Dubai new vehicle registrations; ഈ വർഷത്തെ ആദ്യ ആറുമാസത്തിനിടെ ദുബായിൽ രജിസ്റ്റർ ചെയ്തത് 1,96,000-ലധികം പുതിയ വാഹനങ്ങൾ. പ്രതിദിനം ശരാശരി ആയിരത്തിലധികം പുതിയ വാഹനങ്ങളാണ് എമിറേറ്റിലെ നിരത്തുകളിലേക്ക് പുതുതായി എത്തിയത്. ജനസംഖ്യാ വർധനവ്, നഗരവികസനം, സാമ്പത്തിക വളർച്ച എന്നിവയാണ് വാഹനങ്ങളുടെയും അനുബന്ധ ഗതാഗത സേവനങ്ങളുടെയും ആവശ്യകത വർധിക്കാൻ കാരണമെന്ന് റോഡ്സ് ആൻഡ് ട്രാൻസ്‌പോർട്ട് അതോറിറ്റി (RTA) വ്യക്തമാക്കി. ജനുവരി മുതൽ ജൂൺ വരെയുള്ള കാലയളവിൽ ആകെ 1,96,042 വാഹനങ്ങളാണ് ആദ്യമായി രജിസ്റ്റർ ചെയ്തത്. അതായത് പ്രതിമാസം ശരാശരി 32,000-ലധികം വാഹനങ്ങൾ രജിസ്റ്റർ ചെയ്യപ്പെടുന്നുണ്ട്. എമിറേറ്റിലെ ജനസംഖ്യാ-സാമ്പത്തിക വളർച്ചയാണ് വാഹന രജിസ്ട്രേഷൻ, ഇൻസ്പെക്ഷൻ സേവനങ്ങളുടെ ആവശ്യകത ഇത്രയധികം ഉയരാൻ കാരണമെന്ന് ആർ.ടി.എ ലൈസൻസിങ് ഏജൻസി സി.ഇ.ഒ അഹമ്മദ് മഹ്ബൂബ് പറഞ്ഞു. വർധിച്ചുവരുന്ന ഈ ആവശ്യം മുൻനിർത്തി സേവനങ്ങൾ കൂടുതൽ കാര്യക്ഷമമാക്കാനും നടപടികൾ വേഗത്തിലാക്കാനും ആധുനിക സാങ്കേതികവിദ്യകളും സ്മാർട്ട് സംവിധാനങ്ങളും ആർ.ടി.എ വിജയകരമായി നടപ്പിലാക്കിവരികയാണെന്നും അദ്ദേഹം വ്യക്തമാക്കി. ബന്ധപ്പെട്ട അധികാരികളുമായുള്ള ഇലക്ട്രോണിക് ഡാറ്റാ കൈമാറ്റം, വിവരങ്ങളുടെ സ്മാർട്ട് പരിശോധന, അത്യാധുനിക സാങ്കേതിക ഉപകരണങ്ങൾ എന്നിവയാണ് ഇതിനായി ഉപയോഗിക്കുന്നത്. ഒപ്പം ഇലക്ട്രിക് വാഹനങ്ങൾക്കായുള്ള പ്രത്യേക പരിശോധനാ മാനദണ്ഡങ്ങളും ഏർപ്പെടുത്തിയിട്ടുണ്ട്. നിർമ്മിത ബുദ്ധിയും (AI) മെഷീൻ ലേണിംഗും പ്രവർത്തനങ്ങളിൽ സംയോജിപ്പിച്ചതോടെ നടപടികൾ കൂടുതൽ കൃത്യതയുള്ളതായി. ആർ.ടി.എ വെബ്‌സൈറ്റും മൊബൈൽ ആപ്ലിക്കേഷനും വഴിയുള്ള സേവനങ്ങൾ ഇടപാടുകാർക്ക് കൂടുതൽ വേഗതയേറിയതും തൃപ്തികരവുമായ അനുഭവം നൽകുന്നതായും അദ്ദേഹം കൂട്ടിച്ചേർത്തു.

നിലവിൽ ദുബായിൽ 30 വാഹന പരിശോധനാ കേന്ദ്രങ്ങളാണ് പ്രവർത്തിക്കുന്നത്. വർധിച്ചുവരുന്ന ആവശ്യകത പരിഗണിച്ച് 2030-ഓടെ ഇവയുടെ എണ്ണം 35 ആയി ഉയർത്താനാണ് ആർ.ടി.എ ലക്ഷ്യമിടുന്നത്. നഗരവളർച്ചയ്ക്ക് പിന്തുണ നൽകാനും പ്രവർത്തനക്ഷമത വർധിപ്പിക്കാനും ഇത് സഹായിക്കും. പരിശോധനാ നടപടികൾ ഏകോപിപ്പിക്കുന്നതിനും മേൽനോട്ടം ശക്തിപ്പെടുത്തുന്നതിനുമായി കേന്ദ്രീകൃത ടെക്നിക്കൽ ഇൻസ്പെക്ഷൻ സംവിധാനവും സ്മാർട്ട് മോണിറ്ററിംഗ് സെന്ററും ആർ.ടി.എ സജ്ജമാക്കിയിട്ടുണ്ട്. മറ്റൊരു പ്രധാന പദ്ധതിയുടെ ഭാഗമായി, അൽ സത്വ റൗണ്ട്എബൗട്ടിനെ ട്രാഫിക് സിഗ്നൽ ജംഗ്ഷനാക്കി മാറ്റുന്ന പ്രവൃത്തികൾ ആർ.ടി.എ പൂർത്തിയാക്കി. അനുബന്ധ റോഡുകളുടെ നവീകരണവും ഇതോടൊപ്പം നടപ്പാക്കിയിട്ടുണ്ട്. തിരക്കേറിയ സമയങ്ങളിൽ യാത്രാസമയം 50 ശതമാനവും, കാത്തിരിപ്പും ബ്ലോക്കുകളും 60 ശതമാനം വരെയും കുറയ്ക്കാൻ ഈ മാറ്റത്തിലൂടെ സാധിക്കും. കാൽനടയാത്രക്കാരുടെയും വാഹനയാത്രക്കാരുടെയും സുരക്ഷ ഉറപ്പാക്കാനും ഗതാഗതം സുഗമമാക്കാനും ഈ നവീകരണം വഴിയൊരുക്കും. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t