Dubai Sharjah Traffic News; ദുബായിയെയും ഷാർജയെയും ബന്ധിപ്പിക്കുന്ന പ്രധാന പാതകളിൽ കനത്ത ഗതാഗതക്കുരുക്ക് അനുഭവപ്പെടുന്നതായി റിപ്പോർട്ട്. ഗൂഗിൾ മാപ്‌സിലെ തത്സമയ വിവരങ്ങൾ പ്രകാരം അൽ ഇത്തിഹാദ് റോഡിലും (E11) ഷെയ്ഖ് മുഹമ്മദ് ബിൻ സായിദ് റോഡിലുമാണ് (E311) വാഹനങ്ങൾ ഏറെയും കുടുങ്ങിക്കിടക്കുന്നത്. വിവിധയിടങ്ങളിൽ റിപ്പോർട്ട് ചെയ്യപ്പെട്ട വാഹനാപകടങ്ങൾ കുരുക്കിന്റെ ആക്കം കൂട്ടിയിട്ടുണ്ട്. അൽ ഇത്തിഹാദ് റോഡിൽ (E11) ഷാർജ അതിർത്തിയോട് ചേർന്നുള്ള ഭാഗങ്ങളിലാണ് ഏറ്റവും കൂടുതൽ തടസ്സം നേരിടുന്നത്. ഷാർജയിലെ അൽ ഖാസിമിയ, ബുഹൈറ ഭാഗങ്ങളിലും ദുബായിലെ മദീന മാൾ, മുഹൈസിന പരിസരങ്ങളിലും വാഹനങ്ങൾ ഇഴഞ്ഞു നീങ്ങുകയാണ്. കൂടാതെ അൽ മംസാർ ടോൾ ഗേറ്റിന് സമീപം വാഹനാപകടം റിപ്പോർട്ട് ചെയ്തത് ഈ മേഖലയിലെ ഗതാഗതത്തെ കാര്യമായി ബാധിച്ചു. ഷെയ്ഖ് മുഹമ്മദ് ബിൻ സായിദ് റോഡിൽ (E311) മുഹൈസിന ഭാഗത്തും അപകടം റിപ്പോർട്ട് ചെയ്തിട്ടുണ്ട്. അൽ റാഷിദിയ (D62), മിർദിഫ്, അൽ ഖവാനീജ് (D89) പാതകളിലും ഗതാഗതം മന്ദഗതിയിലാണ്. റാസ് അൽ ഖോർ, ബിസിനസ് ബേ, ദുബായ് ഡിസൈൻ ഡിസ്ട്രിക്റ്റ്, നദ്ദ് അൽ ഹമർ തുടങ്ങിയ ഭാഗങ്ങളിലും വാഹനത്തിരക്കുണ്ട്. എന്നാൽ ഷെയ്ഖ് സായിദ് റോഡ്, ദുബായ് മറീന, ഡൗൺടൗൺ, അൽ ഐൻ റോഡ് (E66) എന്നിവിടങ്ങളിൽ നിലവിൽ ഗതാഗതം സുഗമമാണ്. തിരക്കേറിയ സമയങ്ങളിൽ ദുബായ്-ഷാർജ യാത്രക്കാർക്ക് E311 അല്ലെങ്കിൽ എമിറേറ്റ്‌സ് റോഡ് (E611) തുടങ്ങിയ ബദൽ പാതകൾ ഉപയോഗിക്കാവുന്നതാണ്. കുരുക്കിൽ പെടാതിരിക്കാൻ യാത്രക്കാർ ആവശ്യത്തിന് സമയം കരുതി പുറപ്പെടണമെന്നും ട്രാഫിക് വിവരങ്ങൾ പരിശോധിക്കണമെന്നും അധികൃതർ നിർദ്ദേശിക്കുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t