യുഎഇ പൗരന്മാർക്ക് അന്താരാഷ്ട്ര യാത്രകളും വിദേശ താമസവും കൂടുതൽ എളുപ്പമാക്കുന്ന സുപ്രധാന പ്രഖ്യാപനവുമായി യുഎഇ ആഭ്യന്തര മന്ത്രാലയം. രാജ്യത്തെ ഡ്രൈവിങ് ലൈസൻസ് ഇനി 34 രാജ്യങ്ങളിലും അന്താരാഷ്ട്ര ലക്ഷ്യസ്ഥാനങ്ങളിലും അംഗീകരിക്കപ്പെടുന്നതായി മന്ത്രാലയം അറിയിച്ചു. ഇതോടെ, യുഎഇ ലൈസൻസ് ഉപയോഗിച്ച് ചില രാജ്യങ്ങളിൽ നേരിട്ട് വാഹനമോടിക്കാനും, സ്ഥിരതാമസത്തിനായി മാറുന്നവർക്ക് പ്രാദേശിക ലൈസൻസായി മാറ്റിയെടുക്കാനും സാധിക്കും. ‘മർഖൂസ്’ (Murkhoos) പദ്ധതിയിലൂടെയാണ് ഈ സേവനം ലഭ്യമാക്കുന്നത്. വിദേശ സന്ദർശനത്തിനോ വിനോദസഞ്ചാരത്തിനോ പോകുന്ന യുഎഇ പൗരന്മാർക്ക് അംഗീകൃത രാജ്യങ്ങളിൽ സ്വന്തം ലൈസൻസ് ഉപയോഗിച്ച് വാഹനം ഓടിക്കാനാകും. അതേസമയം, അവിടെ സ്ഥിരതാമസമാക്കിയാൽ പ്രാദേശിക ഡ്രൈവിങ് ലൈസൻസിലേക്ക് മാറ്റാനുള്ള സൗകര്യവും ലഭ്യമാണ്.
അംഗീകൃത രാജ്യങ്ങളുടെ പട്ടികയിൽ എസ്റ്റോണിയ, അൽബേനിയ, പോർച്ചുഗൽ, ചൈന, ഹംഗറി, ഗ്രീസ്, യുക്രൈൻ, ബൾഗേറിയ, സ്ലോവാക്യ, സ്ലോവേനിയ, സെർബിയ, സൈപ്രസ്, ലാത്വിയ, ലക്സംബർഗ്, ലിത്വാനിയ, മാൾട്ട, ഐസ്ലൻഡ്, മോണ്ടിനെഗ്രോ, ഇസ്രായേൽ, അസർബൈജാൻ, ബെലാറസ്, ഉസ്ബെക്കിസ്ഥാൻ, യുണൈറ്റഡ് കിംഗ്ഡം, ഓസ്ട്രിയ, ഡെൻമാർക്ക്, നെതർലൻഡ്സ്, പോളണ്ട്, ഫിൻലൻഡ്, ക്രൊയേഷ്യ, അമേരിക്കയിലെ ടെക്സസ് സംസ്ഥാനം, നോർത്ത് മാസിഡോണിയ, കൊസോവോ, കിർഗിസ്ഥാൻ എന്നിവ ഉൾപ്പെടുന്നു. ദക്ഷിണ കൊറിയയിൽ യുഎഇ ലൈസൻസ് സ്ഥിരതാമസക്കാർക്ക് മാത്രമാണ് പ്രാദേശിക ലൈസൻസായി മാറ്റാൻ അനുമതിയുള്ളത്.
അതേസമയം, 53 രാജ്യങ്ങളിലെ പൗരന്മാർക്ക് യുഎഇയിൽ താമസക്കാരാകുമ്പോൾ അവരുടെ സ്വദേശത്തെ ഡ്രൈവിങ് ലൈസൻസ് പരീക്ഷകളില്ലാതെ യുഎഇ ലൈസൻസായി മാറ്റിയെടുക്കാനും അവസരമുണ്ട്. ഇതിനായി സാധുവായ ലൈസൻസ്, റെസിഡൻസി, കാഴ്ചപരിശോധന എന്നിവ ഉൾപ്പെടെയുള്ള നിബന്ധനകൾ പാലിക്കേണ്ടതുണ്ട്.
റോഡ് സുരക്ഷാ മാനദണ്ഡങ്ങളിലും ലൈസൻസിംഗ് സംവിധാനത്തിലും യുഎഇ നേടിയ അന്താരാഷ്ട്ര അംഗീകാരത്തിന്റെ പ്രതിഫലനമാണ് ഈ വികസനമെന്ന് ആഭ്യന്തര മന്ത്രാലയം വ്യക്തമാക്കി. ഇതിലൂടെ വിദേശത്ത് പഠനം, ജോലി, താമസം, യാത്ര എന്നിവ നടത്തുന്ന യുഎഇ പൗരന്മാർക്ക് നടപടിക്രമങ്ങളും സമയച്ചെലവും ഗണ്യമായി കുറയുമെന്നാണ് വിലയിരുത്തൽ.
