കുവൈത്തിനെ പിടിച്ചുലച്ച വ്യാജമദ്യ ദുരന്തം; വില്ലനായത് മെഥനോൾ, ചെറിയ അളവ് പോലും ജീവനെടുക്കും, മാരകവിഷമെന്ന് വിദഗ്ധർ
കുവൈറ്റ് സിറ്റി: കുവൈറ്റിൽ വ്യാജ മദ്യം കഴിച്ച് 23 പേർ മരിക്കുകയും 160-ൽ അധികം പേർക്ക് വിഷബാധയേൽക്കുകയും ചെയ്ത സംഭവത്തിൽ, മെഥനോൾ എന്ന രാസവസ്തുവിന്റെ അപകടസാധ്യതയെക്കുറിച്ച് വിദഗ്ധർ മുന്നറിയിപ്പ് നൽകി. ഥനോൾ വളരെ വിഷാംശമുള്ളതാണെന്നും ചെറിയ അളവിൽ പോലും മാരകമായേക്കാമെന്നും ഇന്റേണൽ മെഡിസിൻ ആൻഡ് ഗ്യാസ്ട്രോഎൻട്രോളജി കൺസൾട്ടന്റ് ഡോ. ഘനം അൽ-സലേം വ്യക്തമാക്കി.
എന്താണ് മെഥനോൾ?
മെഥനോൾ ഒരു ജൈവ രാസവസ്തുവും മദ്യപാനങ്ങളിൽ സാധാരണയായി ഉപയോഗിക്കുന്ന എഥൈൽ ആൽക്കഹോളിൽ നിന്ന് വ്യത്യസ്തമായ ഒന്നാണ്. ഇത് സിന്തറ്റിക് ആൽക്കഹോളാണ്. ചില ബാക്ടീരിയൽ അണുബാധകൾക്കുള്ള ആന്റിസെപ്റ്റിക് ആയും പെയിന്റ്, വാർണിഷ് നീക്കം ചെയ്യാനുമൊക്കെ ഇത് ഉപയോഗിക്കാറുണ്ട്. ചില വ്യാജ മദ്യങ്ങളിൽ വിലകുറഞ്ഞ ചേരുവയായി ഇത് ഉപയോഗിക്കുന്നതായി കണ്ടെത്തിയിട്ടുണ്ട്. മെഥനോളിൻ്റെ കുറഞ്ഞ വിലയാണ് ഇതിന് കാരണം.
വ്യാജ മദ്യങ്ങളിൽ എങ്ങനെ വരുന്നു?
വൈൻ നിർമ്മിക്കുമ്പോൾ അതിൻ്റെ ഒരു ഘടകമായി മെഥനോൾ രൂപം കൊള്ളാറുണ്ട്. വൈൻ ഫാക്ടറികളിൽ ഈ പദാർത്ഥം ഫിൽട്ടർ ചെയ്ത് മാറ്റാറുണ്ട്. എന്നാൽ വീട്ടിൽ അനധികൃതമായി മദ്യം നിർമ്മിക്കുമ്പോൾ ഈ പ്രക്രിയ നടക്കുന്നില്ല. ചിലപ്പോൾ മനപ്പൂർവ്വം എഥനോളിന് പകരമായി മെഥനോൾ വ്യാജമദ്യങ്ങളിൽ ചേർക്കാറുണ്ട്.
അപകടസാധ്യതകളും ലക്ഷണങ്ങളും
മദ്യപാനം ശീലമാക്കിയവർക്ക് മെഥനോൾ കലർന്ന പാനീയങ്ങൾ തിരിച്ചറിയാൻ പ്രയാസമാണ്. മെഥനോൾ ശരീരത്തിൽ പ്രവേശിക്കുമ്പോൾ അത് വിഷവസ്തുക്കളായി മാറുകയും വൃക്ക, കരൾ, ഹൃദയം, രക്തചംക്രമണവ്യൂഹം, തലച്ചോറ്, ഞരമ്പുകൾ തുടങ്ങിയ സുപ്രധാന അവയവങ്ങൾക്ക് സ്ഥിരമായ കേടുപാടുകൾ വരുത്തുകയും ചെയ്യും.
വിഷബാധയുടെ ലക്ഷണങ്ങൾ പ്രത്യക്ഷപ്പെടാൻ 12 മുതൽ 24 മണിക്കൂർ വരെ സമയമെടുക്കും. തലവേദന, തലകറക്കം, ഹൃദയാഘാതം, കോമ, ശ്വാസംമുട്ടൽ, അന്ധത, കഠിനമായ മലബന്ധം, വയറിളക്കം, ഓക്കാനം തുടങ്ങിയവയാണ് പ്രധാന ലക്ഷണങ്ങൾ. ചിലപ്പോൾ മരണം വരെ സംഭവിക്കാം.
ചികിത്സാരീതി
മെഥനോൾ വിഷബാധ സംശയിക്കുന്ന ഏതൊരാൾക്കും ഉടനടി വൈദ്യസഹായം നൽകേണ്ടത് അത്യാവശ്യമാണ്. ചികിത്സ വൈകുന്നത് അവയവങ്ങൾക്ക് സ്ഥിരമായ കേടുപാടുകൾ ഉണ്ടാക്കും. മെഥനോൾ വിഷബാധയ്ക്കുള്ള മരുന്ന് ചികിത്സാ ഓപ്ഷനുകൾക്ക് പുറമേ, രോഗിക്ക് തീവ്രപരിചരണവും വൃക്ക ഡയാലിസിസും ആവശ്യമായി വരും. വിഷ നിയന്ത്രണ കേന്ദ്രവുമായി സഹകരിച്ചുള്ള ചികിത്സയാണ് ഏറ്റവും ഫലപ്രദം.
മെഥനോളിൻ്റെ രാസഘടന
മെഥനോൾ (CH3OH) അഥവാ മീഥൈൽ ആൽക്കഹോൾ കാർബൺ, ഹൈഡ്രജൻ, ഓക്സിജൻ എന്നിവ ചേർന്ന ഒരു സംയുക്തമാണ്. ഇതിനെ “വുഡ് ആൽക്കഹോൾ” എന്നും വിളിക്കാറുണ്ട്, കാരണം മരം വാറ്റിയെടുത്ത് ഇത് തയ്യാറാക്കാം. ഇത് വ്യവസായങ്ങളിലും മറ്റ് നിരവധി രാസ ഉൽപ്പന്നങ്ങളിലും ഉപയോഗിക്കാറുണ്ട്.
മനുഷ്യർക്ക് 10 മില്ലി ശുദ്ധമായ മെഥനോൾ കഴിച്ചാൽ പോലും അത് ശരീരത്തിൽ ഫോർമിക് ആസിഡായി മാറുകയും സ്ഥിരമായ അന്ധതയ്ക്ക് കാരണമാവുകയും ചെയ്യും. 15 മില്ലി വരെ മാരകമാണ്. ഏകദേശം 100 മില്ലി ശുദ്ധമായ മെഥനോൾ കഴിച്ചാൽ മരണം സംഭവിക്കാം.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/LXkAQWFENhKJ0MX7QxTdN5?mode=ac_t
Comments (0)