യുഎഇയും ഇന്ത്യയും തമ്മിലുള്ള വിമാന സർവീസുകൾ വിമാനക്കമ്പനികൾ കൂട്ടത്തോടെ വെട്ടിക്കുറയ്ക്കുന്നു. ഇന്ധനവിലയിലുണ്ടായ അമിത വർധനവും മിഡിൽ ഈസ്റ്റിലെ വ്യോമപാത നിയന്ത്രണങ്ങളുമാണ് എയർ ഇന്ത്യ, ഇൻഡിഗോ തുടങ്ങിയ പ്രമുഖ കമ്പനികളെ ഈ തീരുമാനത്തിലേക്ക് നയിച്ചത്. വരാനിരിക്കുന്ന ജൂൺ മുതൽ ഓഗസ്റ്റ് വരെയുള്ള മാസങ്ങളിലാണ് സർവീസുകളിൽ ഈ വലിയ കുറവ് അനുഭവപ്പെടുക.

ബലിപെരുന്നാൾ അവധിയും സ്കൂളുകളിലെ വേനലവധിയും പ്രമാണിച്ച് പ്രവാസികൾ നാട്ടിലേക്ക് വരാൻ കാത്തിരിക്കുന്ന സമയത്താണ് ഈ പ്രതിസന്ധി. വിമാനങ്ങളുടെ എണ്ണം കുറഞ്ഞതോടെ ലഭ്യമായ സീറ്റുകൾക്ക് വൻ ഡിമാൻഡ് അനുഭവപ്പെടുകയും ടിക്കറ്റ് നിരക്കുകൾ 45 ശതമാനത്തോളം വർധിക്കുകയും ചെയ്തു. അമിതമായ ഈ യാത്രാച്ചെലവ് താങ്ങാൻ കഴിയാത്തതിനാൽ ഭൂരിഭാഗം സാധാരണക്കാരായ പ്രവാസികളും നാട്ടിലേക്കുള്ള യാത്രകൾ തൽക്കാലത്തേക്ക് മാറ്റിവെക്കുകയോ റദ്ദാക്കുകയോ ചെയ്യുകയാണ്. പലരും ഈ അവധിക്കാലം യുഎഇയിൽ തന്നെ ചെലവഴിക്കാൻ നിർബന്ധിതരായിരിക്കുന്നു.

ഈ സാഹചര്യത്തിൽ ഫ്ലൈറ്റുകൾ റദ്ദാക്കപ്പെടുന്ന യാത്രക്കാർക്കായി വിമാനക്കമ്പനികൾ ചില ആശ്വാസനടപടികൾ ഒരുക്കിയിട്ടുണ്ട്. ടിക്കറ്റ് റദ്ദാക്കേണ്ടി വരുന്നവർക്ക് അധിക തുക ഈടാക്കാതെ യാത്രാ തീയതികളിൽ മാറ്റം വരുത്താൻ സാധിക്കും. കൂടാതെ ടിക്കറ്റ് തുക പൂർണ്ണമായി റീഫണ്ട് ചെയ്യാനും കമ്പനികൾ തയ്യാറാണ്. റീഫണ്ടുമായി ബന്ധപ്പെട്ടോ മറ്റ് സേവനങ്ങളുമായി ബന്ധപ്പെട്ടോ വിമാനക്കമ്പനികളിൽ നിന്നോ ട്രാവൽ ഏജൻസികളിൽ നിന്നോ എന്തെങ്കിലും ബുദ്ധിമുട്ടുകൾ നേരിട്ടാൽ ദുബായ് സിവിൽ ഏവിയേഷൻ അതോറിറ്റിയുടെ വെബ്‌സൈറ്റിലുള്ള പുതിയ ഡിജിറ്റൽ തർക്കപരിഹാര പ്ലാറ്റ്‌ഫോം വഴി യാത്രക്കാർക്ക് നേരിട്ട് പരാതി നൽകാവുന്നതാണ്. ജൂൺ മാസത്തിൽ വിമാന സമയപ്പട്ടികകളിൽ ഇനിയും മാറ്റങ്ങൾ വരാൻ സാധ്യതയുള്ളതിനാൽ എയർപോർട്ടിലേക്ക് തിരിക്കുന്നതിന് മുൻപ് ഫ്ലൈറ്റ് സ്റ്റാറ്റസ് ഉറപ്പുവരുത്തേണ്ടതാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t