Sharjah Divorce Case; മന്ത്രവാദവും അന്ധവിശ്വാസങ്ങളുമായി ബന്ധപ്പെട്ട പ്രവർത്തനങ്ങൾ ദാമ്പത്യത്തെ തകർത്തതിനെത്തുടർന്ന് ഷാർജയിൽ ദമ്പതികൾക്ക് കോടതി വിവാഹമോചനം അനുവദിച്ചു. ഭാര്യയുടെ മന്ത്രവാദം മക്കളെയും കുടുംബജീവിതത്തെയും ദോഷകരമായി ബാധിക്കുന്നുവെന്ന ഭർത്താവിന്റെ പരാതിയിലാണ് ഷാർജ ശരീഅത്ത് കോടതി വിധി പുറപ്പെടുവിച്ചത്. വിവാഹമോചനം അനുവദിച്ചതിനൊപ്പം, വിവാഹവുമായി ബന്ധപ്പെട്ട സാമ്പത്തിക അവകാശങ്ങളിൽ (മഹർ, ഇദ്ദ കാലത്തെ ചെലവുകൾ തുടങ്ങിയവ) നിന്ന് ഭാര്യയെ കോടതി ഒഴിവാക്കി. കൂടാതെ, രണ്ട് കുട്ടികളുടെയും സംരക്ഷണ ചുമതല പിതാവിന് നൽകാനും കോടതി ഉത്തരവിട്ടു. തന്റെ ഭാര്യയും കുടുംബാംഗങ്ങളും മന്ത്രവാദം നടത്തുന്നവരാണെന്ന് ഭർത്താവ് കോടതിയെ ബോധിപ്പിച്ചു. ‘ഹംറൂഷ്’ എന്ന് പേരുള്ള ഒരു ജിന്നിനെ ഉപയോഗിച്ച് തന്റെ അമ്മാവൻ തനിക്ക് ചികിത്സ നൽകിയിട്ടുണ്ടെന്നും അതിലൂടെ അസുഖം ഭേദമായെന്നും ഭാര്യ മുൻപ് മറ്റൊരു കേസിന്റെ നടപടികൾക്കിടെ വെളിപ്പെടുത്തിയിരുന്നതായി ഭർത്താവ് ചൂണ്ടിക്കാട്ടി. ഈ പ്രവൃത്തികൾ മക്കളെയും ഗുരുതരമായി ബാധിച്ചിട്ടുണ്ട്. കുട്ടികൾക്ക് ജിന്നിന്റെ പേര് അറിയാമെന്നും, ഭയം കാരണം ഉറക്കത്തിൽ പല്ല് കടിക്കുക, കിടക്കയിൽ മൂത്രമൊഴിക്കുക, നഖം കടിക്കുക, ഇരുട്ടിനെ ഭയപ്പെടുക തുടങ്ങിയ അസ്വാഭാവിക ലക്ഷണങ്ങൾ അവർ കാണിക്കുന്നുണ്ടെന്നും ഭർത്താവ് ആരോപിച്ചു. കുട്ടികളുടെ മാനസികവും വിദ്യാഭ്യാസപരവുമായ വളർച്ചയെ ഇത്തരം വിശ്വാസങ്ങൾ ദോഷകരമായി ബാധിക്കുമെന്ന് അദ്ദേഹം കോടതിയിൽ വാദിച്ചു. വിവാഹമോചനത്തിന് കാരണമാകുന്ന ‘ദ്രോഹം’ എന്നത് ശാരീരിക പീഡനത്തിൽ മാത്രം ഒതുങ്ങുന്നതല്ലെന്നും, ദമ്പതികളുടെ സാമൂഹിക ചുറ്റുപാടും സാഹചര്യങ്ങളും പരിഗണിച്ച് അത് വിലയിരുത്താമെന്നും കോടതി നിരീക്ഷിച്ചു. ഈ കേസിൽ മന്ത്രവാദം ദാമ്പത്യം മുന്നോട്ട് കൊണ്ടുപോകാൻ കഴിയാത്ത വിധം ദ്രോഹകരമാണെന്ന് കോടതി കണ്ടെത്തി. കുട്ടികളുടെ സംരക്ഷണത്തിന്റെ കാര്യത്തിൽ അവരുടെ മികച്ച താൽപ്പര്യങ്ങൾക്കാണ് മുൻഗണന നൽകേണ്ടതെന്നും, മന്ത്രവാദം പോലെയുള്ള കാര്യങ്ങളിൽ ഏർപ്പെടുന്ന മാതാവിനൊപ്പം കഴിയുന്നത് കുട്ടികളുടെ ഭാവിക്ക് നല്ലതല്ലെന്നും കോടതി വിലയിരുത്തി. കുട്ടികളെ ഉടൻ പിതാവിന് കൈമാറാനും കോടതി ചെലവുകളും 5,000 ദിർഹം നിയമസഹായ ഫീസും ഭാര്യ നൽകണമെന്നും കോടതി ഉത്തരവിട്ടു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t