Dubai fuel prices; ഒക്ടോബർ മാസത്തെ ഇന്ധന വില വർധന പ്രഖ്യാപിച്ചതിന് പിന്നാലെ ദുബായിലെ പെട്രോൾ പമ്പുകളിൽ വൻ തിരക്ക്. പുതിയ നിരക്കുകൾ നിലവിൽ വരുന്നതിന് മുൻപ് വാഹനങ്ങളുടെ ടാങ്ക് ഫുൾ ചെയ്യാനുള്ള നെട്ടോട്ടത്തിലായിരുന്നു ഡ്രൈവർമാർ. ബുധനാഴ്ച രാവിലെ തന്നെ പല പമ്പുകളിലും 20 മിനിറ്റിലധികം കാത്തുനിൽക്കേണ്ടി വന്നതായി വാഹനയാത്രക്കാർ പറഞ്ഞു. ജോലി സമയത്തെ ഇടവേളകളിൽ എത്തിയവരും, സായാഹ്നങ്ങളിലെ വൻ തിരക്ക് ഒഴിവാക്കാൻ യാത്രയ്ക്കിടയിൽ പമ്പുകളിൽ കയറിയവരുമാണ് കൂടുതലും. അൽ ഗർഹൂദ്, ബിസിനസ് ബേ, അൽ ഖൈൽ റോഡ്, അൽ ഖോസ് എന്നിവിടങ്ങളിലെ പെട്രോൾ പമ്പുകളിൽ രാവിലെ 11 മണിയോടെ തന്നെ 20 മുതൽ 25 മിനിറ്റ് വരെയാണ് ആളുകൾ വരിയിൽ കാത്തുനിന്നത്. വില വർധന സംബന്ധിച്ച പ്രഖ്യാപനം വന്നതിന് തൊട്ടുപിന്നാലെ, അതായത് രാവിലെ 10:30-ഓടെ തന്നെ പമ്പുകളിൽ വരികൾ രൂപപ്പെട്ടുതുടങ്ങിയതായി ജീവനക്കാർ പറഞ്ഞു.വാർത്ത അറിഞ്ഞ ഉടൻ തന്നെ പലരും പതിവ് കാര്യങ്ങൾ മാറ്റിവെച്ച് വാഹനം ഫുൾ ചെയ്യാൻ എത്തുകയായിരുന്നു. ഇന്ധന വില മുൻകൂട്ടി അടയ്ക്കുന്നത് വഴി തങ്ങൾക്ക് ഏകദേശം 80 ദിർഹം വരെ ലാഭിക്കാൻ കഴിയുമെന്നാണ് ചിലർ കണക്കുകൂട്ടുന്നത്.

ബിസിനസ് ബേയിലെ ഒരു പെട്രോൾ പമ്പിൽ എത്തിയ അമർ അൽ ഫൂർ എന്നയാൾ, ഓഫീസിൽ നിന്ന് ചെറിയൊരു ഇടവേള എടുത്താണ് കാറിൽ പെട്രോൾ അടിക്കാൻ എത്തിയത്. വില വർധനയെക്കുറിച്ചുള്ള വാർത്ത അറിഞ്ഞയുടൻ തന്നെ കാറിന്റെ ടാങ്ക് ഫുൾ ചെയ്യാൻ ഞാൻ തീരുമാനിച്ചു. വൈകുന്നേരമാകുമ്പോൾ പമ്പുകളിൽ വലിയ തിരക്കായിരിക്കുമെന്ന് അറിയാമായിരുന്നു, അദ്ദേഹം പറഞ്ഞു. ഇത്തരത്തിൽ ജോലിയിൽ നിന്ന് സമയം കണ്ടെത്തി പമ്പുകളിലെത്തിയവർ നിരവഡിയാണ്. പുതിയ വില നിലവിൽ വരുന്നതിന് മുൻപ് കുറച്ചു പണം ലാഭിക്കാൻ പലരും തങ്ങളുടെ സാധാരണ ദിനചര്യകളിൽ മാറ്റം വരുത്തി. മറ്റൊരു ഡ്രൈവറായ സൽമാൻ, പമ്പുകളിലെ നീണ്ട വരി കണ്ടാണ് കാര്യം