ഷെൻഗൻ, യുകെ, യുഎസ് ടൂറിസ്റ്റ് വീസകൾക്കായി മാസങ്ങളോളം കാത്തിരിക്കേണ്ട സാഹചര്യം ഒഴിവാക്കി, പെട്ടെന്ന് വിദേശയാത്ര ആസൂത്രണം ചെയ്യുന്ന യുഎഇ പ്രവാസികൾക്ക് നിരവധി രാജ്യങ്ങൾ ഇപ്പോൾ എളുപ്പവഴികൾ തുറന്നിരിക്കുകയാണ്. സാധുവായ യുഎഇ റസിഡൻസ് വീസയുള്ളവർക്ക് മുൻകൂർ വീസയില്ലാതെയോ, വീസ ഓൺ അറൈവൽ സൗകര്യത്തോടെയോ പ്രവേശനം അനുവദിക്കുന്ന 18 രാജ്യങ്ങളാണ് യാത്രാപ്രേമികളുടെ ശ്രദ്ധ നേടുന്നത്.

വീസ ഫ്രീ പ്രവേശനം, വീസ ഓൺ അറൈവൽ, ലളിതമായ പ്രവേശന നടപടികൾ എന്നിവ ലഭ്യമാകുന്നതിനാൽ അവസാന നിമിഷം യാത്ര തീരുമാനിക്കുന്നവർക്കും കുടുംബസമേതം അവധിക്കാലം ആഘോഷിക്കാൻ പദ്ധതിയിടുന്നവർക്കും ഇവ മികച്ച ഓപ്ഷനുകളാണ്. വേനലവധിക്കാലത്ത് നാട്ടിലേക്കുള്ള വിമാന ടിക്കറ്റ് നിരക്ക് ഉയരുന്ന സാഹചര്യത്തിൽ, കുറഞ്ഞ ചെലവിൽ വിദേശയാത്ര ആഗ്രഹിക്കുന്ന പ്രവാസികൾക്കും ഈ രാജ്യങ്ങൾ ആകർഷകമായ ബദലായി മാറുന്നു.

യാത്രയുടെ ലക്ഷ്യത്തിനനുസരിച്ച് തിരഞ്ഞെടുക്കാം

മലനിരകളും മനോഹരമായ പ്രകൃതി കാഴ്ചകളും ചരിത്രപൈതൃകവും ആസ്വദിക്കാൻ ആഗ്രഹിക്കുന്നവർക്ക് അർമേനിയ, ജോർജിയ, ഉസ്ബെക്കിസ്ഥാൻ എന്നിവ മികച്ച തിരഞ്ഞെടുപ്പുകളാണ്. ബീച്ച് അവധിക്കാലം ആസ്വദിക്കാൻ ആഗ്രഹിക്കുന്നവർക്ക് സെയ്ഷൽസ്, മാലിദ്വീപ്, മൗറീഷ്യസ് എന്നിവ അനുയോജ്യമാണ്. സാഹസിക യാത്രകൾ ഇഷ്ടപ്പെടുന്നവർക്ക് കെനിയ, കിർഗിസ്ഥാൻ, നേപ്പാൾ എന്നിവയും, പ്രകൃതിയും ചരിത്രവും സംസ്കാരവും ഒരുമിച്ച് അനുഭവിക്കാൻ ശ്രീലങ്ക, ജോർദാൻ, ഒമാൻ എന്നിവയും പരിഗണിക്കാം.

ഇതുകൂടാതെ കുവൈത്ത്, അസർബൈജാൻ തുടങ്ങിയ രാജ്യങ്ങൾ യുഎഇ റസിഡൻസ് വീസയുള്ള പലർക്കും വീസ ഓൺ അറൈവൽ സൗകര്യം നൽകുന്നുണ്ട്. തായ്‌ലൻഡ്, ഇന്തൊനേഷ്യ, കംബോഡിയ തുടങ്ങിയ രാജ്യങ്ങളും യാത്രക്കാരുടെ പാസ്‌പോർട്ടും നിലവിലുള്ള യാത്രാനിബന്ധനകളും അനുസരിച്ച് ലളിതമായ പ്രവേശന സംവിധാനം ഒരുക്കിയിട്ടുണ്ട്.

യാത്രയ്ക്ക് മുമ്പ് നിർബന്ധമായും പരിശോധിക്കേണ്ടത്

യുഎഇ റസിഡൻസ് വീസ ഉള്ളതുകൊണ്ട് മാത്രം എല്ലാ രാജ്യങ്ങളിലേക്കും പ്രവേശനം ഉറപ്പാകില്ല. യാത്രയ്ക്ക് മുമ്പ് സ്വന്തം പാസ്‌പോർട്ടിനുള്ള വീസ നിബന്ധനകളും ലക്ഷ്യരാജ്യത്തിന്റെ ഏറ്റവും പുതിയ പ്രവേശന ചട്ടങ്ങളും ഔദ്യോഗികമായി പരിശോധിക്കണം. ചില രാജ്യങ്ങൾ ഇ-ട്രാവൽ ഓതറൈസേഷൻ (ETA), മടക്കയാത്രാ ടിക്കറ്റ്, ഹോട്ടൽ ബുക്കിങ്, മതിയായ സാമ്പത്തിക ശേഷി തെളിയിക്കുന്ന രേഖകൾ, ട്രാവൽ ഇൻഷുറൻസ് എന്നിവ ആവശ്യപ്പെടാൻ സാധ്യതയുണ്ട്. അതിനാൽ യാത്രയ്ക്ക് മുമ്പ് എല്ലാ രേഖകളും തയ്യാറാക്കി നിബന്ധനകൾ ഉറപ്പാക്കിയ ശേഷം മാത്രമേ യാത്ര തിരിക്കാവൂ.