UAE Music License Fee; യുഎഇയിലെ ഹോട്ടലുകൾ, കഫേകൾ, ഷോപ്പിംഗ് മാളുകൾ തുടങ്ങിയ വാണിജ്യ സ്ഥാപനങ്ങളിൽ സംഗീതം പ്ലേ ചെയ്യുന്നതിന് ലൈസൻസ് ഫീസ് ഏർപ്പെടുത്തിക്കൊണ്ട് സാമ്പത്തിക മന്ത്രാലയം പുതിയ ഉത്തരവ് പുറത്തിറക്കി. സംഗീത പകർപ്പവകാശങ്ങൾ സംരക്ഷിക്കുന്നതിനും ഈ രംഗത്തെ നിയന്ത്രണങ്ങൾ ഏകീകരിക്കുന്നതിനുമായി പുറത്തിറക്കിയ ‘കളക്റ്റീവ് മാനേജ്‌മെന്റ് ഇൻ മ്യൂസിക് ഗൈഡ്’ പ്രകാരം 2026 ഡിസംബർ മുതലാണ് ഫീസ് ശേഖരിച്ചു തുടങ്ങുക. റെസ്റ്റോറന്റുകൾ, ഫിറ്റ്‌നസ് സെന്ററുകൾ, വിമാനക്കമ്പനികൾ, റേഡിയോ-ടെലിവിഷൻ ചാനലുകൾ, കൺസേർട്ടുകൾ തുടങ്ങി വാണിജ്യാടിസ്ഥാനത്തിൽ സംഗീതം ഉപയോഗിക്കുന്ന എല്ലാ മേഖലകൾക്കും ഈ നിയമം ബാധകമായിരിക്കും. സ്ഥാപനത്തിന്റെ വലിപ്പവും സംഗീതം ഉപയോഗിക്കുന്ന രീതിയും കണക്കിലെടുത്തായിരിക്കും ഫീസ് നിരക്ക് നിശ്ചയിക്കുക. ഒരു വർഷത്തേക്ക് അനുവദിക്കുന്ന ലൈസൻസുകൾ കാലാവധി പൂർത്തിയാകുമ്പോൾ പുതുക്കേണ്ടതുണ്ട്. എമിറേറ്റ്‌സ് മ്യൂസിക് റൈറ്റ്‌സ് അസോസിയേഷൻ, മ്യൂസിക് നേഷൻ എന്നീ രണ്ട് അംഗീകൃത ഏജൻസികൾക്കാണ് ഫീസ് ശേഖരിക്കാനുള്ള ചുമതല നൽകിയിരിക്കുന്നത്. സംഗീത രചയിതാക്കൾ, ഗായകർ, പ്രൊഡ്യൂസർമാർ, മറ്റ് കലാകാരന്മാർ എന്നിവരുടെ അവകാശങ്ങൾ സംരക്ഷിക്കുന്നതിനാണ് ഈ തുക വിനിയോഗിക്കുക. അതേസമയം വിദ്യാഭ്യാസ സ്ഥാപനങ്ങൾ, സർക്കാർ ഓഫീസുകൾ, ദേശീയ പരിപാടികൾ, വ്യക്തിപരമായ സ്വകാര്യ ആഘോഷങ്ങൾ എന്നിവയെ ഈ ഫീസിൽ നിന്ന് ഒഴിവാക്കിയിട്ടുണ്ട്. യുഎഇയുടെ ക്രിയേറ്റീവ് വ്യവസായ മേഖലയെ ശക്തിപ്പെടുത്തുന്നതിനും സമ്പദ്‌വ്യവസ്ഥ വൈവിധ്യവത്കരിക്കുന്നതിനുമുള്ള യുഎഇ വിഷൻ 2031-ന്റെ ഭാഗമായാണ് ഈ പുതിയ നീക്കമെന്ന് സാമ്പത്തിക മന്ത്രി അബ്ദുള്ള ബിൻ തൗഖ് അൽ മർറി വ്യക്തമാക്കി. ശേഖരിക്കുന്ന ആകെ തുകയുടെ പത്ത് ശതമാനം സംഗീത മേഖലയിലെ വളർന്നുവരുന്ന പ്രതിഭകളെയും എമിറാത്തി സംഗീതത്തെയും പ്രോത്സാഹിപ്പിക്കുന്നതിനായുള്ള പ്രത്യേക സാംസ്‌കാരിക നിധിയിലേക്ക് മാറ്റും. കുട്ടികൾക്കും യുവാക്കൾക്കും ഭിന്നശേഷിക്കാർക്കും സംഗീത രംഗത്ത് കൂടുതൽ അവസരങ്ങൾ ഒരുക്കാൻ ഈ ഫണ്ട് ഉപയോഗിക്കും. നിയമം കൃത്യമായി പാലിക്കപ്പെടുന്നുണ്ടെന്ന് ഉറപ്പാക്കാൻ മന്ത്രാലയത്തിന്റെ നേതൃത്വത്തിൽ പരിശോധനകൾ നടത്തുകയും പകർപ്പവകാശ ലംഘനങ്ങൾക്കെതിരെ കർശന നടപടികൾ സ്വീകരിക്കുകയും ചെയ്യും. സംഗീത ഉടമകൾക്കും സ്ഥാപനങ്ങൾക്കുമിടയിലുള്ള തർക്കങ്ങൾ പരിഹരിക്കാൻ പ്രത്യേക പരാതി പരിഹാര സംവിധാനവും മന്ത്രാലയം സജ്ജമാക്കിയിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t