പാക്കണം. പണം നൽകിയാൽ വീസ ഉറപ്പാണെന്ന വാഗ്ദാനങ്ങൾ സംശയത്തോടെ കാണുകയും വേണം. വീസ അനുവദിക്കാനുള്ള അധികാരം ബന്ധപ്പെട്ട രാജ്യത്തെ സർക്കാരിനാണ്. സ്വകാര്യ ഏജൻസികൾക്ക് വീസ ഉറപ്പുനൽകാനാവില്ല. അതിനാൽ വിദേശത്ത് പ്രവർത്തിക്കുന്ന പരിചയമില്ലാത്ത സ്ഥാപനങ്ങളുടെ പരസ്യങ്ങൾ മാത്രം ആശ്രയിച്ച് തീരുമാനമെടുക്കരുത്.
ഔദ്യോഗിക വിവരങ്ങൾ മാത്രം വിശ്വസിക്കുക
തൊഴിൽ അവസരങ്ങൾ, വീസ നടപടികൾ, കുടിയേറ്റ നിയമങ്ങൾ എന്നിവ സംബന്ധിച്ച വിവരങ്ങൾ അതത് രാജ്യങ്ങളുടെ ഔദ്യോഗിക സർക്കാർ വെബ്സൈറ്റുകളിലൂടെയോ എംബസി, കോൺസുലേറ്റ് പോർട്ടലുകളിലൂടെയോ പരിശോധിക്കണം. സംശയകരമായ വാഗ്ദാനങ്ങൾ ലഭിച്ചാൽ ബന്ധപ്പെട്ട ഇന്ത്യൻ നയതന്ത്ര കാര്യാലയങ്ങളുമായി ബന്ധപ്പെടുന്നതും ഉചിതമാണ്. ഗൾഫ് രാജ്യങ്ങളിൽ ജോലി തേടുന്നവരും നാട്ടിലുള്ള ഉദ്യോഗാർത്ഥികളും ഇത്തരം തട്ടിപ്പുകൾക്കെതിരെ ജാഗ്രത പാലിക്കണമെന്നും സ്ഥിരീകരിക്കാത്ത പരസ്യങ്ങൾ കണ്ട് പണം നഷ്ടപ്പെടുത്തരുതെന്നും അധികൃതർ ഓർമിപ്പിച്ചു.. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
