ദുബായിലെ വന്ധ്യതാ ചികിത്സാ രംഗത്ത് നിർണായക മാറ്റങ്ങൾ സൃഷ്ടിക്കുകയും ആയിരക്കണക്കിന് ദമ്പതികൾക്ക് മാതാപിതാക്കളാകാനുള്ള പ്രതീക്ഷ നൽകുകയും ചെയ്ത പ്രമുഖ ഗൈനക്കോളജിസ്റ്റ് ഡോ. മേരി ജോൺ അന്തരിച്ചു. പ്രസവിക്കാതെ തന്നെ മൂവായിരത്തിലധികം കുഞ്ഞുങ്ങൾക്ക് കർമ്മം കൊണ്ട് അമ്മയായ ഡോ. മേരി, ഇമറാത്തി കുടുംബങ്ങൾക്കും പ്രവാസി സമൂഹത്തിനും ഒരുപോലെ പ്രിയങ്കരിയായിരുന്നു. വിരമിച്ച ശേഷം അമേരിക്കയിൽ മക്കൾക്കൊപ്പം താമസിച്ചുവരികയായിരുന്നു. ദുബായിലെ ആരോഗ്യരംഗത്ത് പതിറ്റാണ്ടുകളോളം സേവനമനുഷ്ഠിച്ച ഡോ. മേരി, പ്രത്യേകിച്ച് വന്ധ്യതാ ചികിത്സാ മേഖലയെ ആധുനികവൽക്കരിക്കുന്നതിൽ നിർണായക പങ്കുവഹിച്ചു. 1987-ൽ ദുബായ് ഹോസ്പിറ്റലിലൂടെയാണ് ഡോ. മേരി ജോൺ തന്റെ ഔദ്യോഗിക ജീവിതം ആരംഭിച്ചത്. തുടർന്ന് 1992-ൽ ലത്തീഫ ആശുപത്രിയിലേക്ക് മാറി. അവിടെ 1996 മുതൽ 2006 വരെ ഗൈനക്കോളജി വിഭാഗം മേധാവിയായി സേവനമനുഷ്ഠിച്ചു. 2013-ൽ ദുബായ് ഗൈനക്കോളജി ആൻഡ് ഫെർട്ടിലിറ്റി സെന്ററിന്റെ ചുമതല ഏറ്റെടുത്തതോടെ ദുബായിലെ വന്ധ്യതാ ചികിത്സാ രംഗത്ത് പുതിയ അധ്യായത്തിന് തുടക്കമായി. ആധുനിക ചികിത്സാരീതികളും നൂതന സാങ്കേതിക സംവിധാനങ്ങളും കൂടുതൽ വ്യാപകമാക്കുന്നതിൽ അവർ പ്രധാന പങ്കുവഹിച്ചു. 2016-ൽ വിരമിക്കുന്നതുവരെ ഈ മേഖലയിലെ ശ്രദ്ധേയ സാന്നിധ്യമായിരുന്നു ഡോ. മേരി.

ദുബായ് ഹെൽത്ത് അതോറിറ്റിക്കു കീഴിൽ പ്രവർത്തിക്കുന്ന നിരവധി ഡോക്ടർമാരുടെ പ്രിയപ്പെട്ട അധ്യാപികയും മാർഗദർശിയുമായിരുന്നു അവർ. യുഎഇയിലെ പ്രമുഖ ഗൈനക്കോളജിസ്റ്റുകളിൽ പലരും ഡോ. മേരിയുടെ ശിഷ്യരാണെന്നും സഹപ്രവർത്തകർ ഓർക്കുന്നു. രാജ്യത്തെ ഗൈനക്കോളജി ചികിത്സാ മേഖലയ്ക്ക് അന്താരാഷ്ട്ര നിലവാരവും അംഗീകാരവും നേടിക്കൊടുക്കുന്നതിൽ നൽകിയ സംഭാവനകൾ പരിഗണിച്ച് ദുബായ് ഹെൽത്ത് അതോറിറ്റി അവരെ ആദരിച്ചിരുന്നു. അടുത്ത സുഹൃത്തുക്കൾക്ക് ‘ഗേളി’ എന്ന പേരിൽ പ്രിയങ്കരിയായിരുന്ന ഡോ. മേരി, നിരവധി ഇമറാത്തി കുടുംബങ്ങൾക്ക് സ്വന്തം കുടുംബാംഗത്തെപ്പോലെയായിരുന്നു. വന്ധ്യതയുടെ വേദനയിൽ കഴിയുന്ന ആയിരക്കണക്കിന് കുടുംബങ്ങൾക്ക് ചികിത്സയിലൂടെ പ്രതീക്ഷയും സന്തോഷവും സമ്മാനിക്കാൻ അവർക്ക് കഴിഞ്ഞു.

ഡോ. മേരിയുടെ വിയോഗവാർത്ത അറിഞ്ഞതോടെ നിരവധി കുടുംബങ്ങളും മുൻ സഹപ്രവർത്തകരും അനുശോചനം രേഖപ്പെടുത്തി. ദുബായിലെ വന്ധ്യതാ ചികിത്സയെ ആധുനികവൽക്കരിക്കാനും നൂതന ചികിത്സാ സംവിധാനങ്ങൾ കൊണ്ടുവരാനും അവർ നൽകിയ സംഭാവനകൾ വളരെ വലുതാണെന്ന് ആരോഗ്യരംഗത്തെ സഹപ്രവർത്തകർ അനുസ്മരിച്ചു. ദുബായ് മാർത്തോമ്മാ ഇടവകാംഗമായിരുന്ന ഡോ. മേരി ജോൺ, ദുബായുടെ ആരോഗ്യരംഗത്തും അനേകം കുടുംബങ്ങളുടെ ജീവിതത്തിലും മായാത്ത അടയാളം പതിപ്പിച്ചാണ് വിടവാങ്ങിയത്. മാതൃത്വത്തിന്റെ സന്തോഷം അനുഭവിക്കാൻ വഴിയൊരുക്കിയ ആയിരക്കണക്കിന് കുടുംബങ്ങളുടെ ഓർമകളിൽ ഡോ. മേരി എന്നും ജീവിച്ചിരിക്കും. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t