സുഹൃത്തുക്കളെയോ പരിചയക്കാരെയോ സഹായിക്കാനായി സ്വന്തം ബാങ്ക് കാർഡോ വ്യക്തിഗത ബാങ്ക് അക്കൗണ്ടോ മറ്റൊരാൾക്ക് ഉപയോഗിക്കാൻ നൽകുന്നവർ ജാഗ്രത പാലിക്കണമെന്ന് ദുബൈ പബ്ലിക് പ്രോസിക്യൂഷൻ. ഇടപാടിന്റെ യഥാർഥ ഉദ്ദേശ്യം വ്യക്തമായി അറിയാതെയുള്ള പണം കൈമാറ്റവും നിക്ഷേപവും പിന്നീട് ഗുരുതരമായ നിയമനടപടികളിലേക്ക് എത്തിച്ചേക്കാമെന്നാണ് അധികൃതരുടെ മുന്നറിയിപ്പ്. ഇതിന് ഉദാഹരണമായി ഒരു യുവാവിന്റെ സംഭവവും അധികൃതർ വിശദീകരിച്ചു. ഗെയിം വാങ്ങുന്നതിനായി കാർഡ് ആവശ്യമാണെന്ന് സുഹൃത്തുക്കൾ പറഞ്ഞതിനെ തുടർന്നാണ് യുവാവ് തന്റെ ബാങ്ക് കാർഡ് അവർക്ക് നൽകിയത്. എന്നാൽ പിന്നീട് കാർഡ് ഉപയോഗിച്ചത് മയക്കുമരുന്ന് വാങ്ങുന്നതിനായിരുന്നുവെന്ന് അന്വേഷണത്തിൽ കണ്ടെത്തുകയായിരുന്നു. സംഭവത്തിൽ യുവാവിനെ അന്വേഷണത്തിന്റെ ഭാഗമായി മൂന്ന് ആഴ്ച കസ്റ്റഡിയിൽ പാർപ്പിച്ചു. പിന്നീട് മയക്കുമരുന്ന് ഇടപാടിൽ യുവാവിന് നേരിട്ട് പങ്കില്ലെന്ന് വ്യക്തമായതോടെ യഥാർഥ കുറ്റവാളികളെ കണ്ടെത്തി അറസ്റ്റ് ചെയ്തു.

മയക്കുമരുന്ന് ഉപയോഗിക്കുകയോ വിൽക്കുകയോ പ്രചരിപ്പിക്കുകയോ കടത്തുകയോ ചെയ്യുന്നതിന് പുറമേ, മയക്കുമരുന്ന് വാങ്ങുന്നതിന് സഹായകമാകുന്ന സാമ്പത്തിക ഇടപാടുകൾക്കും നിയമപരമായ പ്രത്യാഘാതങ്ങളുണ്ടാകാമെന്ന് അധികൃതർ വ്യക്തമാക്കി. മറ്റൊരാളുടെ നിർദേശപ്രകാരം അക്കൗണ്ടിലേക്ക് പണം അയയ്ക്കുകയോ നിക്ഷേപിക്കുകയോ ചെയ്യുമ്പോൾ ആ പണത്തിന്റെ യഥാർഥ ആവശ്യവും ഉറവിടവും മനസ്സിലാക്കേണ്ടത് അനിവാര്യമാണെന്നും മുന്നറിയിപ്പിൽ പറയുന്നു. ലോക നിയമദിനത്തിന്റെ ഭാഗമായി അൽ വർഖ മജ്‌ലിസിൽ കമ്മ്യൂണിറ്റി ഡെവലപ്‌മെന്റ് അതോറിറ്റിയും ദുബൈ പബ്ലിക് പ്രോസിക്യൂഷനും സംയുക്തമായി സംഘടിപ്പിച്ച ‘ലീഗൽ ചാറ്റ്‌സ്’ പരിപാടിയിലാണ് മുന്നറിയിപ്പ് നൽകിയത്. മയക്കുമരുന്നിന്റെ ദോഷങ്ങളെക്കുറിച്ചുള്ള കൃത്യമായ ബോധവൽക്കരണം കുറ്റകൃത്യങ്ങൾ തടയുന്നതിൽ പ്രധാന പങ്കുവഹിക്കുന്നുവെന്ന് ഡ്രഗ്‌സ് പ്രോസിക്യൂഷൻ പ്രതിനിധി ഹമദ് അൽ അമീരി പറഞ്ഞു.

കുട്ടികളുമായി അടുത്ത ബന്ധം പുലർത്തുന്ന കുടുംബങ്ങൾക്ക് അവരുടെ പെരുമാറ്റത്തിലെ മാറ്റങ്ങളും പ്രശ്‌നങ്ങളും നേരത്തെ തിരിച്ചറിയാനും ആവശ്യമായ ഇടപെടൽ നടത്താനും കഴിയുമെന്നും അധികൃതർ ചൂണ്ടിക്കാട്ടി. മയക്കുമരുന്നുമായി ബന്ധപ്പെട്ട പ്രശ്‌നങ്ങൾ നേരിടുന്നവരെ ശരിയായ ഔദ്യോഗിക സഹായ സംവിധാനങ്ങളിലേക്ക് എത്തിക്കുന്നതിലും കുടുംബത്തിന്റെ ഇടപെടൽ നിർണായകമാണ്.
ഇടപാടിന്റെ ഉദ്ദേശ്യം അറിയില്ലെങ്കിൽ ബാങ്ക് കാർഡോ അക്കൗണ്ടോ മറ്റൊരാൾക്ക് ഉപയോഗിക്കാൻ നൽകരുത് — നിയമക്കുരുക്കിൽപ്പെടാതിരിക്കാനുള്ള പ്രധാന മുൻകരുതലാണ് ഇതെന്നും ദുബൈ അധികൃതർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t