UAE weather El Niño; യുഎഇയിൽ വരും മാസങ്ങളിൽ സാധാരണയേക്കാൾ ഉയർന്ന താപനിലയും കൂടുതൽ മഴയും അനുഭവപ്പെടാൻ സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി. ‘എൽ നിനോ’ എന്ന കാലാവസ്ഥാ പ്രതിഭാമം ശക്തമാകുന്നതിന്റെ ഭാഗമായാണ് കാലാവസ്ഥയിൽ ഈ മാറ്റങ്ങൾ പ്രകടമാകുക. 2026 നവംബർ മുതൽ 2027 മാർച്ച് വരെ എൽ നിനോ തുടരാൻ 96 ശതമാനം സാധ്യതയുള്ളതായാണ് കാലാവസ്ഥാ കേന്ദ്രത്തിന്റെ റിപ്പോർട്ട്.

ഭൂമധ്യരേഖാ പ്രദേശത്തെ പസഫിക് സമുദ്രത്തിലെ ജലനിരപ്പിലുണ്ടാകുന്ന താപനിലയിലെ വർധനവാണ് എൽ നിനോ. ഇത് ലോകമെമ്പാടുമുള്ള കാലാവസ്ഥാ പാറ്റേണുകളെയും മഴയെയും താപനിലയെയും വലിയ തോതിൽ സ്വാധീനിക്കുന്നു. ഈ വർഷം ഒക്ടോബർ, നവംബർ മാസങ്ങളിൽ സമുദ്രോപരിതലത്തിലെ താപനിലയിൽ വലിയ വർധനവാണ് രേഖപ്പെടുത്തിയത്. ഇത് ശക്തമായ എൽ നിനോ പ്രതിഭാസത്തിന് വഴിവെക്കുന്നു.

യുഎഇയിൽ എന്ത് മാറ്റങ്ങൾ പ്രതീക്ഷിക്കാം?

• ഉയർന്ന താപനില: സാധാരണ ലഭിക്കുന്നതിനേക്കാൾ കൂടുതൽ ചൂട് ഈ മാസങ്ങളിൽ അനുഭവപ്പെടാം.
• മഴയിൽ വർധന: പ്രത്യേകിച്ചും 2027 ജനുവരി മുതലുള്ള മാസങ്ങളിൽ സാധാരണയേക്കാൾ കൂടുതൽ മഴ ലഭിക്കാൻ സാധ്യതയുണ്ട്.
• ശ്രദ്ധിക്കുക: എന്നാൽ ഈ മുന്നറിയിപ്പ് അർത്ഥമാക്കുന്നത് തീർച്ചയായും വലിയ മഴയോ വെള്ളപ്പൊക്കമോ ഉണ്ടാകും എന്നല്ല. പ്രാദേശികമായ മറ്റ് കാലാവസ്ഥാ വ്യതിയാനങ്ങളെ ആശ്രയിച്ചായിരിക്കും യഥാർത്ഥ മഴയുടെ അളവും തീവ്രതയും തീരുമാനിക്കപ്പെടുക.

കഴിഞ്ഞ കുറച്ചു കാലങ്ങളായി അനുഭവപ്പെട്ടിരുന്ന ‘ലാ നിന’ (La Niña) അവസ്ഥയിൽ നിന്ന് യുഎഇ ഇപ്പോൾ ‘എൽ നിനോ’യിലേക്ക് മാറിക്കൊണ്ടിരിക്കുകയാണ്. വരാനിരിക്കുന്ന ശൈത്യകാലത്തും വസന്തകാലത്തും കാലാവസ്ഥയിൽ കാര്യമായ മാറ്റങ്ങൾ പ്രതീക്ഷിക്കാമെന്ന് കാലാവസ്ഥാ കേന്ദ്രം അറിയിച്ചു. കാലാവസ്ഥയിലെ ഈ മാറ്റങ്ങൾ മുൻകൂട്ടി കണ്ട് യാത്രകളും മറ്റും പ്ലാൻ ചെയ്യണമെന്ന് താമസക്കാർക്ക് നിർദ്ദേശമുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t