Dubai Taxi Expands ; ദുബായ് ടാക്സി കമ്പനി തങ്ങളുടെ തന്ത്രപ്രധാന പങ്കാളിയായ ബോൾട്ട് (Bolt) പ്ലാറ്റ്‌ഫോമിലേക്ക് 1,607 അറേബ്യ ടാക്സി വാഹനങ്ങളെക്കൂടി ഉൾപ്പെടുത്താൻ കരാറൊപ്പിട്ടു. ദുബായിലുടനീളമുള്ള യാത്രക്കാർക്ക് ടാക്സി ലഭ്യത വർദ്ധിപ്പിക്കാനും കാത്തിരിപ്പ് സമയം ഗണ്യമായി കുറയ്ക്കാനുമാണ് ഈ നീക്കത്തിലൂടെ ലക്ഷ്യമിടുന്നത്. അറേബ്യ ടാക്സിയുടെ വാഹനങ്ങൾ കൂടി ബോൾട്ട് ആപ്പിൽ ലഭ്യമാകുന്നതോടെ ഉപഭോക്താക്കൾക്ക് കൂടുതൽ വാഹനങ്ങൾ തിരഞ്ഞെടുക്കാനുള്ള അവസരം ലഭിക്കും. തിരക്കുള്ള സമയങ്ങളിൽ പോലും ടാക്സി വേഗത്തിൽ ലഭ്യമാക്കാനും സേവനത്തിന്റെ വിശ്വാസ്യത ഉറപ്പാക്കാനും ഈ പുതിയ ക്രമീകരണം സഹായിക്കുമെന്ന് കമ്പനികൾ അറിയിച്ചു. സ്വകാര്യ ടാക്സി ഓപ്പറേറ്റർമാരുമായി സഹകരിച്ച് ഡിജിറ്റൽ ഗതാഗത സംവിധാനം ശക്തമാക്കാനുള്ള ദുബായ് ടാക്സി കമ്പനിയുടെ തന്ത്രപരമായ നീക്കത്തിന്റെ ഭാഗമാണ് ഈ കരാർ. ആപ്പ് വഴിയുള്ള യാത്രാ സേവനങ്ങൾക്ക് ദുബായിൽ ആവശ്യക്കാർ ഏറിവരുന്ന സാഹചര്യത്തിൽ ഉപഭോക്താക്കളുടെ അനുഭവം മെച്ചപ്പെടുത്താനാണ് തങ്ങൾ ശ്രമിക്കുന്നതെന്ന് ദുബായ് ടാക്സി കമ്പനി ഗ്രൂപ്പ് സിഇഒ മൻസൂർ റഹ്മ അൽഫലാസി പറഞ്ഞു. സ്മാർട്ട് ഗതാഗത സംവിധാനങ്ങളിലേക്കുള്ള ദുബായുടെ മാറ്റത്തിന് ഇത് കൂടുതൽ കരുത്തുപകരുമെന്നും അദ്ദേഹം കൂട്ടിച്ചേർത്തു. ബോൾട്ട് പ്ലാറ്റ്‌ഫോമിൽ ചേരുന്നതിലൂടെ തങ്ങളുടെ ഡ്രൈവർമാർക്കും വാഹനങ്ങൾക്കും കൂടുതൽ ഉപഭോക്താക്കളിലേക്ക് എത്താൻ സാധിക്കുമെന്ന് അറേബ്യ ടാക്സി എക്‌സിക്യൂട്ടീവ് ഡയറക്ടർ റഊഫ് അലി പറഞ്ഞു. ദുബായിലെ ഗതാഗത വിപണിയിൽ തങ്ങളുടെ സ്വാധീനം വർദ്ധിപ്പിക്കാൻ ബോൾട്ടിനും ഈ പങ്കാളിത്തം സഹായകമാകും. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t