Dubai shared accommodation; ദുബായിലെ 44-ലധികം മേഖലകളിലെ കെട്ടിടങ്ങളിലും വില്ലകളിലും ഷെയറിങ് അടിസ്ഥാനത്തിൽ താമസിക്കാൻ അനുമതി നൽകി ദുബായ് മുനിസിപ്പാലിറ്റി പുതിയ സർക്കുലർ പുറത്തിറക്കി. അൽ സൂഖ് അൽ കബീർ, അൽ റാസ്, അൽ വർഖ 1, അൽ ബർഷ 1, അൽ മുറഖബാത്, അൽ റിഗ്ഗ തുടങ്ങിയ പ്രദേശങ്ങളിലാണ് ഇളവ് അനുവദിച്ചിട്ടുള്ളത്. അതേസമയം ബനിയാസ് റോഡ്, ഷെയ്ഖ് സായിദ് റോഡ്, ജുമൈറ റോഡ്, അൽ വസൽ റോഡ് തുടങ്ങിയ പ്രധാന മേഖലകൾ കുടുംബങ്ങൾക്ക് മാത്രമുള്ള (ഫാമിലി ഒൺലി) ഷെയറിങ് താമസ കേന്ദ്രങ്ങളായാണ് നിശ്ചയിച്ചിരിക്കുന്നത്. പുതിയ മാർഗനിർദേശങ്ങൾ പ്രകാരം ഷെയറിങ് താമസ സൗകര്യങ്ങളെ കുടുംബങ്ങൾക്കായുള്ളവയെന്നും വ്യക്തികൾക്കായുള്ളവയെന്നും രണ്ട് വിഭാഗങ്ങളായി തിരിച്ചിട്ടുണ്ട്. ഒരേ റെസിഡൻഷ്യൽ യൂണിറ്റിൽ കുടുംബങ്ങളെയും അവിവാഹിതരായ വ്യക്തികളെയും ഒന്നിച്ച് താമസിപ്പിക്കാൻ പാടില്ലെന്നും, ഏതെങ്കിലും ഒരു വിഭാഗത്തിന് മാത്രമേ ഒരു യൂണിറ്റ് അനുവദിക്കാവൂ എന്നും ചട്ടത്തിൽ വ്യക്തമാക്കുന്നു. കിടപ്പുമുറിയിൽ ഒരാൾക്ക് കുറഞ്ഞത് 5 ചതുരശ്ര മീറ്റർ വിസ്തീർണം നിർബന്ധമാണ്. കുടുംബങ്ങൾ താമസിക്കുന്ന യൂണിറ്റുകളിൽ ഓരോ കുടുംബത്തിനും അറ്റാച്ച്ഡ് ബാത്ത്റൂമോടുകൂടിയ പ്രത്യേക കിടപ്പുമുറി നൽകണം. കൂടാതെ, താമസക്കാരുടെ എണ്ണത്തിനനുസരിച്ച് അടുക്കള, ശുചിമുറികൾ, ഭക്ഷണമുറി, അലക്കാനും തുണികൾ ഉണക്കാനുമുള്ള സൗകര്യങ്ങൾ, വിനോദത്തിനുള്ള ഇടം എന്നിവയും ഏർപ്പെടുത്തേണ്ടതുണ്ട്.

പെർമിറ്റുകൾ, വാടക വ്യവസ്ഥകൾ, സുരക്ഷാ മാനദണ്ഡങ്ങൾ എന്നിവ സംബന്ധിച്ച് ഈ വർഷം ഫെബ്രുവരിയിൽ പുറപ്പെടുവിച്ച നിയമപ്രകാരം, വ്യവസ്ഥകൾ ലംഘിക്കുന്നവർക്ക് 500 ദിർഹം മുതൽ 5,00,000 ദിർഹം വരെ പിഴ ചുമത്തും. നഗരത്തിലെ അനിയന്ത്രിതമായ തിരക്കും അനധികൃത താമസരീതികളും നിയന്ത്രിക്കുന്നതിനും, താമസക്കാരുടെ സുരക്ഷയും ജീവിതനിലവാരവും ഉറപ്പുവരുത്തുന്നതിനുമാണ് മുൻസിപ്പാലിറ്റിയുടെ ഈ നീക്കം. നിലവിൽ ഷെയറിങ് താമസത്തിനായി ഉപയോഗിക്കുന്ന കെട്ടിടങ്ങളെ പുതിയ ചട്ടങ്ങൾക്ക് അനുസൃതമായി മാറ്റിയെടുക്കുന്നതിന് കെട്ടിട ഉടമകൾക്കും റിയൽ എസ്റ്റേറ്റ് കമ്പനികൾക്കും സെപ്റ്റംബർ 8 മുതൽ ഒരു വർഷത്തെ സാവകാശം (ഗ്രേസ് പിരീഡ്) അനുവദിച്ചിട്ടുണ്ട്. എന്നാൽ, പൊതുസുരക്ഷയ്ക്ക് ഭീഷണിയാകുന്ന ഗുരുതര നിയമലംഘനങ്ങൾക്കോ അനധികൃത കെട്ടിട മാറ്റങ്ങൾക്കോ ഈ സാവകാശം ബാധകമല്ലെന്നും അവ ഉടൻ തന്നെ പരിഹരിക്കണമെന്നും മുനിസിപ്പാലിറ്റി വ്യക്തമാക്കി. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t