ഇന്ത്യയുടെ സ്വാതന്ത്ര്യദിനാഘോഷങ്ങളുടെ പശ്ചാത്തലത്തിൽ രാജ്യത്തെ പ്രധാന വിമാനത്താവളങ്ങളിലും ഗതാഗത കേന്ദ്രങ്ങളിലും ശക്തമാക്കിയ സുരക്ഷാ പരിശോധനകൾ ഓഗസ്റ്റ് 20 വരെ തുടരും. ഇതോടെ യുഎഇയിൽ നിന്ന് ഇന്ത്യയിലേക്ക് യാത്ര ചെയ്യുന്ന പ്രവാസികൾക്ക് വിമാനത്താവളങ്ങളിൽ കൂടുതൽ സമയം ചെലവഴിക്കേണ്ടിവരാൻ സാധ്യതയുണ്ട്. ഡൽഹി, മുംബൈ, ബെംഗളൂരു, കൊച്ചി, തിരുവനന്തപുരം തുടങ്ങിയ പ്രധാന വിമാനത്താവളങ്ങളിൽ അധിക സുരക്ഷാ പരിശോധനകളും നീണ്ട ക്യൂകളും ഉണ്ടാകാൻ സാധ്യതയുള്ളതിനാൽ യാത്രക്കാർ വിമാനം പുറപ്പെടുന്നതിന് ഏറെ മുമ്പ് വിമാനത്താവളത്തിലെത്തണമെന്ന് അധികൃതരും വിവിധ എയർലൈനുകളും നിർദേശിച്ചു.

വിവിധ വിമാനത്താവളങ്ങളിലെ സുരക്ഷാ ക്രമീകരണങ്ങൾ

ഡൽഹി: സുരക്ഷാ പരിശോധന ശക്തമാക്കിയിട്ടുണ്ട്. ഗതാഗത നിയന്ത്രണങ്ങൾക്കും തിരക്കിനും സാധ്യതയുള്ളതിനാൽ യാത്രക്കാർ യാത്ര മുൻകൂട്ടി ആസൂത്രണം ചെയ്യണം.

മുംബൈ: ഓഗസ്റ്റ് 20 വരെ അധിക സുരക്ഷാ നടപടികൾ തുടരും. നിർബന്ധിത പരിശോധനകൾക്ക് കൂടുതൽ സമയം വേണ്ടിവന്നേക്കാം.

ബെംഗളൂരു: സ്വാതന്ത്ര്യദിനത്തോടനുബന്ധിച്ച് യാത്രക്കാരുടെ തിരക്ക് വർധിക്കാൻ സാധ്യതയുള്ളതിനാൽ ചെക്ക്-ഇൻ, സുരക്ഷാ പരിശോധനകൾ എന്നിവയ്ക്കായി അധിക സമയം മാറ്റിവയ്ക്കണം.

കൊച്ചി: കൊച്ചിൻ ഇന്റർനാഷനൽ എയർപോർട്ടിൽ യാത്രക്കാർ, ബാഗേജ്, കാർഗോ എന്നിവയുടെ പരിശോധന ശക്തമാക്കിയിട്ടുണ്ട്. ആഭ്യന്തര, രാജ്യാന്തര ടെർമിനലുകളിൽ സന്ദർശകർക്ക് പ്രവേശനവും നിയന്ത്രിച്ചിട്ടുണ്ട്. സുരക്ഷാ നടപടികൾ ഓഗസ്റ്റ് 20 വരെ തുടരും.

തിരുവനന്തപുരം: അധിക സുരക്ഷാ പരിശോധനകൾക്ക് സാധ്യതയുള്ളതിനാൽ യാത്രക്കാർ നേരത്തെ എത്തുകയും ആവശ്യമായ രേഖകൾ കൈവശം സൂക്ഷിക്കുകയും വേണം.

എയർലൈനുകളുടെ മുന്നറിയിപ്പും

എയർ ഇന്ത്യ: ഓഗസ്റ്റ് 10 മുതൽ 20 വരെ യാത്ര ചെയ്യുന്നവർ അധിക സുരക്ഷാ പരിശോധനകൾ കണക്കിലെടുത്ത് നേരത്തെ വിമാനത്താവളത്തിലെത്തണമെന്ന് നിർദേശിച്ചു.

ഇൻഡിഗോ: ചെക്ക്-ഇൻ, ബാഗേജ്, സുരക്ഷാ പരിശോധന തുടങ്ങിയ നടപടികൾക്ക് സാധാരണയേക്കാൾ കൂടുതൽ സമയം വേണ്ടിവന്നേക്കാമെന്ന് അറിയിച്ചു.

സ്പൈസ്‌ജെറ്റ്: ഓഗസ്റ്റ് 11 മുതൽ 20 വരെ യാത്ര ചെയ്യുന്നവർ നിശ്ചിത പുറപ്പെടൽ സമയത്തിന് ഏറെ മുമ്പ് വിമാനത്താവളത്തിലെത്തണമെന്ന് നിർദേശിച്ചു.

യുഎഇയിൽ നിന്ന് ഇന്ത്യയിലേക്ക് വരുന്ന പ്രവാസികൾ ശ്രദ്ധിക്കേണ്ടത്

• വിമാനത്താവളത്തിൽ നേരത്തെ എത്തുക.
• പുറപ്പെടുന്നതിന് മുമ്പ് ഫ്ലൈറ്റ് സ്റ്റാറ്റസ് പരിശോധിക്കുക.
• ആവശ്യമായ യാത്രാരേഖകൾ കൈയ്യിൽ കരുതുക.
• ചെക്ക്-ഇൻ, സുരക്ഷാ പരിശോധന, ബോർഡിങ് എന്നിവയ്ക്കായി അധിക സമയം മാറ്റിവയ്ക്കുക.
• ഗതാഗതക്കുരുക്കും റോഡ് നിയന്ത്രണങ്ങളും കണക്കിലെടുത്ത് യാത്ര ആസൂത്രണം ചെയ്യുക.
• എയർലൈനിന്റെ ഏറ്റവും പുതിയ കാബിൻ, ചെക്ക്ഡ് ബാഗേജ് നിയമങ്ങൾ പരിശോധിക്കുക.
• അധിക സുരക്ഷാ പരിശോധനകളോട് ഉദ്യോഗസ്ഥരുമായി സഹകരിക്കുക.