കുവൈത്ത് സിറ്റി: രാജ്യത്തെ നിരത്തുകളിൽ അമിതവേഗത്തിൽ വാഹനമോടിക്കുന്ന പ്രവാസികൾക്കെതിരെ കർശന നടപടിയുമായി കുവൈത്ത് അധികൃതർ. ട്രാഫിക് നിയമങ്ങൾ ലംഘിക്കുന്നവർക്കെതിരെ ശക്തമായ നടപടികൾ സ്വീകരിക്കുമെന്ന് ജനറൽ ഡിപ്പാർട്ട്മെന്റ് ഓഫ് ട്രാഫിക് മുന്നറിയിപ്പ് നൽകി.
അമിതവേഗത്തിൽ വാഹനമോടിക്കുന്നത് ഗുരുതരമായ കുറ്റകൃത്യമായാണ് കുവൈത്ത് കാണുന്നത്. ഇത്തരം നിയമലംഘനങ്ങൾ നടത്തുന്ന സ്വദേശികൾക്ക് പോലീസ് സ്റ്റേഷനിൽ തടവും പിഴയും ഉൾപ്പെടെയുള്ള നടപടികൾ നേരിടേണ്ടി വരുമ്പോൾ, പ്രവാസികളെ നാടുകടത്താനാണ് (Deportation) അധികൃതരുടെ തീരുമാനം. അമിതവേഗത മൂലം ഉണ്ടാകുന്ന അപകടങ്ങൾ കുറയ്ക്കുന്നതിനും റോഡ് സുരക്ഷ ഉറപ്പാക്കുന്നതിനുമായാണ് ഇത്തരമൊരു കടുത്ത തീരുമാനത്തിലേക്ക് അധികൃതർ എത്തിയത്.
പ്രധാന റോഡുകളിലും ഹൈവേകളിലും ട്രാഫിക് പോലീസിന്റെ പരിശോധന കർശനമാക്കിയിട്ടുണ്ട്. അടുത്തിടെ നടന്ന പരിശോധനയിൽ മണിക്കൂറിൽ 153 കിലോമീറ്ററിലധികം വേഗതയിൽ വാഹനം ഓടിച്ച ഏഷ്യൻ പൗരനെ ട്രാഫിക് പോലീസ് പിടികൂടിയിരുന്നു. ഇദ്ദേഹത്തിന്റെ വാഹനം കണ്ടുകെട്ടുകയും നിയമനടപടികൾ സ്വീകരിക്കുകയും ചെയ്തു.
അമിതവേഗത മറ്റ് യാത്രക്കാരുടെ ജീവൻ അപകടത്തിലാക്കുന്ന കാര്യമാണെന്നും, നിയമം എല്ലാവർക്കും ഒരുപോലെ ബാധകമാണെന്നും അധികൃതർ വ്യക്തമാക്കി. നിയമലംഘനങ്ങൾ ഒഴിവാക്കാനും സ്വന്തം സുരക്ഷയും മറ്റുള്ളവരുടെ സുരക്ഷയും മുൻനിർത്തി വേഗപരിധി പാലിക്കണമെന്നും ട്രാഫിക് പോലീസ് വാഹനമോടിക്കുന്നവരോട് അഭ്യർത്ഥിച്ചു.
