Dubai online investment scam; സോഷ്യൽ മീഡിയയിലെ വ്യാജ നിക്ഷേപ വാഗ്ദാനങ്ങളിൽ വിശ്വസിച്ച് മുപ്പത് വർഷത്തെ സമ്പാദ്യം നഷ്ടപ്പെടുത്തി ദുബായിൽ വിരമിച്ച ഉദ്യോഗസ്ഥൻ. രണ്ട് മാസം കൊണ്ട് ഇദ്ദേഹത്തിന് നഷ്ടമായത് 4 ലക്ഷം ദിർഹത്തിലധികമാണ്. സോഷ്യൽ മീഡിയയിൽ കണ്ട ഒരു നിക്ഷേപ ഗ്രൂപ്പിൽ ചെറിയ തുക നിക്ഷേപിച്ച് തുടങ്ങിയ ഇദ്ദേഹത്തിന് ആദ്യം ലാഭവിഹിതം ലഭിച്ചുവെന്ന് തോന്നിപ്പിച്ചു. ഇതോടെ കൂടുതൽ തുക നിക്ഷേപിക്കാൻ പ്രേരിതനായി. എന്നാൽ പണം പിൻവലിക്കാൻ ശ്രമിച്ചപ്പോൾ, കൂടുതൽ തുക അടയ്ക്കണമെന്നാവശ്യപ്പെട്ട് തട്ടിപ്പുകാർ ഇദ്ദേഹത്തെ വീണ്ടും കബളിപ്പിക്കുകയായിരുന്നു. രണ്ട് മാസത്തോളം പണം കൈമാറിയ ശേഷമാണ് ഇദ്ദേഹം പോലീസിനെ സമീപിക്കുന്നത്. അപ്പോഴേക്കും പണം പല അക്കൗണ്ടുകളിലൂടെ കൈമാറ്റം ചെയ്യപ്പെട്ടതിനാൽ അത് തിരികെ ലഭിക്കുന്നത് അസാധ്യമായിത്തീർന്നു. റിപ്പോർട്ട് ചെയ്യപ്പെടുന്ന തട്ടിപ്പുകളിൽ 50 ശതമാനവും സോഷ്യൽ മീഡിയ വഴിയുള്ളവയാണെന്ന് പോലീസ് ഉദ്യോഗസ്ഥൻ അൽ യമാഹി പറഞ്ഞു. ഇൻഷുറൻസ് പോളിസികൾ, ഗാർഹിക തൊഴിലാളികൾ, വാഹന വിൽപ്പന തുടങ്ങിയവയുടെ പേരിലും വ്യാജ വാഗ്ദാനങ്ങൾ നൽകി ആളുകളെ കബളിപ്പിക്കുന്നുണ്ട്. അംഗീകൃത സ്ഥാപനങ്ങൾ ചെയ്യേണ്ട സേവനങ്ങൾക്കായി വ്യക്തിഗത ബാങ്ക് അക്കൗണ്ടുകളിലേക്ക് പണം കൈമാറരുതെന്ന് അദ്ദേഹം മുന്നറിയിപ്പ് നൽകി. പലപ്പോഴും പല പേരിലുള്ള അക്കൗണ്ടുകൾ നൽകി തുക വിഭജിച്ച് അയക്കാൻ ഇവർ ആവശ്യപ്പെടാറുണ്ട്.

20-നും 25-നും ഇടയിൽ പ്രായമുള്ള യുവാക്കളെ വ്യാജ പാർട്ട് ടൈം ജോലി വാഗ്ദാനങ്ങൾ നൽകി തട്ടിപ്പുകാർ വലയിലാക്കുന്നു. ബാങ്ക് അക്കൗണ്ടുകളോ ഡിജിറ്റൽ വാലറ്റുകളോ തുറക്കാൻ ആവശ്യപ്പെട്ട്, പിന്നീട് അവരെ ക്രിമിനൽ പ്രവർത്തനങ്ങളിലേക്ക് ഉപയോഗപ്പെടുത്തുകയാണ് പതിവ്. ഇതിനു പുറമെ, മാസത്തിൽ 20-30 ശതമാനം വരെ ലാഭം വാഗ്ദാനം ചെയ്യുന്ന നിക്ഷേപ പദ്ധതികളിൽ പെട്ട് പലർക്കും ലക്ഷക്കണക്കിന് ദിർഹമാണ് നഷ്ടപ്പെടുന്നത്. പോലീസ് ഉദ്യോഗസ്ഥരെന്ന വ്യാജേന വിളിച്ച് ബാങ്ക് അക്കൗണ്ട് പരിശോധനയിലാണെന്നും പണം മറ്റൊരു അക്കൗണ്ടിലേക്ക് മാറ്റണമെന്നും പറഞ്ഞ് ഭീഷണിപ്പെടുത്തുന്നതും തട്ടിപ്പുകാരുടെ രീതിയാണ്. ഇത്തരം കോളുകൾ ലഭിച്ചാൽ ഉടൻ ഔദ്യോഗികമായി അന്വേഷിക്കണം. കൂടാതെ, നിർമിതബുദ്ധി ഉപയോഗിച്ചുള്ള ‘ഡീപ്‌ഫേക്ക്’ സാങ്കേതികവിദ്യ വഴി ആളുകളുടെ ശബ്ദവും രൂപവും അനുകരിച്ച് തട്ടിപ്പ് നടത്താനുള്ള സാധ്യത വർധിച്ചുവരികയാണെന്നും പോലീസ് മുന്നറിയിപ്പ് നൽകി. തട്ടിപ്പിന് ഇരയായതായി സംശയം തോന്നിയാൽ ഉടൻ തന്നെ ദുബായ് പോലീസിന്റെ ‘ഇ-ക്രൈം’ പ്ലാറ്റ്‌ഫോം, ദുബായ് പോലീസ് ആപ്പ്, ‘പോലീസ് ഐ’ എന്നിവ വഴിയോ, 901 എന്ന നമ്പറിലോ ഉടൻ റിപ്പോർട്ട് ചെയ്യുക. വൈകുംതോറും പണം വീണ്ടെടുക്കാനുള്ള സാധ്യത കുറയുമെന്ന് അധികൃതർ ഓർമ്മിപ്പിക്കുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t