Dubai Police initiative; സമൂഹനന്മ ലക്ഷ്യമിട്ടുള്ള ജീവകാരുണ്യ പ്രവർത്തനങ്ങളുടെ ഭാഗമായി, ആറുവയസുകാരിയായ നായ് അനസ് അൽ അമൂരിയുടെ ആഗ്രഹം സാധ്യമാക്കി ദുബായ് പോലീസ്. ഹട്ട പോലീസ് സ്റ്റേഷൻ സന്ദർശിക്കണമെന്ന കുട്ടിയുടെ ആഗ്രഹമാണ് ഹട്ട പോലീസ് സ്റ്റേഷന്റെ നേതൃത്വത്തിൽ നിറവേറ്റിയത്. കുട്ടിയുടെ മുഖത്ത് സന്തോഷം നിറയ്ക്കുന്നതിനും, പോലീസിന്റെ പ്രവർത്തന ശൈലികളും സ്മാർട്ട് സേവനങ്ങളും നേരിട്ട് കാണിച്ചുകൊടുക്കുന്നതിനുമാണ് ഈ പ്രത്യേക അനുഭവം ഒരുക്കിയത്. ഹട്ട പോലീസ് സ്റ്റേഷനിലെത്തിയ കുട്ടിയെയും കുടുംബത്തെയും ഡെപ്യൂട്ടി ഡയറക്ടർ കേണൽ ഒബൈദ് അൽ ബദ്‌വാവിയും അഡ്മിനിസ്ട്രേറ്റീവ് അഫയേഴ്‌സ് സെക്ഷൻ മേധാവി കേണൽ ഡോ. സൈഫ് അൽ ഖൈദിയും ചേർന്ന് സ്വീകരിച്ചു. സ്റ്റേഷനിലെത്തിയതു മുതൽ ഏറെ സന്തോഷവതിയായിരുന്ന നായ്, അവിടെയുള്ള ആധുനിക സാങ്കേതികവിദ്യകളെക്കുറിച്ചും പോലീസ് ഉദ്യോഗസ്ഥരുടെ സേവനങ്ങളെക്കുറിച്ചും ചോദിച്ചറിഞ്ഞു. കുട്ടികളുടെ പ്രായത്തിന് ഇണങ്ങുന്ന ലളിതമായ രീതിയിലാണ് കാര്യങ്ങൾ വിശദീകരിച്ചത്. തന്റെ ആഗ്രഹം സാധിച്ചതിൽ കുട്ടി നിറഞ്ഞ സന്തോഷം പ്രകടിപ്പിച്ചു. സമൂഹത്തോടും കുട്ടികളോടുമുള്ള പോലീസിന്റെ പ്രതിബദ്ധതയാണ് ഇത്തരം ജീവകാരുണ്യ പ്രവർത്തനങ്ങളിലൂടെ വ്യക്തമാകുന്നതെന്ന് കേണൽ ഒബൈദ് അൽ ബദ്‌വാവി പറഞ്ഞു. സുരക്ഷ ഉറപ്പാക്കുന്നതിനൊപ്പം സമൂഹത്തിൽ സന്തോഷം പരത്തുക എന്നതും പോലീസിന്റെ പ്രധാന ചുമതലയാണെന്ന് അദ്ദേഹം കൂട്ടിച്ചേർത്തു.
മകളുടെ ആഗ്രഹം സാധിപ്പിച്ചു നൽകിയ ഹട്ട പോലീസ് സ്റ്റേഷന് നായ്യുടെ പിതാവ് അനസ് അൽ അമൂരി ഹൃദയപൂർവ്വം നന്ദി അറിയിച്ചു. ജീവിതകാലം മുഴുവൻ മകൾക്ക് ഓർമ്മയിൽ സൂക്ഷിക്കാൻ കഴിയുന്ന മനോഹരമായ ഒരു ദിവസമാണ് പോലീസ് സമ്മാനിച്ചതെന്ന് അദ്ദേഹം വ്യക്തമാക്കി. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t