തിരക്കിയത്. വില വർധനയുടെ പ്രഖ്യാപനം ഞാൻ കണ്ടിരുന്നില്ല. രാവിലെ പമ്പിൽ ഇത്രയധികം കാറുകൾ കിടക്കുന്നത് കണ്ട് ഞാൻ അത്ഭുതപ്പെട്ടുപോയി, അദ്ദേഹം പറഞ്ഞു. അന്നേദിവസം മാസാവസാനമാണെന്ന് ഓർമ്മവന്ന അദ്ദേഹം ഓൺലൈനിൽ ഇന്ധന വില പരിശോധിച്ചു. വില വർധിച്ചതായി അറിഞ്ഞപ്പോഴാണ് മറ്റ്‌ വാഹനയാത്രക്കാർ എന്തിനാണ് വരിനിൽക്കുന്നതെന്ന് എനിക്ക് മനസ്സിലായത്. ഞാൻ ഉടൻ തന്നെ അടുത്തുള്ള പമ്പിലേക്ക് വണ്ടി ഓടിച്ചു, സൽമാൻ വ്യക്തമാക്കി.അതേസമയം, ഏതാനും ദിവസങ്ങൾക്ക് മുൻപ് മാത്രം തന്റെ എസ്‌യുവിയുടെ (SUV) ടാങ്ക് ഫുൾ ചെയ്തതാണെങ്കിലും ജോലിക്കിടയിൽ പമ്പിൽ കയറാൻ ദുബായ് താമസക്കാരിയായ ആനി വർഗീസ് തയ്യാറായി.

എണ്ണവില ഈ ആഴ്ച ബാരലിന് 100 ഡോളറിന് മുകളിലേക്ക് ഉയരുന്ന സാഹചര്യത്തിൽ ഇന്ധനവില കൂടുമെന്ന് ഞാൻ പ്രതീക്ഷിച്ചിരുന്നു. എങ്കിലും ആ പ്രഖ്യാപനം വലിയൊരു ആഘാതമായി. എന്റെ എസ്‌യുവിയുടെ ടാങ്ക് ഒഴിഞ്ഞിരുന്നില്ല, കഴിഞ്ഞ ഞായറാഴ്ചയാണ് ഞാൻ ഫുൾ ചെയ്തത്. എങ്കിലും ഈ സാഹചര്യത്തിൽ ഓരോ ദിർഹത്തിനും വലിയ വിലയുണ്ട്. ഇന്ന് സ്പെഷ്യൽ 95 പെട്രോൾ 18 ലിറ്ററിന് ഞാൻ 67 ദിർഹം നൽകി. എന്നാൽ അടുത്ത ആഴ്ചയോടെ ഇതിന് 77 ദിർഹം നൽകേണ്ടിവരും, അവർ പറഞ്ഞു. പച്ചക്കറി കടകളിലും മറ്റും വൻ തിരക്ക് അനുഭവപ്പെടുന്നുണ്ടെങ്കിലും, താൻ എത്തിയ ഉൾപ്രദേശത്തെ പമ്പിൽ തിരക്ക് കുറവായതിനാൽ 10 മിനിറ്റിനുള്ളിൽ കാര്യങ്ങൾ കഴിഞ്ഞതായി ആനി പറഞ്ഞു. ഹൈവേയിലെ മറ്റ് പമ്പുകളിൽ വൻ തിരക്കാണെന്ന് കണ്ടതായും ഈ ദിവസങ്ങളിൽ പെട്രോൾ അടിക്കുന്നത് തന്നെയാണ് ബുദ്ധിപരമായ കാര്യമെന്നും അവർ കൂട്ടിച്ചേർത്തു. പുതിയ വിലക്കയറ്റം കണ്ടു സഹപ്രവർത്തകരിലും വലിയ പ്രതികരണമാണുണ്ടായത്. ഈ മാസം കൂടുതൽ ദിവസങ്ങളിൽ വർക്ക് ഫ്രം ഹോം അനുവദിക്കുമോ എന്ന ആലോചനയിലാണ് ചിലർ, മറ്റുചിലരാകട്ടെ പൊതുഗതാഗത സംവിധാനങ്ങളിലേക്ക് മാറുന്നതിനെക്കുറിച്ചും ചിന്തിക്കുന്നുണ്ട്.

