വിട്ടുമാറാത്തതും ഗുരുതരവുമായ രോഗങ്ങൾക്കുള്ള 168 പ്രധാന മരുന്നുകളുടെ വില ഗണ്യമായി കുറച്ച് യുഎഇ. nഎമിറേറ്റ്സ് ഡ്രഗ് എസ്റ്റാബ്ലിഷ്‌മെന്റ് പുറത്തിറക്കിയ പുതിയ തീരുമാനപ്രകാരം ചില മരുന്നുകൾക്ക് 5 ശതമാനത്തിൽ നിന്ന് 60 ശതമാനം വരെ വിലക്കുറവാണ് ലഭിക്കുക. പുതുക്കിയ നിരക്കുകൾ മെയ് 30 മുതൽ രാജ്യത്തുടനീളം പ്രാബല്യത്തിൽ വരും. ഹൃദയസംബന്ധമായ അസുഖങ്ങൾ, പ്രമേഹം, രക്തസമ്മർദ്ദം, അർബുദം, കൊളസ്ട്രോൾ, പക്ഷാഘാതം, ആസ്ത്മ, നേത്രരോഗങ്ങൾ, ദഹനസംബന്ധമായ അസുഖങ്ങൾ, മാനസിക-നാഡീവ്യൂഹ രോഗങ്ങൾ തുടങ്ങിയവയ്ക്കുള്ള മരുന്നുകളാണ് വിലക്കുറവിന്റെ പരിധിയിൽ ഉൾപ്പെടുത്തിയിരിക്കുന്നത്. ഉയർന്ന വിലയുള്ള ബയോളജിക്കൽ, ജീവൻരക്ഷാ മരുന്നുകൾക്കാണ് ഏറ്റവും വലിയ ഇളവുകൾ അനുവദിച്ചിരിക്കുന്നത്.

കൊളസ്ട്രോൾ കുറയ്ക്കാൻ ഉപയോഗിക്കുന്ന ‘സോകോർ 40 mg’ മരുന്നിനാണ് ഏറ്റവും കൂടുതൽ വിലക്കുറവ് ലഭിച്ചത്. 166.50 ദിർഹത്തിൽ നിന്ന് ഇത് 67.50 ദിർഹമായി കുറഞ്ഞു. ഗ്ലോക്കോമ രോഗികൾക്കുള്ള ‘സലാറ്റൻ’ ഐ ഡ്രോപ്പിന്റെ വിലയും 89 ദിർഹത്തിൽ നിന്ന് 43 ദിർഹമായി കുറഞ്ഞു. അർബുദ ചികിത്സയ്ക്കുള്ള വിലകൂടിയ മരുന്നുകളിലും വൻ ഇളവുകൾ പ്രഖ്യാപിച്ചു. ശ്വാസകോശ അർബുദ ചികിത്സയ്ക്കുള്ള ‘ആലുൻബ്രിഗ്’ മരുന്നിന്റെ വിവിധ ഡോസുകളുടെ വില ആയിരക്കണക്കിന് ദിർഹം വരെ കുറച്ചു. സ്തന-വൻകുടൽ അർബുദ ചികിത്സയ്ക്കുള്ള ‘സെലോഡ’ മരുന്നിനും വലിയ വിലക്കുറവുണ്ട്.

പ്രമേഹ മരുന്നുകളായ ‘അമറിൽ’, രക്തസമ്മർദ്ദ ചികിത്സയ്ക്കുള്ള ‘റെനിടെക്’, ‘അപ്രോവൽ’ തുടങ്ങിയവയുടെ വിലയും കുറച്ചു. കൂടാതെ രക്തം കട്ടപിടിക്കുന്നത് തടയുന്ന ‘പ്രാഡക്സ’, ഗുരുതര ആസ്ത്മ ചികിത്സയ്ക്കുള്ള ‘ന്യൂകാല’ തുടങ്ങിയ മരുന്നുകൾക്കും ആശ്വാസകരമായ വിലക്കുറവാണ് പ്രഖ്യാപിച്ചിരിക്കുന്നത്. രാജ്യത്തെ വിവിധ ഫാർമസികളിൽ പുതുക്കിയ വില ഇതിനകം പ്രതിഫലിക്കാൻ തുടങ്ങിയതായി റിപ്പോർട്ടുകളുണ്ട്. സാധാരണക്കാർക്ക് കൂടുതൽ കുറഞ്ഞ ചെലവിൽ ആരോഗ്യപരിപാലനം ഉറപ്പാക്കുക എന്ന ലക്ഷ്യത്തോടെയാണ് നടപടി സ്വീകരിച്ചതെന്ന് അധികൃതർ അറിയിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t