Dubai AI Building Permits; കെട്ടിട നിർമ്മാണത്തിനുള്ള പെർമിറ്റുകൾ ലഭിക്കുന്നതിന് ദിവസങ്ങളോളം കാത്തിരിക്കേണ്ടി വരുന്ന രീതിക്ക് മാറ്റം കുറിച്ചുകൊണ്ട് ദുബായ് മുൻസിപ്പാലിറ്റി പുതിയ സംവിധാനം അവതരിപ്പിച്ചു. ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യയുടെ സഹായത്തോടെ പ്രവർത്തിക്കുന്ന ഈ പുതിയ സംവിധാനം വഴി നിർമ്മാണ പെർമിറ്റുകൾ വെറും മിനിറ്റുകൾക്കുള്ളിൽ ലഭ്യമാകും. ദുബായിയെ ലോകത്തിലെ ഏറ്റവും മികച്ച സ്മാർട്ട് നഗരമാക്കി മാറ്റുന്നതിന്റെയും ഡിജിറ്റൽ സേവനങ്ങൾ ലഘൂകരിക്കുന്നതിന്റെയും ഭാഗമായാണ് ഈ നിർണ്ണായക നീക്കം. മനുഷ്യ ഇടപെടലില്ലാതെ തന്നെ അപേക്ഷകർ സമർപ്പിക്കുന്ന മാപ്പുകളും രേഖകളും സ്വയം പരിശോധിച്ച് പെർമിറ്റ് നൽകാൻ ഈ അത്യാധുനിക എഐ സിസ്റ്റത്തിന് കഴിയും. ദുബായ് ബിൽഡിംഗ് കോഡ് പ്രകാരമുള്ള സുരക്ഷാ മാനദണ്ഡങ്ങൾ, നിർമ്മാണത്തിലെ സാങ്കേതിക കൃത്യത, ഇലക്ട്രിക്കൽ, പ്ലംബിംഗ് ക്രമീകരണങ്ങൾ എന്നിവയെല്ലാം മിനിറ്റുകൾക്കുള്ളിൽ പരിശോധിച്ച് ഉറപ്പുവരുത്താൻ ഈ സംവിധാനത്തിലൂടെ സാധിക്കും.ആദ്യഘട്ടത്തിൽ സ്വകാര്യ വില്ലകൾക്കും നിക്ഷേപ വില്ലകൾക്കുമാണ് ഈ സൗകര്യം ഏർപ്പെടുത്തിയിരിക്കുന്നത്. അപേക്ഷ സമർപ്പിക്കുന്നതിന് മുൻപ് തന്നെ ഉപഭോക്താക്കൾക്ക് തങ്ങളുടെ പ്ലാനുകളിൽ ആവശ്യമായ മാറ്റങ്ങൾ വരുത്തേണ്ടതുണ്ടോ എന്ന് പരിശോധിക്കാൻ ഇതിലൂടെ കഴിയും. എന്തെങ്കിലും തിരുത്തലുകൾ ആവശ്യമുണ്ടെങ്കിൽ അപ്പപ്പോൾ തന്നെ കൃത്യമായ മാർഗ്ഗനിർദ്ദേശങ്ങൾ സിസ്റ്റം നൽകും. ഇത് അനാവശ്യമായ കാലതാമസം ഒഴിവാക്കാനും നിർമ്മാണ രംഗത്ത് കൂടുതൽ വേഗത കൈവരിക്കാനും സഹായിക്കും. ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഗവൺമെന്റ് സേവനങ്ങളിൽ വലിയ രീതിയിൽ ഉപയോഗപ്പെടുത്തുന്നതിന്റെ മികച്ച ഉദാഹരണമാണിതെന്ന് ദുബായ് മുൻസിപ്പാലിറ്റി അധികൃതർ വ്യക്തമാക്കി. ദുബായ് എക്കണോമിക് അജണ്ട (D33), ആർട്ടിഫിഷ്യൽ ഇന്റലിജൻസ് സാങ്കേതികവിദ്യ വ്യാപിപ്പിക്കാനുള്ള ദുബായുടെ വാർഷിക പദ്ധതി എന്നിവയുടെ ഭാഗമായാണ് ഈ നടപടി. ആകെ മൂന്ന് ഘട്ടങ്ങളിലായാണ് ഈ പദ്ധതി നടപ്പിലാക്കുന്നത്. നിലവിൽ പരീക്ഷണങ്ങൾ പൂർത്തിയാക്കി, തിരഞ്ഞെടുത്ത കൺസൾട്ടൻസി സ്ഥാപനങ്ങളുമായി ചേർന്ന് ഇത് നടപ്പിലാക്കി വരികയാണ്. 26 ആഴ്ചകൾക്കുള്ളിൽ ദുബായിലെ എല്ലാ വില്ലാ നിർമ്മാണ അപേക്ഷകൾക്കുമായി ഈ സംവിധാനം പൂർണ്ണമായും ലഭ്യമാകും. ബിസിനസ് നടപടികൾ എളുപ്പമാക്കാനും ദുബായിയെ നിക്ഷേപ സൗഹൃദ നഗരമാക്കാനും ഈ നീക്കം വലിയ രീതിയിൽ സഹായിക്കും. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t