യുഎഇയിൽ വീട്ടുജോലിക്കാരെ നിയമിക്കാൻ ആലോചിക്കുന്ന തൊഴിലുടമകൾക്ക് ലൈസൻസുള്ള റിക്രൂട്ട്മെന്റ് ഏജൻസിയിലൂടെ നിയമിക്കുന്നതും നേരിട്ട് നിയമിക്കുന്നതും തമ്മിലുള്ള പ്രധാന വ്യത്യാസങ്ങൾ തൊഴിൽ-എമിററ്റൈസേഷൻ മന്ത്രാലയം (MoHRE) വിശദീകരിച്ചു. രണ്ട് മാർഗങ്ങളും നിയമപരമായി അനുവദനീയമാണെങ്കിലും, തൊഴിലുടമയ്ക്ക് ലഭിക്കുന്ന നിയമപരമായ സംരക്ഷണം, ഉറപ്പുകൾ, ഉത്തരവാദിത്തങ്ങൾ എന്നിവയിൽ കാര്യമായ വ്യത്യാസമുണ്ടെന്ന് മന്ത്രാലയം വ്യക്തമാക്കി.
ലൈസൻസുള്ള റിക്രൂട്ട്മെന്റ് ഏജൻസി വഴിയാണ് തൊഴിലാളിയെ നിയമിക്കുന്നതെങ്കിൽ, തൊഴിലുടമയും റിക്രൂട്ട്മെന്റ് ഓഫീസും തമ്മിൽ ഔദ്യോഗിക കരാർ ഒപ്പിടണം. ഇതിലൂടെ യുഎഇയിലെ ഗാർഹിക തൊഴിലാളി നിയമപ്രകാരം ലഭിക്കുന്ന എല്ലാ നിയമപരമായ പരിരക്ഷകളും അവകാശങ്ങളും തൊഴിലുടമയ്ക്ക് ഉറപ്പാക്കപ്പെടും.

അതേസമയം, നേരിട്ടുള്ള നിയമന രീതിയിൽ റിക്രൂട്ട്മെന്റ് ഏജൻസിയുടെ ഇടപെടലില്ലാതെ തൊഴിലുടമയ്ക്ക് തൊഴിലാളിയെ നിയമിക്കാം. എന്നാൽ ഇതിനായി മന്ത്രാലയം അംഗീകരിച്ച പ്രത്യേക ഉത്തരവാദിത്തപത്രത്തിൽ ഒപ്പുവെച്ച് നിയമനവുമായി ബന്ധപ്പെട്ട മുഴുവൻ ഉത്തരവാദിത്തവും തൊഴിലുടമ തന്നെ ഏറ്റെടുക്കണം. നേരിട്ടുള്ള നിയമനത്തിന് ഗാർഹിക തൊഴിലാളി നിയമപ്രകാരമുള്ള ഗ്യാരന്റികളോ മറ്റ് നിയമപരമായ ഉറപ്പുകളോ ബാധകമല്ലെന്നും, തൊഴിലാളിയുമായി ബന്ധപ്പെട്ട മുൻകാലമോ ഭാവിയിലേതോ ആയ കരാറുകളുടെ അടിസ്ഥാനത്തിൽ തൊഴിലുടമയ്ക്ക് യാതൊരു നിയമപരമായ ഗ്യാരന്റിയും ആവശ്യപ്പെടാൻ കഴിയില്ലെന്നും മന്ത്രാലയം വ്യക്തമാക്കി.

ഇതിനിടെ, റിക്രൂട്ട്മെന്റ് ഏജൻസികൾക്കെതിരായ പരിശോധനയും മേൽനോട്ടവും മന്ത്രാലയം ശക്തമാക്കിയിട്ടുണ്ട്. 2026-ലെ ആദ്യ ആറുമാസത്തിനിടെ 42 ലൈസൻസുള്ള റിക്രൂട്ട്മെന്റ് ഓഫീസുകളിൽ നടത്തിയ പരിശോധനയിൽ 135 നിയമ-ഭരണപരമായ ലംഘനങ്ങൾ കണ്ടെത്തി നടപടിയെടുത്തതായി മന്ത്രാലയം അറിയിച്ചു. ഗാർഹിക തൊഴിലാളികളെ നിയമിക്കുന്നതിന് മുമ്പ് ലഭ്യമായ നിയമപരമായ മാർഗങ്ങളും അവയുടെ ഉത്തരവാദിത്തങ്ങളും വ്യക്തമായി മനസ്സിലാക്കി മാത്രമേ തൊഴിലുടമകൾ തീരുമാനമെടുക്കാവൂ എന്നും മന്ത്രാലയം നിർദേശിച്ചു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t