യുഎഇയിൽ താമസിക്കുന്ന പ്രവാസികൾക്ക് യൂറോപ്പിലെ മനോഹര രാജ്യമായ മോണ്ടിനെഗ്രോ സന്ദർശിക്കാൻ മികച്ച അവസരം. കുറഞ്ഞത് മൂന്ന് വർഷത്തെ കാലാവധിയുള്ള യുഎഇ റെസിഡൻസ് പെർമിറ്റ് കൈവശമുള്ള പ്രവാസികൾക്ക് ഇനി വിസയില്ലാതെ മോണ്ടിനെഗ്രോയിൽ പ്രവേശിക്കാം. മോണ്ടിനെഗ്രോ സർക്കാർ പ്രഖ്യാപിച്ച പ്രത്യേക താൽക്കാലിക ഇളവിന്റെ ഭാഗമായാണ് ഈ സൗകര്യം. ഈ ഇളവ് 2026 ഒക്ടോബർ 1 വരെ പ്രാബല്യത്തിലുണ്ടാകും.
പുതിയ സംവിധാനപ്രകാരം, അർഹരായ യുഎഇ റെസിഡന്റുകൾക്ക് വിസയില്ലാതെ മോണ്ടിനെഗ്രോയിൽ പ്രവേശിച്ച് പരമാവധി 10 ദിവസം വരെ താമസിക്കാം. വിദേശികൾക്കായുള്ള നിയമത്തിലെ വ്യവസ്ഥകൾ അനുസരിച്ചാണ് ഈ തീരുമാനം. വിനോദസഞ്ചാരം പ്രോത്സാഹിപ്പിക്കുകയും യുഎഇ-മോണ്ടിനെഗ്രോ യാത്രാ ബന്ധം കൂടുതൽ ശക്തിപ്പെടുത്തുകയും ചെയ്യുകയാണ് ലക്ഷ്യമെന്ന് അധികൃതർ അറിയിച്ചു.അതേസമയം, യാത്രയ്ക്ക് മുമ്പ് നിലവിലുള്ള ഇമിഗ്രേഷൻ ചട്ടങ്ങളും പ്രവേശന നിബന്ധനകളും ഔദ്യോഗികമായി പരിശോധിക്കണമെന്ന് അധികൃതർ നിർദേശിച്ചു. നിയമങ്ങളിൽ സമയാസമയങ്ങളിൽ മാറ്റങ്ങൾ ഉണ്ടാകാൻ സാധ്യതയുള്ളതിനാലാണിത്.
ആർക്കാണ് ഈ ആനുകൂല്യം?
- കുറഞ്ഞത് മൂന്ന് വർഷത്തെ കാലാവധിയുള്ള യുഎഇ റെസിഡൻസ് പെർമിറ്റ് ഉണ്ടായിരിക്കണം.
- പെർമിറ്റ് യാത്രാ തീയതിയിൽ സാധുവായിരിക്കണം.
പ്രധാന നിബന്ധനകൾ
- യുഎഇയിൽ നിന്ന് നേരിട്ടുള്ള വിമാന സർവീസിൽ മോണ്ടിനെഗ്രോയിലേക്ക് യാത്ര ചെയ്യണം.
- മറ്റ് രാജ്യങ്ങൾ വഴിയുള്ള കണക്ടിങ് ഫ്ലൈറ്റുകളിൽ യാത്ര ചെയ്യുന്നവർക്ക് ഈ വിസ ഇളവ് ബാധകമല്ല.
- സാധുവായ പാസ്പോർട്ടും ഹോട്ടൽ ബുക്കിങ്, മടക്കയാത്രാ ടിക്കറ്റ് തുടങ്ങിയ യാത്രാ രേഖകളും കൈവശം കരുതണം.
ദുബായിൽ നിന്ന് നേരിട്ടുള്ള സർവീസ്
ദുബായിൽ നിന്ന് മോണ്ടിനെഗ്രോയിലെ തിവാറ്റ് നഗരത്തിലേക്ക് ഫ്ലൈദുബായ് നേരിട്ടുള്ള സർവീസ് നടത്തുന്നുണ്ട്. ആഴ്ചയിൽ നാല് സർവീസുകളാണ് ഈ റൂട്ടിലുള്ളത്. യാത്രാസമയം ഏകദേശം 5 മണിക്കൂർ 55 മിനിറ്റാണ്. യൂറോപ്പ് സന്ദർശിക്കാൻ ആഗ്രഹിക്കുന്ന യുഎഇ പ്രവാസികൾക്ക്, വിസ നടപടികളില്ലാതെ മോണ്ടിനെഗ്രോ സന്ദർശിക്കാനുള്ള മികച്ച അവസരമായാണ് ഈ പുതിയ ഇളവ് വിലയിരുത്തപ്പെടുന്നത്.
