ഇറാൻ–യുഎസ് യുദ്ധം തുടരുന്നതിനിടെ സംഘർഷം അവസാനിപ്പിക്കാനുള്ള നയതന്ത്ര നീക്കങ്ങൾ ശക്തമാകുന്നു. യുഎൻ ജനറൽ അസംബ്ലിയുടെ പശ്ചാത്തലത്തിൽ ന്യൂയോർക്കിൽ യുഎസ്, ഇറാൻ പ്രതിനിധികൾ ഇടനിലക്കാരുടെ സഹായത്തോടെ മണിക്കൂറുകളോളം ചർച്ച നടത്തി. യുഎസ് പ്രത്യേക ദൂതൻ സ്റ്റീവ് വിറ്റ്കോഫും ജാരഡ് കുഷ്നറും അമേരിക്കൻ ഭാഗത്തെ പ്രതിനിധീകരിച്ചപ്പോൾ ഇറാൻ വിദേശകാര്യ മന്ത്രി അബ്ബാസ് അറാഖ്ചിയുമായി ചർച്ച നടന്നതായി റിപ്പോർട്ടുകളുണ്ട്. ചർച്ചയിൽ യുദ്ധം അവസാനിപ്പിക്കുന്നതിനും ഹോർമുസ് കടലിടുക്ക് വീണ്ടും തുറക്കുന്നതിനുമുള്ള നിബന്ധനകൾ പ്രധാന വിഷയമായെന്നാണ് വിവരം. അമേരിക്ക നാവിക ഉപരോധം പിൻവലിക്കുകയും മരവിപ്പിച്ച ഇറാനിയൻ ആസ്തികൾ വിട്ടുനൽകുകയും ചെയ്താൽ ഹോർമുസ് കടലിടുക്ക് ഏഴ് ദിവസത്തിനുള്ളിൽ തുറക്കാൻ കഴിയുമെന്ന് ഇറാൻ വ്യക്തമാക്കിയിട്ടുണ്ട്.

അതേസമയം, ചർച്ചകളിൽ കാര്യമായ ധാരണയിലെത്തിയിട്ടില്ലെന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്. കൂടുതൽ ചർച്ചകൾ തുടരുമെന്നാണ് ഇരുപക്ഷത്തുനിന്നും ലഭിക്കുന്ന സൂചന. യുഎസ് പ്രസിഡന്റ് ഡോണൾഡ് ട്രംപ് ചർച്ചകൾ തുടരുകയാണെന്നും ഒടുവിൽ ധാരണയിലെത്താൻ കഴിയുമെന്ന് പ്രതീക്ഷിക്കുന്നതായും പറഞ്ഞു. യുഎൻ പ്രസംഗത്തിനിടെ ട്രംപ് ഇറാനുമായി കരാർ ഉണ്ടാകാത്ത പക്ഷം സൈനിക നടപടി ശക്തമാക്കുമെന്ന കടുത്ത മുന്നറിയിപ്പും നൽകി. മറുപടിയായി കൂടുതൽ ആക്രമണമുണ്ടായാൽ ശക്തമായ തിരിച്ചടി നൽകാൻ തയ്യാറാണെന്ന് ഇറാൻ സൈനിക നേതൃത്വം വ്യക്തമാക്കിയിട്ടുണ്ട്.

സംഘർഷത്തിന്റെ പ്രധാന പ്രത്യാഘാതം ഹോർമുസ് കടലിടുക്കിലെ കപ്പൽ ഗതാഗതത്തിലും തുടരുകയാണ്. സെപ്റ്റംബർ 21ന് കടലിടുക്ക് കടന്ന ചരക്ക് കപ്പലുകളുടെ എണ്ണം വെറും രണ്ടായി കുറഞ്ഞതായി റോയിട്ടേഴ്സ് റിപ്പോർട്ട് ചെയ്തു. സംഘർഷത്തിന് മുമ്പ് പ്രതിദിനം ശരാശരി 125 വലിയ വാണിജ്യ കപ്പലുകളാണ് ഈ പാതയിലൂടെ കടന്നുപോയിരുന്നത്. അതിനിടെ, ഹോർമുസിലെ കപ്പൽ ഗതാഗതം സാധാരണ നിലയിലാക്കാനുള്ള ശ്രമങ്ങളിൽ ഖത്തർ, ഒമാൻ തുടങ്ങിയ രാജ്യങ്ങളും നയതന്ത്ര ഇടപെടലുകൾ നടത്തുകയാണ്. ഗൾഫ് മേഖലയിലെ സംഘർഷം കുറയ്ക്കുന്നതിനും സ്വതന്ത്ര കപ്പൽ ഗതാഗതം ഉറപ്പാക്കുന്നതിനുമാണ് പ്രധാനമായും ശ്രമങ്ങൾ.