അന്താരാഷ്ട്ര തലത്തിൽ പ്രവർത്തിക്കുന്ന ലഹരിമരുന്ന് ശൃംഖലയ്ക്കെതിരെ ശക്തമായ നടപടി സ്വീകരിച്ച് ദുബായ് പൊലീസ്. 11.51 കോടി ദിർഹം വിപണിമൂല്യം കണക്കാക്കുന്ന 2,323 കിലോഗ്രാം ലഹരിമരുന്ന് ഗുളികകളും വിവിധ തരത്തിലുള്ള മനോരോഗ നിവാരണ മരുന്നുകളും പിടിച്ചെടുത്തു. സംഭവത്തിൽ ഏഷ്യൻ രാജ്യങ്ങളിൽ നിന്നുള്ള 14 പേരെ അറസ്റ്റ് ചെയ്തു. വിദേശത്ത് പ്രവർത്തിക്കുന്ന അന്താരാഷ്ട്ര ക്രിമിനൽ സംഘങ്ങളുമായി അറസ്റ്റിലായവർക്ക് നേരിട്ട് ബന്ധമുണ്ടെന്നാണ് അന്വേഷണത്തിൽ കണ്ടെത്തിയത്. ദുരുപയോഗത്തിന് സാധ്യതയുള്ള സനാക്സ്, ട്രമഡോൾ, ലിറിക്ക തുടങ്ങിയ പ്രിസ്ക്രിപ്ഷൻ മരുന്നുകളുടെ വൻ ശേഖരവും പിടിച്ചെടുത്തവയിൽ ഉൾപ്പെടുന്നു.

ഇതിന് പുറമെ ആൽക്കൺ മൈഡ്രിയാസിൽ ഐ ഡ്രോപ്സ്, ക്രിസ്റ്റൽ മെത്ത്, കഞ്ചാവ്, ലഹരിമരുന്ന് ലായനിയിൽ മുക്കിയ കടലാസുകൾ എന്നിവയും പൊലീസ് കണ്ടെത്തി. 113 കാർട്ടൺ പെട്ടികളിലായാണ് വിവിധ തരത്തിലുള്ള ലഹരിവസ്തുക്കൾ ഒളിപ്പിച്ചിരുന്നത്. യുഎഇയുടെ വിവിധ ഭാഗങ്ങളിലേക്ക് വൻതോതിൽ ലഹരിമരുന്ന് എത്തിക്കാൻ സംഘം പദ്ധതിയിട്ടിരുന്നതായാണ് പൊലീസ് നിഗമനം. രാജ്യത്തിനുള്ളിൽ വലിയ തോതിൽ ലഹരി വിതരണം ചെയ്യാൻ സംഘം തയ്യാറെടുക്കുന്നതായി ജനറൽ ഡിപ്പാർട്ട്‌മെന്റ് ഓഫ് ആന്റി നാർക്കോട്ടിക്‌സിന് ലഭിച്ച രഹസ്യവിവരമാണ് അന്വേഷണത്തിന് തുടക്കമിട്ടത്. തുടർന്ന് പ്രത്യേക അന്വേഷണസംഘം പ്രതികളെ നിരീക്ഷണത്തിലാക്കി. ഓരോരുത്തരുടെയും പങ്കും ശൃംഖലയുടെ പ്രവർത്തനരീതിയും സംബന്ധിച്ച് വിവരങ്ങൾ ശേഖരിച്ച ശേഷമാണ് പൊലീസ് നിർണായക നീക്കം നടത്തിയത്.

കൃത്യമായി ആസൂത്രണം ചെയ്ത ഓപ്പറേഷനിലൂടെ ഒരേസമയം നടത്തിയ റെയ്ഡിലാണ് 14 പ്രതികളെയും പിടികൂടിയത്. രക്ഷപ്പെടാനുള്ള അവസരം നൽകാതെയാണ് പൊലീസ് സംഘം നടപടിയെടുത്തത്.
അറസ്റ്റിലായവർക്കെതിരെ നിയമനടപടികൾ ആരംഭിച്ചതായും തുടർ നടപടികൾക്കായി ഇവരെ പബ്ലിക് പ്രോസിക്യൂഷന് കൈമാറുമെന്നും അധികൃതർ അറിയിച്ചു. യുവാക്കളെയും സമൂഹത്തെയും ലഹരിമരുന്നിന്റെ പിടിയിൽ നിന്ന് സംരക്ഷിക്കുന്നതിന് ശക്തമായ നടപടികൾ തുടരുമെന്നും പൊതുസുരക്ഷയ്ക്ക് ഭീഷണിയാകുന്ന ലഹരി വ്യാപാരികളോട് യാതൊരു വിട്ടുവീഴ്ചയും ഉണ്ടാകില്ലെന്നും ദുബായ് പൊലീസ് വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t