യുഎഇയിൽ ജോലി ചെയ്യുന്ന ലക്ഷക്കണക്കിന് പ്രവാസികൾക്ക് നിലവിലെ വിദേശനാണ്യ വിനിമയ നിരക്കുകൾ വലിയ ആശ്വാസമായി. ഇന്ത്യൻ രൂപ, പാക്കിസ്ഥാൻ രൂപ, ഫിലിപ്പീൻ പെസോ ഉൾപ്പെടെയുള്ള ഏഷ്യൻ രാജ്യങ്ങളുടെ കറൻസികൾ ദിർഹത്തിനെതിരെ ദുർബലമായതോടെ നാട്ടിലേക്ക് പണം അയയ്ക്കുന്നവർക്ക് ഓരോ ദിർഹത്തിനും കൂടുതൽ മൂല്യം ലഭിക്കുന്ന സാഹചര്യമാണുള്ളത്.
ഇന്ത്യൻ രൂപ ദിർഹത്തിനെതിരെ സമീപകാലത്തെ ഏറ്റവും താഴ്ന്ന നിലകളിലൊന്നായ ഏകദേശം 26.08 എന്ന നിരക്കിലാണ് വ്യാപാരം നടക്കുന്നത്. ഇതോടെ യുഎഇയിൽ നിന്നുള്ള പണമിടപാടുകൾ കൂടുതൽ ലാഭകരമായതായി പ്രവാസികൾ വിലയിരുത്തുന്നു. വലിയ തുക ഒരുമിച്ച് അയയ്ക്കുന്നതിന് പകരം, ഒരു ഭാഗം ഇപ്പോൾ അയച്ച് നിരക്ക് ഇനിയും അനുകൂലമാകുമോയെന്ന് കാത്തുനോക്കി ശേഷിക്കുന്ന തുക പിന്നീട് കൈമാറുന്ന രീതിയും പലരും സ്വീകരിച്ചുതുടങ്ങി.

ഫിലിപ്പീൻ പെസോയും ദിർഹത്തിനെതിരെ ദുർബലമായ നിലയിലാണ്. നിലവിൽ ഒരു ദിർഹത്തിന് ഏകദേശം 16 മുതൽ 16.48 പെസോ വരെയാണ് വിനിമയ നിരക്ക്. ആഗോള സാമ്പത്തിക അനിശ്ചിതത്വവും രാഷ്ട്രീയ ഘടകങ്ങളും പെസോയുടെ മൂല്യം കുറയാൻ കാരണമായതായി സാമ്പത്തിക വിദഗ്ധർ വിലയിരുത്തുന്നു. യുഎസ് ഡോളറുമായി ബന്ധിപ്പിച്ചിരിക്കുന്ന യുഎഇ ദിർഹത്തിന്റെ ചലനങ്ങളും ഈ സാഹചര്യത്തെ സ്വാധീനിക്കുന്നുണ്ട്. പാക്കിസ്ഥാൻ രൂപ ഉൾപ്പെടെയുള്ള മറ്റ് ഏഷ്യൻ കറൻസികളും സമ്മർദം നേരിടുന്നതിനാൽ വിവിധ രാജ്യങ്ങളിൽ നിന്നുള്ള പ്രവാസികൾക്കും ഈ സാഹചര്യം ഗുണകരമാകുകയാണ്.

അതേസമയം, വിനിമയ നിരക്കുകൾ അന്താരാഷ്ട്ര സാമ്പത്തിക സാഹചര്യങ്ങൾക്കനുസരിച്ച് ഏത് സമയത്തും മാറാൻ സാധ്യതയുള്ളതിനാൽ പണം അയയ്ക്കുന്നതിന് മുമ്പ് ഏറ്റവും പുതിയ നിരക്കുകൾ പരിശോധിച്ച് തീരുമാനമെടുക്കണമെന്നാണ് ധനകാര്യ വിദഗ്ധരുടെ നിർദേശം. നിലവിലെ അനുകൂല സാഹചര്യം പരമാവധി പ്രയോജനപ്പെടുത്താൻ നിരവധി പ്രവാസി കുടുംബങ്ങൾ പദ്ധതികൾ തയ്യാറാക്കുകയാണ്.