കൗമാരക്കാരുടെ സ്കൂട്ടർ അഭ്യാസം: ദുബായ് കൈറ്റ് ബീച്ചിൽ നിരവധി ബൈക്കുകളും സ്കൂട്ടറുകളും പിടിച്ചെടുത്തു

electric scooters in Dubai; പൊതുസ്ഥലങ്ങളിൽ കൗമാരക്കാർ ഒറ്റച്ചക്രത്തിൽ വാഹനം ഓടിക്കുന്നത് ഉൾപ്പെടെയുള്ള അപകടകരമായ അഭ്യാസപ്രകടനങ്ങൾ വർദ്ധിച്ച സാഹചര്യത്തിൽ, ഒരാഴ്ചയ്ക്കിടെ 1,903 ഇലക്ട്രിക് സ്കൂട്ടറുകൾ പിടിച്ചെടുത്തതായി ദുബായ് പോലീസ് അറിയിച്ചു. ജുമൈറയിലെ കൈറ്റ് ബീച്ചിൽ നിന്ന് മാത്രം ഒരാഴ്ചയ്ക്കിടെ 1,194 ഇലക്ട്രിക് ബൈക്കുകളും സ്കൂട്ടറുകളുമാണ് പിടിച്ചെടുത്തത്. ജനത്തിരക്കുള്ള സ്ഥലങ്ങളിൽ കൗമാരക്കാർ സ്കൂട്ടറുകളുടെ മുൻവശം ഉയർത്തി ഒറ്റച്ചക്രത്തിൽ ഓടിക്കുന്നതും അപകടകരമായ അഭ്യാസങ്ങൾ കാണിക്കുന്നതുമായ നിരവധി സംഭവങ്ങൾ ശ്രദ്ധയിൽപ്പെട്ടിട്ടുണ്ടെന്ന് ദുബായ് പോലീസ് ജനറൽ ഡിപ്പാർട്ട്‌മെന്റ് ഓഫ് ട്രാഫിക് ഡയറക്ടർ ബ്രിഗേഡിയർ ജുമാ സാലം ബിൻ സുവൈദാൻ പറഞ്ഞു. ഇതിന്റെ വീഡിയോകൾ ഓൺലൈനിൽ പ്രചരിക്കുന്നതായും അദ്ദേഹം ചൂണ്ടിക്കാട്ടി. ഇത്തരം അഭ്യാസങ്ങൾ വാഹനമോടിക്കുന്നവരുടെ നിയന്ത്രണവും ബാലൻസും നഷ്ടപ്പെടാനും, വീഴ്ചകൾക്കും കാൽനടയാത്രക്കാരുമായി കൂട്ടിയിടിക്കുന്നതിനും ഇടയാക്കുമെന്ന് അധികൃതർ വ്യക്തമാക്കി. കുടുംബങ്ങളും കുട്ടികളും ബീച്ച് സന്ദർശകരും ഒത്തുകൂടുന്ന തിരക്കേറിയ വിനോദസഞ്ചാര കേന്ദ്രങ്ങളിൽ ഇത്തരം പ്രവൃത്തികൾ വലിയ അപകടസാധ്യതയാണ് സൃഷ്ടിക്കുന്നത്. ഇത്തരം പ്രവൃത്തികൾ വിനോദമോ കഴിവിന്റെ പ്രകടനമോ അല്ല. മറിച്ച് ദാരുണമായ പ്രത്യാഘാതങ്ങൾക്ക് വഴിവെച്ചേക്കാവുന്ന അശ്രദ്ധമായ നടപടികളാണ്,” ബ്രിഗേഡിയർ ജുമാ സാലം ഊന്നിപ്പറഞ്ഞു. അപകടകരമായ രീതിയിലുള്ള വാഹനമോടിക്കൽ ഒരു കാരണവശാലും അനുവദിക്കില്ലെന്നും, നിയമലംഘനങ്ങൾ ആവർത്തിക്കുന്ന പ്രദേശങ്ങളിൽ പ്രത്യേക ശ്രദ്ധ കേന്ദ്രീകരിച്ച് കൂടുതൽ ട്രാഫിക് പട്രോളിംഗ് സംഘങ്ങളെയും പരിശോധനാ ടീമുകളെയും വിന്യസിക്കുന്നത് തുടരുമെന്നും പോലീസ് വ്യക്തമാക്കി. കുട്ടികൾ ഉത്തരവാദിത്തത്തോടെ ഇലക്ട്രിക് സ്കൂട്ടറുകൾ ഉപയോഗിക്കുന്നുണ്ടെന്ന് ഉറപ്പുവരുത്താൻ മാതാപിതാക്കൾ സജീവമായി ഇടപെടണമെന്ന് പോലീസ് അഭ്യർത്ഥിച്ചു. നിശ്ചിത പാതകളിൽ മാത്രം വാഹനം ഓടിക്കുക, ഹെൽമറ്റ് ഉൾപ്പെടെയുള്ള സുരക്ഷാ കവചങ്ങൾ ധരിക്കുക, കാൽനടയാത്രക്കാരും കുടുംബങ്ങളും തിങ്ങിനിറയുന്ന സ്ഥലങ്ങളിൽ നിന്ന് വിട്ടുനിൽക്കുക തുടങ്ങിയ സുരക്ഷാ നിർദ്ദേശങ്ങൾ കർശനമായി പാലിക്കണം. അമിതവേഗത ഒഴിവാക്കണമെന്നും, മറ്റൊരാളെ പിന്നിലിരുത്തി യാത്ര ചെയ്യരുതെന്നും, വാഹനത്തിന്റെ നിയന്ത്രണം നഷ്ടപ്പെടാൻ സാധ്യതയുള്ള യാതൊരുവിധ അഭ്യാസങ്ങളും കാണിക്കരുതെന്നും റൈഡർമാർക്ക് നിർദ്ദേശം നൽകിയിട്ടുണ്ട്. അതേസമയം, ഇത്തരം അഭ്യാസപ്രകടനങ്ങളുടെ വീഡിയോകൾ ഓൺലൈനിൽ പ്രചരിപ്പിക്കരുതെന്ന് പോലീസ് പൊതുജനങ്ങളോട് അഭ്യർത്ഥിച്ചു. ഇത് മറ്റ് കൗമാരക്കാരെയും സമാനമായ പ്രവൃത്തികൾ അനുകരിക്കാൻ പ്രേരിപ്പിച്ചേക്കാമെന്നതിനാലാണിത്. നിയമലംഘനങ്ങൾ ശ്രദ്ധയിൽപ്പെട്ടാൽ ദുബായ് പോലീസ് ആപ്പിലെ ‘പോലീസ് ഐ’ (Police Eye) സേവനം വഴിയോ 901 എന്ന നമ്പറിൽ വിളിച്ചോ അധികൃതരെ നേരിട്ട് അറിയിക്കണമെന്നും പോലീസ് ആവശ്യപ്പെട്ടു. സുരക്ഷിതവും ഉത്തരവാദിത്തമുള്ളതുമായ നഗരം എന്ന ദുബായുടെ സൽപ്പേരിന് നിരക്കാത്ത പ്രതിച്ഛായയാണ് ഇത്തരം സംഭവങ്ങൾ സൃഷ്ടിക്കുന്നതെന്നും ബ്രിഗേഡിയർ ജുമാ കൂട്ടിച്ചേർത്തു. “നിയമങ്ങൾ അവഗണിക്കുന്ന ചുരുക്കം ചില വ്യക്തികൾ നടത്തുന്ന ഒറ്റപ്പെട്ട പ്രവൃത്തികളാണിവ. ഇത് പൊതുസമൂഹത്തിന്റെ പെരുമാറ്റത്തെ പ്രതിഫലിപ്പിക്കുന്നില്ല,” അദ്ദേഹം വ്യക്തമാക്കി. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t

Related Posts

Leave a Reply

Your email address will not be published. Required fields are marked *