UAE unified banking digital platform; ഉപഭോക്താക്കളുടെ വ്യക്തിഗത വിവരങ്ങളും രേഖകളും സ്വയമേവ അപ്‌ഡേറ്റ് ചെയ്യാൻ സഹായിക്കുന്ന ഏകീകൃത ഡിജിറ്റൽ പ്ലാറ്റ്‌ഫോം നിർമ്മിക്കാൻ യുഎഇ ബാങ്കിംഗ് മേഖല തയ്യാറെടുക്കുന്നു. ഇടപാട് നടത്തുന്ന ഓരോ ബാങ്കുകളിലും മറ്റ് സ്ഥാപനങ്ങളിലും ഉപഭോക്താക്കൾ ഒരേ രേഖകൾ മാറിമാറി സമർപ്പിക്കേണ്ടി വരുന്ന ബുദ്ധിമുട്ട് ഇതുവഴി ഒഴിവാകും. ഈ വർഷം അവസാനത്തിന് മുമ്പ് പ്ലാറ്റ്‌ഫോം പ്രവർത്തന സജ്ജമാകുമെന്ന് യുഎഇ ബാങ്ക്സ് ഫെഡറേഷൻ (UBF) ഡയറക്ടർ ജനറൽ ജമാൽ സലേഹ് വ്യക്തമാക്കി. ഔദ്യോഗിക വിവരങ്ങൾ സൂക്ഷിക്കുന്ന അധികാരികളിൽ നിന്ന് നേരിട്ട് ഈ സംവിധാനം വിവരങ്ങൾ ശേഖരിക്കും. ‘സീംലെസ് മിഡിൽ ഈസ്റ്റ്’ പരിപാടിയുടെ ഭാഗമായി സംസാരിക്കവെയാണ് അദ്ദേഹം ഇക്കാര്യം അറിയിച്ചത്. യുഎഇ സെൻട്രൽ ബാങ്കിന്റെ നേതൃത്വത്തിലും യുഎഇ ബാങ്ക്സ് ഫെഡറേഷന്റെയും മറ്റ് പങ്കാളികളുടെയും സഹകരണത്തോടെ നടപ്പിലാക്കുന്ന വിവിധ പദ്ധതികളിൽ ഒന്നാണിത്. രാജ്യത്തെ ഡിജിറ്റൽ ബാങ്കിംഗ് വ്യാപിപ്പിക്കുന്നതിനും സാമ്പത്തിക ഇൻഫ്രാസ്ട്രക്ചർ ശക്തിപ്പെടുത്തുന്നതിനുമാണ് ഈ നീക്കം. ഓരോ വിവരങ്ങളും അവയുടെ ആധികാരിക സ്രോതസ്സുകളിൽ നിന്ന് നേരിട്ട് ലഭ്യമാക്കുന്ന ‘ഗോൾഡൻ സോഴ്സ്’ തത്വത്തെ അടിസ്ഥാനമാക്കിയാണ് പ്ലാറ്റ്‌ഫോം പ്രവർത്തിക്കുന്നത്. ഉപഭോക്താക്കളോട് വീണ്ടും വീണ്ടും രേഖകൾ ആവശ്യപ്പെടുന്നതിന് പകരം എമിറേറ്റ്‌സ് ഐഡി, പാസ്‌പോർട്ട് തുടങ്ങിയ വിവരങ്ങൾ ഔദ്യോഗിക സ്രോതസ്സുകളിൽ നിന്ന് ഇലക്ട്രോണിക് വഴി ശേഖരിക്കാനോ അപ്‌ഡേറ്റ് ചെയ്യാനോ ഇതിലൂടെ സാധിക്കും. രേഖകളുടെ കാലാവധി കഴിയുമ്പോഴോ പുതുക്കുമ്പോഴോ ഉള്ള ആവർത്തിച്ചുള്ള നടപടിക്രമങ്ങൾ ലഘുവാക്കുകയാണ് ഈ സംവിധാനത്തിലൂടെ ലക്ഷ്യമിടുന്നതെന്ന് ജമാൽ സലേഹ് പറഞ്ഞു. കൂടാതെ, നിരവധി സേവനങ്ങളുമായി ബന്ധപ്പെട്ട വിവരങ്ങൾ ഒറ്റയിടത്തുനിന്ന് തന്നെ ഉപഭോക്താക്കൾക്ക് ലഭ്യമാകും. രാജ്യത്തെ നൂതനമായ ഡിജിറ്റൽ ഇൻഫ്രാസ്ട്രക്ചറും ആർട്ടിഫിഷ്യൽ ഇന്റലിജൻസിലെ നിക്ഷേപവും സാമ്പത്തിക സേവനങ്ങൾ കൂടുതൽ ആധുനികവത്കരിക്കാൻ ശക്തമായ അടിത്തറ നൽകുന്നുണ്ടെന്നും അദ്ദേഹം കൂട്ടിച്ചേർത്തു. സേവനങ്ങളുടെ സുരക്ഷയും കാര്യക്ഷമതയും വർദ്ധിപ്പിച്ചുകൊണ്ട് ഡിജിറ്റൽ മാറ്റങ്ങൾ വേഗത്തിലാക്കാൻ ബാങ്കിംഗ് മേഖല ഈ സൗകര്യങ്ങൾ പരമാവധി ഉപയോഗപ്പെടുത്തണമെന്നും അദ്ദേഹം അഭിപ്രായപ്പെട്ടു. ഇതിനുപുറമെ, രാജ്യത്തെ ആദ്യ ദേശീയ പേയ്മെന്റ് കാർഡ് പദ്ധതിയായ ‘ജയ്വാൻ’ പോലുള്ള നിരവധി സുപ്രധാന പദ്ധതികളും സെൻട്രൽ ബാങ്കിന്റെ നേതൃത്വത്തിൽ പുരോഗമിക്കുകയാണെന്ന് അദ്ദേഹം വ്യക്തമാക്കി. ആഭ്യന്തര പണമിടപാടുകൾ കൂടുതൽ വേഗത്തിലാക്കാനും സുരക്ഷിതമാക്കാനും പുതിയ ഡിജിറ്റൽ സാമ്പത്തിക സ്‍കീമുകളിലൂടെ സാധിക്കുമെന്നാണ് വിലയിരുത്തപ്പെടുന്നത്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t