Kuwait domestic worker visa transfer; കുവൈത്തിൽ ഗാർഹിക തൊഴിലാളികളുടെ വിസ (ആർട്ടിക്കിൾ 20) സ്വകാര്യ മേഖലാ തൊഴിൽ വിസയിലേക്ക് (ആർട്ടിക്കിൾ 18) മാറ്റാൻ അനുമതി നൽകുന്ന കാര്യം അധികൃതർ സജീവമായി പരിഗണിക്കുന്നു. നിർദ്ദേശം അംഗീകരിക്കപ്പെടുകയാണെങ്കിൽ, ഗാർഹിക മേഖലയിൽ ജോലി ചെയ്യുന്ന യോഗ്യരായ തൊഴിലാളികൾക്ക് സ്വകാര്യ കമ്പനികളിലേക്ക് തൊഴിൽ മാറാനുള്ള പുതിയ വഴി തുറന്നുകിട്ടും. സ്വകാര്യ മേഖലാ കമ്പനി ഉടമകളുമായും പ്രതിനിധികളുമായും നടത്തിയ പ്രത്യേക കൂടിക്കാഴ്ചയിലാണ് ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ യൂസഫ് അൽ സബാഹ് ഇക്കാര്യം വ്യക്തമാക്കിയത്. “വേതന വിതരണ സംവിധാനം: തൊഴിലാളി സംരക്ഷണവും തൊഴിൽ വിപണിയിലെ നിയമപാലനവും” എന്ന പ്രമേയത്തിലായിരുന്നു യോഗം. ഗാർഹിക വിസ മാറ്റുന്നതിനുള്ള നിർദ്ദിഷ്ട മാനദണ്ഡങ്ങൾ ബന്ധപ്പെട്ട വകുപ്പുകൾ വിശദമായി പരിശോധിച്ച് വരികയാണെന്നും, എന്നാൽ വിസ മാറ്റം പുനരാരംഭിക്കുന്നത് സംബന്ധിച്ച് അന്തിമ തീരുമാനമൊന്നും ഇതുവരെ കൈക്കൊണ്ടിട്ടില്ലെന്നും മന്ത്രി വ്യക്തമാക്കി. സർക്കാരിന്റെ അംഗീകാരം ലഭിച്ചാൽ ബന്ധപ്പെട്ട അധികാരികൾ നിശ്ചയിക്കുന്ന കർശന നിബന്ധനകൾക്കും ചട്ടങ്ങൾക്കും വിധേയമായിട്ടായിരിക്കും ഈ സൗകര്യം തൊഴിലാളികൾക്ക് ലഭ്യമാക്കുക. തൊഴിലാളികൾക്ക് കൃത്യമായി വേതനം നൽകുന്നുണ്ടെന്ന് ഉറപ്പാക്കുന്നതിലും തൊഴിലുടമകൾ അവരുടെ നിയമപരമായ ബാധ്യതകൾ പാലിക്കുന്നതിലും യോഗം പ്രത്യേക ഊന്നൽ നൽകി. ശമ്പള വിതരണത്തിലെ ഗുരുതര വീഴ്ചകളെ തുടർന്ന് അഞ്ചോ അതിലധികമോ തൊഴിലാളികൾ ജോലി ചെയ്യുന്ന പതിനായിരത്തോളം കമ്പനികളുടെ ഫയലുകൾ ഇതിനകം മരവിപ്പിച്ചതായി മന്ത്രി വെളിപ്പെടുത്തി. മാസങ്ങളോളം, ചില സ്ഥാപനങ്ങളിൽ 18 മാസം വരെ തൊഴിലാളികൾക്ക് ശമ്പളം നൽകാതിരുന്ന സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. ജീവനക്കാർക്ക് കൃത്യമായി ശമ്പളം നൽകാത്ത തൊഴിലുടമകളുടെ ഫയലുകൾ യാന്ത്രികമായി താൽക്കാലികമായി റദ്ദാക്കുന്ന ഓട്ടോമേറ്റഡ് മോണിറ്ററിംഗ് സംവിധാനം നിലവിലുണ്ടെന്നും തൊഴിലാളി അവകാശങ്ങൾ സംരക്ഷിക്കുന്നതിൽ വിട്ടുവീഴ്ചയുണ്ടാകില്ലെന്നും അദ്ദേഹം വ്യക്തമാക്കി. തൊഴിലാളികളുടെ വേതനം നേരിട്ട് ബാങ്ക് അക്കൗണ്ടുകളിൽ എത്തുന്നുണ്ടെന്ന് ഉറപ്പുവരുത്താൻ കുവൈത്ത് സെൻട്രൽ ബാങ്കുമായി സഹകരിച്ച് കർശന നിരീക്ഷണ നടപടികൾ നടപ്പിലാക്കി വരുന്നതായി പബ്ലിക് അതോറിറ്റി ഫോർ മാൻപവർ (പിഎഎം) ഡയറക്ടർ ജനറൽ എൻജി. റബാബ് അൽ ഒസൈമി യോഗത്തിൽ അറിയിച്ചു. രാജ്യത്തെ തൊഴിൽ വിപണി കൂടുതൽ കുറ്റമറ്റതാക്കാനും നിയമലംഘനങ്ങൾ തടയാനും തൊഴിലാളികളുടെ സംരക്ഷണം ശക്തമാക്കാനുമുള്ള സമഗ്ര നടപടികളുടെ ഭാഗമായിട്ടാണ് ഗാർഹിക വിസ മാറ്റുന്ന കാര്യവും കുവൈത്ത് സർക്കാരിന്റെ പരിഗണനയിലുള്ളത്.
