ദുബായ്: ദുബായിൽ വസ്തുവകകൾ വാങ്ങുന്ന നിക്ഷേപകർക്ക് നൽകുന്ന രണ്ട് വർഷത്തെ റെസിഡൻസി വിസ നിയമങ്ങളിൽ അധികൃതർ നിർണ്ണായകമായ ഇളവുകൾ പ്രഖ്യാപിച്ചു. ദുബായ് ലാൻഡ് ഡിപ്പാർട്ട്മെന്റിന് കീഴിലുള്ള ക്യൂബ് സെന്ററാണ് പുതിയ നിബന്ധനകൾ പുറത്തുവിട്ടത്. വ്യക്തിഗത നിക്ഷേപകർക്ക് വിസ ലഭിക്കുന്നതിന് മുമ്പ് നിശ്ചയിച്ചിരുന്ന ഏഴരലക്ഷം ദിർഹത്തിന്റെ കുറഞ്ഞ വസ്തു മൂല്യം ഒഴിവാക്കിയതാണ് ഏറ്റവും പ്രധാനപ്പെട്ട മാറ്റം. ഇതോടെ എത്ര തുകയുടെ പ്രോപ്പർട്ടി വാങ്ങുന്നവർക്കും ഉടമസ്ഥാവകാശ രേഖകൾ കൃത്യമാണെങ്കിൽ വിസയ്ക്ക് അപേക്ഷിക്കാനാകും.
പുതിയ നിയമപ്രകാരം അപേക്ഷകൻ വസ്തുവിന്റെ പൂർണ്ണ ഉടമയായിരിക്കണം എന്നത് നിർബന്ധമാണ്. എന്നാൽ ഒന്നിലധികം ആളുകൾ ചേർന്ന് വസ്തു വാങ്ങിയ സാഹചര്യമാണെങ്കിൽ, വിസയ്ക്ക് അപേക്ഷിക്കുന്ന ഓരോ നിക്ഷേപകനും കുറഞ്ഞത് നാല് ലക്ഷം ദിർഹത്തിന്റെ വിഹിതമെങ്കിലും ഉണ്ടായിരിക്കണം. ബാങ്ക് ലോൺ വഴിയോ അല്ലെങ്കിൽ തവണ വ്യവസ്ഥയിലോ വസ്തു വാങ്ങിയവർക്കും ഇനി വിസ ലഭിക്കും. ഇതിനായി ബാങ്കിൽ നിന്നോ ഡെവലപ്പറിൽ നിന്നോ ഉള്ള എൻ.ഒ.സി (NOC) ഹാജരാക്കിയാൽ മതിയാകും. വായ്പ തിരിച്ചടച്ച തുക, ബാക്കിയുള്ള തുക, മോർട്ട്ഗേജ് സ്റ്റേറ്റ്മെന്റ് എന്നിവ ഈ രേഖയിൽ വ്യക്തമായിരിക്കണം.
വിസ അപേക്ഷയ്ക്കൊപ്പം ദുബായിലെ വസ്തുവിന്റെ ഉടമസ്ഥാവകാശ രേഖ തന്നെ സമർപ്പിക്കണം. മറ്റ് എമിറേറ്റുകളിലെ രേഖകൾ ദുബായ് വിസയ്ക്കായി പരിഗണിക്കില്ല. ഇതിനൊപ്പം ആറ് മാസത്തിലധികം കാലാവധിയുള്ള പാസ്പോർട്ട് കോപ്പി, നിലവിലുള്ള എമിറേറ്റ്സ് ഐഡി, ഐസിപി നിബന്ധനകൾ പാലിക്കുന്ന ഫോട്ടോ, യുഎഇയിലെ അംഗീകൃത കമ്പനികളിൽ നിന്നുള്ള ഇൻഷുറൻസ് എന്നിവയും നൽകണം. കൂടാതെ ദുബായ് പോലീസിൽ നിന്ന് ലഭിച്ച ക്ലിയറൻസ് സർട്ടിഫിക്കറ്റും അപേക്ഷയോടൊപ്പം ഉണ്ടായിരിക്കണം. ടൈറ്റിൽ ഡീഡിലെ പേരും പാസ്പോർട്ടിലെ പേരും ഒന്നുതന്നെയാണെന്ന് നിക്ഷേപകർ ഉറപ്പുവരുത്തണം.
ഇറാൻ, പാകിസ്ഥാൻ, ഇറാഖ്, ലിബിയ, അഫ്ഗാനിസ്ഥാൻ എന്നീ രാജ്യങ്ങളിൽ നിന്നുള്ള അപേക്ഷകർക്ക് അവരുടെ സ്വന്തം രാജ്യത്തെ തിരിച്ചറിയൽ രേഖ കൂടി നിർബന്ധമാക്കിയിട്ടുണ്ട്. എല്ലാ റെസിഡൻസി വിസ അപേക്ഷകർക്കും മെഡിക്കൽ ഇൻഷുറൻസ് നിർബന്ധമാണ്. ദുബായിലെ റിയൽ എസ്റ്റേറ്റ് മേഖലയിലേക്ക് കൂടുതൽ നിക്ഷേപകരെ ആകർഷിക്കുന്നതിനും താമസ നടപടികൾ ലളിതമാക്കുന്നതിനുമാണ് സർക്കാർ ഈ പരിഷ്കാരങ്ങൾ നടപ്പിലാക്കിയിരിക്കുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
