വിദേശ കമ്പനികളിൽ റിമോട്ട് ആയി ജോലി ചെയ്യുന്ന പ്രൊഫഷണലുകൾക്ക് യുഎഇയിൽ താമസിക്കാനുള്ള അവസരം ഒരുക്കുന്ന ‘വെർച്വൽ വർക്ക് റെസിഡൻസ് വിസ’ സംബന്ധിച്ച കൂടുതൽ വിശദാംശങ്ങൾ അധികൃതർ പുറത്തുവിട്ടു. ഒരു വർഷത്തേക്ക് യുഎഇയിൽ നിയമപരമായി താമസിച്ച് സ്വന്തം വിദേശ തൊഴിലുടമയ്ക്കായി ജോലി തുടരാൻ അനുവദിക്കുന്ന സ്വയം സ്പോൺസേർഡ് റെസിഡൻസ് വിസ പദ്ധതിയാണിത്. ദുബൈയിൽ താമസിക്കാൻ ആഗ്രഹിക്കുന്നവർ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) വഴിയും, മറ്റ് എമിറേറ്റുകളിലേക്ക് അപേക്ഷിക്കുന്നവർ ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) വഴിയുമാണ് അപേക്ഷ സമർപ്പിക്കേണ്ടത്.
പ്രധാന ആനുകൂല്യങ്ങൾ
- സ്വയം സ്പോൺസർഷിപ്പ്: യുഎഇയിലെ തൊഴിലുടമയുടെയോ പ്രാദേശിക സ്പോൺസറുടെയോ ആവശ്യമില്ല.
- കുടുംബത്തെ സ്പോൺസർ ചെയ്യാം: പങ്കാളിയെയും മക്കളെയും യുഎഇയിലേക്ക് കൊണ്ടുവരാനും കുട്ടികളെ സ്കൂളുകളിൽ ചേർക്കാനും സാധിക്കും.
- എമിറേറ്റ്സ് ഐഡി ഉൾപ്പെടെ സേവനങ്ങൾ: ബാങ്ക് അക്കൗണ്ട് തുറക്കൽ, ടെലികോം സേവനങ്ങൾ, താമസസ്ഥലം വാടകയ്ക്ക് എടുക്കൽ തുടങ്ങി സാധാരണ റെസിഡന്റുകൾക്ക് ലഭിക്കുന്ന സേവനങ്ങൾ ഉപയോഗിക്കാം.
- സ്വതന്ത്ര യാത്ര: വിസയുടെ കാലാവധിക്കിടെ രാജ്യത്തിന് പുറത്തേക്ക് യാത്ര ചെയ്യാം. എന്നാൽ തുടർച്ചയായി ആറ് മാസത്തിലധികം യുഎഇയ്ക്ക് പുറത്തു താമസിക്കാൻ പാടില്ല.
ആർക്കൊക്കെ അപേക്ഷിക്കാം?
- 18 വയസോ അതിൽ കൂടുതലോ പ്രായമുള്ള ഏത് രാജ്യക്കാരനും അപേക്ഷിക്കാം.
- യുഎഇയ്ക്ക് പുറത്തുള്ള ഒരു കമ്പനിയിൽ കുറഞ്ഞത് ഒരു വർഷത്തെ തൊഴിൽ കരാറിൽ ജോലി ചെയ്യുന്നവരായിരിക്കണം.
- ജോലി റിമോട്ട് രീതിയിൽ നിർവഹിക്കാമെന്ന് തെളിയിക്കുന്ന തൊഴിലുടമയുടെ കത്തോ തൊഴിൽ കരാറോ സമർപ്പിക്കണം.
- പ്രതിമാസം കുറഞ്ഞത് 3,500 ഡോളർ (ഏകദേശം 12,856 ദിർഹം) വരുമാനം ഉണ്ടായിരിക്കണം.
ശ്രദ്ധിക്കേണ്ട കാര്യം
ഈ വിസ ഉപയോഗിച്ച് യുഎഇ ആസ്ഥാനമായ കമ്പനികളിൽ ജോലി ചെയ്യാനോ രാജ്യത്തിനകത്ത് ഫ്രീലാൻസ് സേവനങ്ങൾ നൽകാനോ അനുമതിയില്ല. വിദേശ തൊഴിലുടമയ്ക്കായി റിമോട്ട് ആയി ജോലി ചെയ്യുന്നതിനാണ് ഈ വിസ അനുവദിക്കുന്നത്.
ആവശ്യമായ രേഖകൾ
- കുറഞ്ഞത് ആറുമാസത്തെ കാലാവധിയുള്ള പാസ്പോർട്ട് (ഒരു വർഷം കാലാവധിയുള്ളത് അഭികാമ്യം)
- പാസ്പോർട്ട് സൈസ് ഫോട്ടോ
- തൊഴിൽ സ്ഥിരീകരിക്കുന്ന രേഖയും ശമ്പള സർട്ടിഫിക്കറ്റും
- ഒരു വർഷത്തേക്കുള്ള ആരോഗ്യ ഇൻഷുറൻസ്
- യുഎഇയിൽ എത്തിയ ശേഷം മെഡിക്കൽ ഫിറ്റ്നസ് പരിശോധനയും എമിറേറ്റ്സ് ഐഡി അപേക്ഷയും പൂർത്തിയാക്കണം.
എങ്ങനെ അപേക്ഷിക്കാം?
- ദുബൈ: GDRFA വെബ്സൈറ്റ് അല്ലെങ്കിൽ അംഗീകൃത Amer സേവന കേന്ദ്രങ്ങൾ വഴി.
- മറ്റ് എമിറേറ്റുകൾ: ICP Smart Services പോർട്ടൽ വഴി ഓൺലൈനായി.
അപേക്ഷ സാധാരണയായി 2 മുതൽ 5 പ്രവൃത്തി ദിവസങ്ങൾക്കകം പ്രോസസ് ചെയ്യും. വിദേശത്തുള്ള അപേക്ഷകർക്ക് ആദ്യം എൻട്രി പെർമിറ്റ് അനുവദിക്കും. ഇത് ലഭിച്ച് 60 ദിവസത്തിനകം യുഎഇയിൽ പ്രവേശിച്ച് മെഡിക്കൽ പരിശോധനയും എമിറേറ്റ്സ് ഐഡി നടപടികളും പൂർത്തിയാക്കണം.
ഫീസ്
- റെസിഡൻസ് ഫീസ് – 200 ദിർഹം
- നോളജ് & ഇന്നൊവേഷൻ ഫീസ് – 20 ദിർഹം
- രാജ്യത്തിനകത്ത് നിന്ന് അപേക്ഷിക്കുന്നവർക്ക് അധിക ഫീസ് – 500 ദിർഹം
- ഡെലിവറി ചാർജ് – 20 ദിർഹം
വിദേശ കമ്പനിയിൽ ജോലി ചെയ്യുന്നതിനൊപ്പം യുഎഇയിൽ താമസിക്കാൻ ആഗ്രഹിക്കുന്ന റിമോട്ട് പ്രൊഫഷണലുകൾക്ക്, തൊഴിൽ സ്പോൺസറില്ലാതെ നിയമപരമായി താമസിക്കാനുള്ള മികച്ച അവസരമാണ് ഈ വെർച്വൽ വർക്ക് വിസ പദ്ധതി.
