യുഎഇയിലേക്ക് ഇടയ്ക്കിടെ യാത്ര ചെയ്യുന്നവർക്ക് ഏറെ സൗകര്യപ്രദമായ അഞ്ചുവർഷത്തെ മൾട്ടിപ്പിൾ എൻട്രി ടൂറിസ്റ്റ് വീസ ലഭ്യമാണ്. ദുബൈ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA Dubai) നൽകുന്ന ഈ വീസ ഉപയോഗിച്ച് കാലാവധി കഴിയുന്നതുവരെ പലതവണ യുഎഇയിൽ പ്രവേശിക്കാം. ഓരോ യാത്രയ്ക്കും പ്രത്യേകം പുതിയ ടൂറിസ്റ്റ് വീസ എടുക്കേണ്ടതില്ല. ബിസിനസ് ആവശ്യങ്ങൾക്കും കുടുംബ സന്ദർശനങ്ങൾക്കും വിനോദയാത്രകൾക്കുമായി പതിവായി യുഎഇയിലെത്തുന്നവർക്ക് ഈ വീസ പ്രയോജനപ്പെടും. പ്രത്യേക സ്പോൺസറോ ഹോസ്റ്റോ ഇല്ലാതെയും യോഗ്യതാ മാനദണ്ഡങ്ങൾ പാലിക്കുന്നവർക്ക് അപേക്ഷിക്കാം.

ഒരു പ്രവേശനത്തിൽ 90 ദിവസം വരെ യുഎഇയിൽ തുടരാനാകും. ആവശ്യമായ നിബന്ധനകൾ പാലിച്ചാൽ 90 ദിവസം കൂടി താമസകാലാവധി നീട്ടാം. എന്നാൽ ഒരു വർഷത്തിനിടെ യുഎഇയിൽ ചെലവഴിക്കുന്ന ആകെ കാലയളവ് 180 ദിവസത്തിൽ കവിയാൻ പാടില്ല. വീസ അനുവദിച്ച തീയതി മുതൽ രണ്ട് മാസത്തിനുള്ളിൽ ആദ്യമായി യുഎഇയിൽ പ്രവേശിക്കണം. ആവശ്യമായ സാഹചര്യത്തിൽ ഈ പ്രവേശന കാലയളവ് രണ്ട് മാസം കൂടി നീട്ടാനുള്ള സൗകര്യവുമുണ്ട്. ആദ്യ പ്രവേശന തീയതി മുതലാണ് ഒരു വർഷത്തെ താമസപരിധി കണക്കാക്കുന്നത്.

വീസയ്ക്ക് വേണ്ട പ്രധാന രേഖകൾ

• കുറഞ്ഞത് ആറ് മാസത്തെ കാലാവധിയുള്ള പാസ്‌പോർട്ട്
• പുതിയ ഫോട്ടോ
• യുഎഇയിലെ താമസകാലയളവിലേക്കുള്ള ആരോഗ്യ ഇൻഷുറൻസ്
• മടക്കയാത്ര ഉൾപ്പെടെയുള്ള വിമാന ടിക്കറ്റ്
• കഴിഞ്ഞ ആറ് മാസത്തെ ബാങ്ക് സ്റ്റേറ്റ്‌മെന്റ്
• അപേക്ഷകന്റെ പേരിലുള്ള ബാങ്ക് അക്കൗണ്ടിൽ കുറഞ്ഞത് 4,000 യുഎസ് ഡോളർ (ഏകദേശം 14,690 ദിർഹം) ബാലൻസ് ഉണ്ടെന്നു തെളിയിക്കുന്ന രേഖ

അധിക രേഖകൾ ആവശ്യപ്പെട്ടാൽ അതിനനുസരിച്ചുള്ള അധിക ഫീസും ബാധകമാകാം. യുഎഇയ്ക്കുള്ളിൽനിന്ന് വീസ സ്റ്റാറ്റസ് മാറ്റി അപേക്ഷിക്കുന്നവർക്ക് അതിനുള്ള അധിക ഫീസും നൽകണം.

എങ്ങനെ അപേക്ഷിക്കാം?

GDRFAയുടെ വെബ്സൈറ്റ്, ഉപഭോക്തൃ സേവന കേന്ദ്രങ്ങൾ, ആമർ സർവീസ് സെന്ററുകൾ എന്നിവ വഴി അപേക്ഷ നൽകാം. വെബ്സൈറ്റിൽ UAE Pass ഉപയോഗിച്ചോ വ്യക്തിഗത അക്കൗണ്ട് വഴിയോ ലോഗിൻ ചെയ്ത് അഞ്ചുവർഷത്തെ ടൂറിസ്റ്റ് എൻട്രി പെർമിറ്റ് തിരഞ്ഞെടുക്കാം. തുടർന്ന് വ്യക്തിഗത, പാസ്‌പോർട്ട്, യാത്രാ വിവരങ്ങൾ നൽകി ആവശ്യമായ രേഖകൾ അപ്‌ലോഡ് ചെയ്ത് ഫീസ് അടച്ചാൽ അപേക്ഷ സമർപ്പിക്കാം. വീസ അനുവദിച്ചാൽ അപേക്ഷകന് SMS വഴി അറിയിപ്പ് ലഭിക്കും. ഡിജിറ്റൽ വീസയുടെ പകർപ്പ് ഇമെയിൽ വഴിയും ലഭിക്കും.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t