രാജ്യത്തെ നിലവിലെ സാഹചര്യം പരിഗണിച്ച് പൊതുജനങ്ങൾ ഉത്തരവാദിത്തത്തോടെ വാങ്ങൽ നടത്തണമെന്നും അനാവശ്യമായി സാധനങ്ങൾ സംഭരിക്കരുതെന്നും ഗവൺമെന്റ് കമ്മ്യൂണിക്കേഷൻ സെന്റർ (CGC) അഭ്യർത്ഥിച്ചു. പൗരന്മാരും പ്രവാസികളും അത്യാവശ്യമായ സാധനങ്ങൾ മാത്രം വാങ്ങുകയും അനാവശ്യമായ പരിഭ്രാന്തി ഒഴിവാക്കുകയും വേണമെന്നാണ് അധികൃതരുടെ നിർദേശം. അമിതമായി സാധനങ്ങൾ വാങ്ങി സൂക്ഷിക്കുന്നത് വിപണിയിൽ കൃത്രിമ ക്ഷാമം സൃഷ്ടിക്കാൻ ഇടയാക്കുമെന്ന് അധികൃതർ മുന്നറിയിപ്പ് നൽകി. എല്ലാവർക്കും ആവശ്യമായ സാധനങ്ങൾ ലഭ്യമാകുന്നതിനായി ഉത്തരവാദിത്തത്തോടെ ഷോപ്പിംഗ് നടത്തണമെന്ന് പൊതുജനങ്ങളോട് ആവശ്യപ്പെട്ടു.
കടകളിലും സൂപ്പർമാർക്കറ്റുകളിലും തിരക്ക് കൂട്ടുന്നതും അനാവശ്യമായി സാധനങ്ങൾ ശേഖരിക്കുന്നതും ഒഴിവാക്കണമെന്നും അധികൃതർ വ്യക്തമാക്കി. കൂടാതെ തെറ്റായ വിവരങ്ങളും അഭ്യൂഹങ്ങളും പ്രചരിപ്പിക്കാതിരിക്കാനും ഔദ്യോഗിക ചാനലുകളിലൂടെ ലഭിക്കുന്ന വിവരങ്ങൾ മാത്രം വിശ്വസിക്കണമെന്നും നിർദേശിച്ചു. രാജ്യത്ത് ഭക്ഷ്യവസ്തുക്കളുടെയും മറ്റ് അവശ്യ സാധനങ്ങളുടെയും ലഭ്യത മതിയായ തോതിൽ ഉറപ്പാക്കിയിട്ടുണ്ടെന്നും അതിനാൽ ജനങ്ങൾ ആശങ്കപ്പെടേണ്ട സാഹചര്യമില്ലെന്നും ഗവൺമെന്റ് കമ്മ്യൂണിക്കേഷൻ സെന്റർ അറിയിച്ചു.
