യുഎഇയിൽ ശക്തമായ കാറ്റും മഴയും ഈ മാസം 27 വരെ തുടരാൻ സാധ്യതയുള്ള സാഹചര്യത്തിൽ സുരക്ഷാ മാർഗനിർദേശങ്ങൾ പുറപ്പെടുവിച്ച് നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് അതോറിറ്റി (NCEMA). വാഹനമോടിക്കുന്നവരും കാൽനടയാത്രക്കാരും പരമാവധി ജാഗ്രത പാലിക്കണമെന്ന് അധികൃതർ നിർദേശിച്ചു. ആലിപ്പഴം വീഴാൻ സാധ്യതയുള്ളതിനാൽ വാഹനങ്ങൾ ഷെഡുകളിലോ സുരക്ഷിതമായ പാർക്കിങ് ഏരിയകളിലോ പാർക്ക് ചെയ്യണമെന്ന് അധികൃതർ വ്യക്തമാക്കി. റോഡരികിൽ മരങ്ങൾക്കു താഴെ വാഹനങ്ങൾ പാർക്ക് ചെയ്യുന്നത് ഒഴിവാക്കണമെന്നും മുന്നറിയിപ്പുണ്ട്. കനത്ത മഴയും മൂടൽമഞ്ഞും കാരണം കാഴ്ചപരിധി കുറയാൻ സാധ്യതയുള്ളതിനാൽ അത്യാവശ്യമല്ലാത്ത യാത്രകൾ ഒഴിവാക്കണമെന്നും നിർദേശം നൽകി.

വാദികളിലേക്കും മലയോര മേഖലകളിലേക്കും പോകുന്നത് കർശനമായി നിരോധിച്ചിരിക്കുകയാണ്. ആലിപ്പഴം വീഴുന്ന സമയത്ത് പുറത്തിറങ്ങുന്നത് അപകടകരമായതിനാൽ ഗ്ലാസ് ജനാലകളിലും വാതിലുകളിലും നിന്ന് അകലം പാലിക്കണമെന്നും അധികൃതർ അറിയിച്ചു. ഇടിമിന്നലുള്ള സമയത്ത് പുറത്തുള്ള വൈദ്യുത ഉപകരണങ്ങൾ കൈകാര്യം ചെയ്യരുതെന്നും നിർദേശം നൽകി. കനത്ത മഴയെ തുടർന്ന് ഗതാഗതം മന്ദഗതിയിലാകാൻ സാധ്യതയുള്ളതിനാൽ വിമാനത്താവളത്തിലേക്കുള്ള യാത്രക്കാർ നേരത്തെ പുറപ്പെടണമെന്നും വിമാനക്കമ്പനികൾ അറിയിച്ചു. വിമാന സർവീസുകൾക്കായി കുറഞ്ഞത് നാല് മണിക്കൂർ മുമ്പെങ്കിലും വിമാനത്താവളത്തിൽ എത്തണമെന്നും നിർദേശിച്ചിട്ടുണ്ട്. റോഡരികിലുള്ള ഇലക്ട്രിക് പോസ്റ്റുകളിലോ പുറത്തേക്ക് തള്ളിനിൽക്കുന്ന വൈദ്യുതി വയറുകളിലോ തൊടരുതെന്നും മുന്നറിയിപ്പുണ്ട്.

സുരക്ഷാ മുൻകരുതലുകളുടെ ഭാഗമായി അധികൃതർ താഴെപ്പറയുന്ന നിർദേശങ്ങളും പുറപ്പെടുവിച്ചു:

-വെള്ളക്കെട്ടുള്ള സ്ഥലങ്ങളിലെ ഇലക്ട്രിക് ബോക്സുകളിൽ നിന്ന് അകലം പാലിക്കുക.
-വീടിന് പുറത്തുള്ള ഇലക്ട്രിക് കണക്ഷനുകൾ സുരക്ഷിതമാണെന്ന് ഉറപ്പുവരുത്തുക.
-മഴവെള്ളം ഒഴുകിപ്പോകാനുള്ള ഡ്രെയിനേജ് സംവിധാനങ്ങൾ വൃത്തിയാക്കി സൂക്ഷിക്കുക.
-മഴയുള്ള സമയത്ത് മരങ്ങൾക്കോ ഇലക്ട്രിക് പോസ്റ്റുകൾക്കോ താഴെ നിൽക്കരുത്.
-പരസ്യബോർഡുകൾക്ക് സമീപം നിൽക്കുന്നതും ഒഴിവാക്കണം.
-വെള്ളക്കെട്ടുകളോ മരങ്ങൾ വീണതോ ശ്രദ്ധയിൽപ്പെട്ടാൽ അതത് എമിറേറ്റിലെ നഗരസഭയെ അറിയിക്കുക.
-വെള്ളക്കെട്ടുള്ള സ്ഥലങ്ങളിൽ കുട്ടികളും മുതിർന്നവരും കളിക്കുകയോ കുളിക്കുകയോ ചെയ്യരുത്.