വാഹനം ഉപയോഗിക്കുന്ന ഇന്ധനത്തിന്റെ അളവും ഗ്രേഡും അനുസരിച്ചാണ് ലാഭം വ്യത്യാസപ്പെടുന്നത്. ടാങ്കിൽ കുറച്ചു പെട്രോൾ ബാക്കിയുള്ളപ്പോൾ അടിക്കുന്നതിനേക്കാൾ കൂടുതൽ തുക ടാങ്ക് തീർന്ന അവസ്ഥയിൽ അടിക്കുമ്പോൾ ലാഭിക്കാം. ആളുകൾ ആവശ്യപ്പെടുന്ന ഇന്ധനത്തിന്റെ അളവ് അനുസരിച്ച് ലാഭ തുകയിലും വ്യത്യാസമുണ്ടാകും. പെട്രോൾ പമ്പുകളിൽ ടൂറിസം കമ്പനികളുടെ വാഹനങ്ങളും വരിവരിയായി നിൽക്കുന്നുണ്ടായിരുന്നു. കമ്പനിയുടെ മുഴുവൻ വാഹനങ്ങളിലും കൂടി ഇന്ധനം അടിക്കുന്നത് വഴി 3,000 ദിർഹത്തിലധികം ലാഭിക്കാൻ കഴിയുമെന്ന് ഒരു കമ്പനി ഡ്രൈവർ പറഞ്ഞു. ഞങ്ങളുടെ കമ്പനിയിൽ ഏകദേശം 60 കാറുകളുണ്ട്. ഇന്നത്തെ ദിവസത്തിന് മുൻപ് തന്നെ അവയുടെയെല്ലാം ടാങ്ക് ഫുൾ ചെയ്യണം. ചില കാറുകൾ ബുക്ക് ചെയ്തിട്ടുണ്ട്, നിലവിൽ പാർക്ക് ചെയ്തിരിക്കുന്ന കാറുകളിലാണ് ഞങ്ങൾ പെട്രോൾ അടിക്കുന്നത്. ഒരു വാഹനത്തിന് ഏകദേശം 55 മുതൽ 60 ദിർഹം വരെ ലാഭിക്കാൻ സാധിക്കും. ഞങ്ങളുടെ മുഴുവൻ വാഹനങ്ങളുടെ കാര്യമെടുത്താൽ 3,000 ദിർഹത്തിലേറെ ലാഭം ലഭിച്ചേക്കാം, അദ്ദേഹം കൂട്ടിച്ചേർത്തു. ഈ സമയങ്ങളിൽ പമ്പുകളിൽ സാധാരണ തിരക്ക് ഉണ്ടാകാറുണ്ടെങ്കിലും ഇങ്ങനെ കാറുകൾ നീണ്ട നിരയായി നിൽക്കാറില്ലെന്ന് ജീവനക്കാർ പറയുന്നു. ഇന്ധന വില വർധനവ് കാരണം മാത്രമാണ് ഈ തിരക്ക്. രാവിലെ 10:30-ഓടെ തന്നെ ആളുകൾ എത്തിത്തുടങ്ങിയിരുന്നു. വൈകുന്നേരം 4 മണിക്ക് ശേഷം ഇതിലും കൂടുതൽ ആളുകൾ എത്തുമെന്നാണ് ഞങ്ങൾ പ്രതീക്ഷിക്കുന്നത്, അൽ ഖോസിലെ ഒരു പെട്രോൾ പമ്പ് ജീവനക്കാരൻ പറഞ്ഞു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t