Etihad Rail Expansion; വേനലവധി കഴിഞ്ഞ് യുഎഇയിലെ താമസക്കാർ തിരിച്ചെത്തിയതോടെ ഇത്തിഹാദ് റെയിൽ പാസഞ്ചർ സർവീസുകൾക്ക് വൻ ഡിമാൻഡ്. റോഡ് മാർഗമുള്ള യാത്രയേക്കാൾ സുഖകരവും വേഗതയേറിയതുമായ ട്രെയിൻ യാത്രയെ ജനങ്ങൾ ഏറ്റെടുത്തു. ജൂണിൽ അബുദാബിക്കും ഫുജൈറയ്ക്കും ഇടയിൽ പ്രാരംഭ സർവീസുകൾ ആരംഭിച്ചതിന് ശേഷം ഇതുവരെ ഒരു ലക്ഷത്തിലധികം ടിക്കറ്റുകൾ വിറ്റഴിഞ്ഞതായി ഇത്തിഹാദ് റെയിൽ ചീഫ് ഓപ്പറേറ്റിംഗ് ഓഫീസർ അസ അൽ സുവൈദി അറിയിച്ചു. കുടുംബങ്ങളും സ്ഥിരം യാത്രക്കാരും ഉൾപ്പെടെ എല്ലാ വിഭാഗം ആളുകളിൽ നിന്നും വലിയ പ്രതികരണമാണ് ലഭിക്കുന്നത്. സെപ്റ്റംബർ 30-ന് ദുബായ് സ്റ്റേഷൻ തുറക്കുന്നതോടെയും ട്രെയിൻ ശൃംഖല വിപുലമാകുന്നതോടെയും കൂടുതൽ ആളുകൾ റെയിൽ യാത്ര ദൈനംദിന ജീവിതത്തിന്റെ ഭാഗമാക്കും. കുടുംബ ആവശ്യങ്ങൾക്കും ചികിത്സാ സംബന്ധമായ യാത്രകൾക്കും വിനോദയാത്രകൾക്കുമായി അബുദാബിക്കും ഫുജൈറയ്ക്കും ഇടയിലുള്ള ട്രെയിൻ സർവീസിനെയാണ് ഭൂരിഭാഗം ആളുകളും ആശ്രയിക്കുന്നത്. സ്റ്റേഷനുകളിലെ മികച്ച ക്രമീകരണങ്ങളും ട്രെയിനിലെ സൗകര്യങ്ങളും യാത്രക്കാർ പ്രത്യേകം എടുത്തുപറയുന്നു. കൽബ സ്വദേശിയായ ഷൈമ അൽ ഹമ്മൂദി തന്റെ അഞ്ചു വയസ്സുള്ള മകളുടെ ചികിത്സാ ആവശ്യത്തിനായി അബുദാബിയിലെ ഹെൽത്ത് പോയിന്റ് ആശുപത്രിയിൽ പോകാനാണ് ഇത്തിഹാദ് റെയിൽ തിരഞ്ഞെടുത്തത്. കൃത്യസമയത്തുള്ള സർവീസും കുട്ടികൾക്കായുള്ള പ്രത്യേക മെനു ഉൾപ്പെടെയുള്ള ഭക്ഷണ സൗകര്യങ്ങളും മികച്ച യാത്രാനുഭവമാണ് നൽകിയതെന്ന് അവർ പറഞ്ഞു. അബുദാബിയിലെ മുഹമ്മദ് ബിൻ സായിദ് സിറ്റിയിൽ നിന്ന് ഫുജൈറയിലേക്ക് ഒന്നര മണിക്കൂർ കൊണ്ട് യാത്ര ചെയ്ത നാദ എന്ന യുവതി, ടിക്കറ്റുകൾക്ക് വലിയ ഡിമാൻഡ് ഉള്ളതിനാൽ ബുക്കിംഗ് ലഭിക്കാൻ പ്രയാസപ്പെട്ടതായി വ്യക്തമാക്കി. സ്റ്റേഷനിലെ ജീവനക്കാരുടെ പെരുമാറ്റവും ലളിതമായ നടപടിക്രമങ്ങളും യുഎഇയുടെ പാരമ്പര്യവും ആതിഥ്യമര്യാദയും വിളിച്ചോതുന്നതാണെന്ന് അവർ കൂട്ടിച്ചേർത്തു. കംഫർട്ട് ക്ലാസിൽ യാത്ര ചെയ്ത മുഹമ്മദ് എന്ന യാത്രക്കാരൻ ട്രെയിനിന്റെ കൃത്യനിഷ്ഠയെയും സീറ്റുകളുടെ സൗകര്യത്തെയും പ്രശംസിച്ചു. സെപ്റ്റംബർ 30-ന് ദുബായ് സ്റ്റേഷൻ കൂടി പ്രവർത്തനസജ്ജമാകുന്നതോടെ ഇത്തിഹാദ് റെയിലിലെ യാത്രക്കാരുടെ എണ്ണം ഇനിയും വർധിക്കുമെന്നാണ് കണക്കാക്കുന്നത്. ഇതോടെ, യുഎഇയിലെ സാധാരണ ഗതാഗത സംവിധാനത്തിന്റെ അവിഭാജ്യ ഘടകമായി റെയിൽവേ മാറിക്കഴിഞ്ഞു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t