കുട്ടികളുടെ സുരക്ഷ ഉറപ്പാക്കുന്നതിൽ വീഴ്ച വരുത്തിയതിനെത്തുടർന്ന് ഒരു കുട്ടി മുങ്ങിമരിച്ച സംഭവത്തിൽ പ്രതികൾക്ക് വിധിച്ച ശിക്ഷാനടപടികൾ ശരിവെച്ച് യുഎഇ ഫെഡറൽ സുപ്രീം കോടതി. ഖുർആൻ പഠനകേന്ദ്രത്തിൽനിന്ന് നീന്തൽ പരിശീലനത്തിനായി കുട്ടികളെ കൊണ്ടുവന്നപ്പോഴുണ്ടായ അപകടത്തിൽ മേൽനോട്ടക്കാരനും സ്വിമ്മിംഗ് പൂളിന്റെ ചുമതലയുണ്ടായിരുന്ന വ്യക്തിക്കും കീഴ്‌ക്കോടതികൾ വിധിച്ച ശിക്ഷയും പിഴയും ചോദ്യം ചെയ്തുള്ള അപ്പീലാണ് കോടതി തള്ളിയത്. ഇരുവർക്കും 1,000 ദിർഹം വീതം പിഴ ചുമത്താനും മരിച്ച കുട്ടിയുടെ കുടുംബത്തിന് സംയുക്തമായി രക്തപ്പണം നൽകാനുമുള്ള ഉത്തരവും കോടതി ശരിവെച്ചു. യുഎഇയിലെ ഒരു ഖുർആൻ പഠനകേന്ദ്രത്തിൽനിന്നുള്ള കുട്ടികളുടെ സംഘത്തെ സ്പോർട്സ് ക്ലബ്ബിലെ സ്വിമ്മിംഗ് പൂളിൽ നീന്തൽ പരിശീലനത്തിനായി എത്തിച്ചപ്പോഴായിരുന്നു ദുരന്തം. കുട്ടികളെ പൂളിലെത്തിച്ച മേൽനോട്ടക്കാരൻ, നീന്തൽ പരിശീലകൻ ചുമതലയേൽക്കുന്നതിനു മുമ്പുതന്നെ അവിടെനിന്ന് മടങ്ങി. ഈ സമയത്ത് കുട്ടികളെ നേരിട്ട് നിരീക്ഷിക്കാൻ ആരുമുണ്ടായിരുന്നില്ല. ഇതിനിടെ സംഘത്തിലുണ്ടായിരുന്ന ഒരു കുട്ടി പൂളിലിറങ്ങി. ആദ്യമായാണ് കുട്ടി സ്വിമ്മിംഗ് പൂളിൽ ഇറങ്ങിയത്. നീന്തൽ അറിയാതിരുന്നതിനെത്തുടർന്ന് കുട്ടി വെള്ളത്തിൽ മുങ്ങിമരിക്കുകയായിരുന്നു.

കുട്ടികളുടെ സുരക്ഷ ഉറപ്പാക്കുന്നതിൽ മേൽനോട്ടക്കാരനും പൂളിന്റെ ചുമതലയുള്ള വ്യക്തിയും ഗുരുതരമായ അശ്രദ്ധ കാട്ടിയെന്നാണ് പബ്ലിക് പ്രോസിക്യൂഷന്റെ കണ്ടെത്തൽ. കുട്ടികളെ പരിശീലന കേന്ദ്രത്തിൽ എത്തിച്ചതുകൊണ്ടുമാത്രം ഉത്തരവാദിത്തം അവസാനിക്കുന്നില്ലെന്ന് കോടതി നിരീക്ഷിച്ചു. സുരക്ഷിതമായി പരിശീലനം ആരംഭിക്കുന്നതുവരെ കുട്ടികളുടെ മേൽനോട്ടം ഉറപ്പാക്കേണ്ടത് ബന്ധപ്പെട്ടവരുടെ ചുമതലയാണെന്നും കേസിലെ വിധി വ്യക്തമാക്കുന്നു. പ്രതികൾ സമർപ്പിച്ച അപ്പീൽ തള്ളിയതോടെ പ്രാഥമിക കോടതിയും അപ്പീൽ കോടതിയും പുറപ്പെടുവിച്ച ശിക്ഷാനടപടികൾ അന്തിമമായി നിലനിൽക്കും. കുട്ടികളുടെ സുരക്ഷയിൽ വീഴ്ച വരുത്തുന്നവർക്കുള്ള ഉത്തരവാദിത്തം എത്രത്തോളം ഗൗരവത്തോടെയാണ് നിയമം കാണുന്നതെന്ന് വ്യക്തമാക്കുന്നതാണ് സുപ്രീം കോടതിയുടെ ഈ തീരുമാനം.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t