ശക്തമായ മഴയും കാറ്റും തുടരുന്ന സാഹചര്യത്തിൽ ഔദ്യോഗിക മുന്നറിയിപ്പുകൾ ശ്രദ്ധിച്ച് പൊതുജനങ്ങൾ സുരക്ഷാ നിർദേശങ്ങൾ പാലിക്കണമെന്നും അധികൃതർ ആവർത്തിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

വീസ കാലാവധി കഴിഞ്ഞ പ്രവാസികൾക്ക് ആശ്വാസം; പുതിയ എൻട്രി പെർമിറ്റ് ഇല്ലാതെ യുഎഇയിലേക്ക് മടങ്ങാം

വിദേശത്തിരിക്കെ റസിഡൻസ് വീസ കാലാവധി കഴിഞ്ഞ യുഎഇ പ്രവാസികൾക്ക് പ്രത്യേക അനുമതിയോടെ രാജ്യത്തേക്ക് മടങ്ങാനുള്ള അവസരം ഒരുക്കി ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി). പുതിയ എൻട്രി പെർമിറ്റ് ഇല്ലാതെയും ഇവർക്ക് യുഎഇയിൽ പ്രവേശിക്കാമെന്നാണ് അധികൃതർ അറിയിച്ചത്. 2026 ഫെബ്രുവരി 28നോ അതിനു ശേഷമോ വിദേശത്തിരിക്കെ വീസ കാലാവധി കഴിഞ്ഞവർക്കാണ് ഈ സൗകര്യം ബാധകമാകുക. പശ്ചിമേഷ്യയിലെ സംഘർഷാവസ്ഥയെ തുടർന്ന് പല രാജ്യങ്ങളിലും വിമാന സർവീസുകൾ നിർത്തിവച്ചതും വ്യോമപാതകൾ അടച്ചതുമാണ് പലർക്കും സമയത്ത് യുഎഇയിലേക്ക് മടങ്ങാൻ തടസ്സമായത്. ഈ സാഹചര്യത്തിൽ പ്രവാസികൾക്ക് സഹായകരമായ നടപടിയായാണ് പുതിയ തീരുമാനം.

മാർച്ച് 31 വരെയാണ് ഈ ഇളവ് അനുവദിച്ചിരിക്കുന്നത്. ഈ കാലയളവിനുള്ളിൽ വീസ കാലാവധി കഴിഞ്ഞ പ്രവാസികൾക്ക് യുഎഇയിലേക്ക് മടങ്ങിവരാൻ കഴിയും. കൂടാതെ ഈ കാലയളവിൽ ഉണ്ടായ ഓവർസ്റ്റേ പിഴ ഈടാക്കില്ലെന്നും അധികൃതർ വ്യക്തമാക്കി. രാജ്യത്ത് തിരിച്ചെത്തിയ ശേഷം നിയമപരമായ നടപടികൾ പൂർത്തിയാക്കി വീസ പുതുക്കി താമസ പദവി ശരിയാക്കാനുള്ള അവസരവും ലഭിക്കും. വിദേശങ്ങളിൽ കുടുങ്ങിയ പ്രവാസികൾക്ക് കുടുംബങ്ങളുമായി വീണ്ടും ഒന്നിക്കാൻ സഹായിക്കുന്ന മാനുഷികമായ നടപടിയാണിതെന്ന് ഐസിപി അറിയിച്ചു. യാത്ര തിരിക്കുന്നതിന് മുൻപ് വിമാന ടിക്കറ്റും മറ്റ് ആവശ്യമായ യാത്രാ രേഖകളും വിമാനക്കമ്പനിയുമായി ബന്ധപ്പെട്ട് ഉറപ്പാക്കണമെന്നും അധികൃതർ പ്രവാസികളെ ഓർമ്മിപ്പിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt