അബുദാബിയെയും ഫുജൈറയെയും ബന്ധിപ്പിക്കുന്ന ഇത്തിഹാദ് റെയിലിന്റെ ആദ്യഘട്ട യാത്രാസർവീസ് ആരംഭിച്ച് ഒരു മാസം പിന്നിടുമ്പോൾ, പദ്ധതിയുടെ അടുത്ത ഘട്ടങ്ങളുടെയും പുതിയ സ്റ്റേഷനുകളുടെയും സമയക്രമം അധികൃതർ പ്രഖ്യാപിച്ചു. വാരാന്ത്യങ്ങൾ ഉൾപ്പെടെ മികച്ച യാത്രക്കാരുടെ പ്രതികരണമാണ് ലഭിക്കുന്നതെന്നും വരും മാസങ്ങളിൽ കൂടുതൽ നഗരങ്ങളിലേക്ക് സർവീസ് വ്യാപിപ്പിക്കുമെന്നും ഇത്തിഹാദ് റെയിൽ അറിയിച്ചു.

സെപ്റ്റംബറിൽ ദുബായിലേക്കും ഷാർജയിലേക്കും

പദ്ധതിയുടെ അടുത്ത പ്രധാനഘട്ടം സെപ്റ്റംബർ 30-ന് പൂർത്തിയാകും. ഇതോടെ ദുബായിലെ ജുമൈറ ഗോൾഫ് എസ്റ്റേറ്റ്സ് സ്റ്റേഷനിലേക്കും ഷാർജയിലെ അൽ ദൈദ് സ്റ്റേഷനിലേക്കും യാത്രാസർവീസ് വ്യാപിപ്പിക്കും.

ഇനി തുറക്കുന്ന സ്റ്റേഷനുകൾ

ശേഷിക്കുന്ന സ്റ്റേഷനുകൾ ഘട്ടംഘട്ടമായി പ്രവർത്തനം ആരംഭിക്കും.

• നവംബർ 30: അബുദാബിയിലെ മദീനത് സായിദ്, ലീവ സ്റ്റേഷനുകൾ.
• ഡിസംബർ 30: അൽ സില, അൽ ധന്ന, അൽ മിർഫ സ്റ്റേഷനുകൾ.
• 2027 മാർച്ച് 30: ഷാർജ യൂണിവേഴ്സിറ്റി സിറ്റി സ്റ്റേഷൻ പ്രവർത്തനം ആരംഭിക്കുന്നതോടെ ആദ്യഘട്ട പാസഞ്ചർ ശൃംഖല പൂർണമാകും.

നിലവിലെ ടിക്കറ്റ് നിരക്ക്

അബുദാബി–ഫുജൈറ റൂട്ടിൽ നിലവിൽ യാത്രക്കാർക്ക് 50 ശതമാനം പ്രമോഷണൽ ഇളവാണ് ലഭിക്കുന്നത്.

• കംഫർട്ട് ക്ലാസ്: 55 ദിർഹം മുതൽ (സാധാരണ നിരക്ക് 109 ദിർഹം)
• പ്രീമിയം ക്ലാസ്: 120 ദിർഹം മുതൽ (സാധാരണ നിരക്ക് 239 ദിർഹം)

സേവർ, വാല്യൂ, ഫ്ലെക്സ് എന്നീ മൂന്ന് വിഭാഗങ്ങളിലാണ് ടിക്കറ്റുകൾ ലഭിക്കുന്നത്. കുട്ടികൾക്കും മുതിർന്ന പൗരന്മാർക്കും പ്രത്യേക ഇളവുകളും അനുവദിച്ചിട്ടുണ്ട്. മറ്റ് റൂട്ടുകളിലെ നിരക്കുകൾ സർവീസ് ആരംഭിക്കുന്നതിന് മുമ്പ് പ്രഖ്യാപിക്കും.

യാത്രക്കാർക്ക് മികച്ച കണക്റ്റിവിറ്റി

റെയിൽ യാത്ര കൂടുതൽ സൗകര്യപ്രദമാക്കാൻ സ്റ്റേഷനുകൾ പ്രാദേശിക ബസ്, മെട്രോ, ടാക്സി സർവീസുകളുമായി ബന്ധിപ്പിച്ചിട്ടുണ്ട്.

അബുദാബിയിലെ മുഹമ്മദ് ബിൻ സായിദ് സിറ്റി സ്റ്റേഷനിൽ നിന്ന് കോർണിഷ്, അഡ്നോക് ആസ്ഥാനം, അഡ്നെക്, റീം മാൾ എന്നിവിടങ്ങളിലേക്ക് ഷട്ടിൽ ബസ് സർവീസുണ്ട്. MR1, MR2 എന്നീ പുതിയ ബസ് റൂട്ടുകളും ആരംഭിച്ചിട്ടുണ്ട്. ദുബായിൽ മെട്രോ, ബസ്, ടാക്സി ശൃംഖലയുമായി റെയിൽ സ്റ്റേഷൻ നേരിട്ട് ബന്ധിപ്പിക്കും. കൂടാതെ, നോൾ കാർഡ് ഉപയോഗിച്ച് തന്നെ ഇത്തിഹാദ് റെയിലിലും യാത്ര ചെയ്യാനുള്ള സംവിധാനവും ഒരുക്കിയിട്ടുണ്ട്.

900 കിലോമീറ്റർ ദൈർഘ്യമുള്ള ദേശീയ റെയിൽ ശൃംഖല

പൂർണമായും പ്രവർത്തനസജ്ജമാകുമ്പോൾ ഏകദേശം 900 കിലോമീറ്റർ ദൈർഘ്യമുള്ള ഇത്തിഹാദ് റെയിൽ ശൃംഖല യുഎഇയിലെ ഏഴ് എമിറേറ്റുകളിലായി 11 നഗരങ്ങളെയും പ്രധാന പ്രദേശങ്ങളെയും ബന്ധിപ്പിക്കും. സൗദി അതിർത്തിക്കു സമീപമുള്ള അൽ സില മുതൽ കിഴക്കൻ തീരത്തെ ഫുജൈറ വരെയായിരിക്കും യാത്രാ ശൃംഖല വ്യാപിക്കുക. നിലവിൽ തന്നെ മരുഭൂമിയും ഹജർ പർവതനിരകളും ഒമാൻ ഉൾക്കടലിന്റെ തീരക്കാഴ്ചകളും സമ്മാനിക്കുന്ന അബുദാബി–ഫുജൈറ റൂട്ടാണ് യാത്രക്കാരുടെ ഏറ്റവും പ്രിയപ്പെട്ട റെയിൽ യാത്രയായി മാറിയിരിക്കുന്നത്.