ദുബായ്: യുഎഇയിൽ ഡ്രൈവർമാർക്കുണ്ടാകുന്ന ശാരീരിക ക്ഷീണവും ഉറക്കവും റോഡപകടങ്ങൾക്ക് പ്രധാന കാരണമാകുന്നതായി ആഭ്യന്തര മന്ത്രാലയത്തിന്റെ ഏറ്റവും പുതിയ സ്ഥിതിവിവരക്കണക്കുകൾ വ്യക്തമാക്കുന്നു. 2025-ൽ മാത്രം ഇത്തരത്തിലുള്ള 20 അപകടങ്ങളാണ് രാജ്യത്ത് റിപ്പോർട്ട് ചെയ്തത്. കഴിഞ്ഞ നാല് വർഷത്തെ (2022–2025) മൊത്തം കണക്കുകൾ പരിശോധിക്കുമ്പോൾ ഉറക്കം മൂലം ആകെ 113 അപകടങ്ങൾ സംഭവിച്ചതായി കാണാം. ഇതിൽ ഏറ്റവും കൂടുതൽ അപകടങ്ങൾ നടന്നത് 2022-ലാണ്. ആ വർഷം റിപ്പോർട്ട് ചെയ്ത 37 അപകടങ്ങളിൽ 28 എണ്ണവും അബുദാബിയിലായിരുന്നു. ഷാർജയിൽ നാലും ദുബായിൽ രണ്ടും അപകടങ്ങൾ അന്ന് രേഖപ്പെടുത്തി.

തുടർന്നുള്ള വർഷങ്ങളിൽ അപകടങ്ങളുടെ എണ്ണത്തിൽ നേരിയ കുറവുണ്ടായിട്ടുണ്ട്. 2023-ൽ ആകെ 29 അപകടങ്ങൾ റിപ്പോർട്ട് ചെയ്തപ്പോൾ അതിൽ 25 എണ്ണവും അബുദാബിയിലാണ് നടന്നത്. 2024-ലെ 27 അപകടങ്ങളിൽ അബുദാബിയിൽ 23-ഉം ദുബായിലും റാസൽഖൈമയിലും രണ്ട് വീതവും അപകടങ്ങൾ രേഖപ്പെടുത്തി. 2025-ൽ അപകടങ്ങളുടെ എണ്ണം 20 ആയി ചുരുങ്ങിയെങ്കിലും ഡ്രൈവർമാരുടെ അശ്രദ്ധ റോഡുകളിൽ ഇപ്പോഴും വലിയ ഭീഷണിയായി തുടരുന്നുണ്ടെന്ന് അധികൃതർ ചൂണ്ടിക്കാട്ടുന്നു.

ക്ഷീണിച്ച അവസ്ഥയിൽ വാഹനമോടിക്കുന്നത് ചുവപ്പ് സിഗ്നൽ മുറിച്ചു കടക്കുന്നതിനും പെട്ടെന്ന് വരി മാറി വാഹനം ഓടിക്കുന്നതിനും കാരണമാകുന്നുണ്ട്. ഇത്തരം ഗുരുതരമായ ട്രാഫിക് നിയമലംഘനങ്ങൾ ഒഴിവാക്കാൻ ട്രാഫിക് പട്രോളിംഗ് വിഭാഗം രാജ്യവ്യാപകമായി ബോധവൽക്കരണ കാമ്പെയ്‌നുകൾ നടത്തിവരികയാണ്. വാഹനമോടിക്കുന്നവർ യാത്രയ്ക്ക് മുൻപ് മതിയായ വിശ്രമം എടുക്കുന്നുണ്ടെന്ന് ഉറപ്പാക്കണമെന്ന് ആഭ്യന്തര മന്ത്രാലയം കർശന നിർദ്ദേശം നൽകി. ഡ്രൈവിംഗിനിടെ എപ്പോഴെങ്കിലും ഉറക്കമോ ക്ഷീണമോ അനുഭവപ്പെട്ടാൽ ഒട്ടും വൈകാതെ സുരക്ഷിതമായ ഒരിടത്ത് വാഹനം നിർത്തി വിശ്രമിക്കണം. ഓരോ ഡ്രൈവറും പുലർത്തുന്ന ജാഗ്രതയിലൂടെ മാത്രമേ റോഡ് സുരക്ഷ വർദ്ധിപ്പിക്കാനും ജീവനപായങ്ങൾ ഒഴിവാക്കാനും സാധിക്കൂ എന്ന് അധികൃതർ അഭ്യർത്ഥിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t