വിദേശ രാജ്യങ്ങളിലെ ഇന്ത്യൻ എംബസികളിലും കോൺസുലേറ്റുകളിലും പാസ്‌പോർട്ട്, വിസ, കോൺസുലാർ സേവനങ്ങൾ ഔട്ട്‌സോഴ്‌സ് ചെയ്യുന്നതിനുള്ള ടെൻഡർ റദ്ദാക്കിയ ഡൽഹി ഹൈക്കോടതി വിധി സുപ്രീം കോടതിയും ശരിവച്ചു. ഹൈക്കോടതി ഉത്തരവിനെതിരെ കേന്ദ്ര വിദേശകാര്യ മന്ത്രാലയം സമർപ്പിച്ച ഹരജി സുപ്രീം കോടതി തള്ളുകയായിരുന്നു. അതേസമയം, പ്രവാസികൾക്ക് പാസ്‌പോർട്ട്, വിസ, കോൺസുലാർ സേവനങ്ങൾ തടസ്സപ്പെടാതിരിക്കാനായി താൽക്കാലിക ക്രമീകരണങ്ങൾ ഏർപ്പെടുത്താൻ വിദേശകാര്യ മന്ത്രാലയത്തിന് സുപ്രീം കോടതി അനുമതി നൽകി. പുതിയ ടെൻഡർ നടപടികൾ മൂന്ന് മാസത്തിനകം പൂർത്തിയാക്കണമെന്നും കോടതി നിർദേശിച്ചു.

ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് കേസ് പരിഗണിച്ചത്. ടെൻഡർ മൂല്യനിർണയ നടപടികളിൽ ആവശ്യമായ സുതാര്യത ഉണ്ടായിരുന്നില്ലെന്ന ഡൽഹി ഹൈക്കോടതിയുടെ കണ്ടെത്തലിൽ ഇടപെടാൻ സുപ്രീം കോടതി തയ്യാറായില്ല. ബിഡുകൾ വിലയിരുത്തുന്നതിനുള്ള മാനദണ്ഡങ്ങൾ വ്യക്തതയില്ലാത്തതും പ്രായോഗികമല്ലാത്തതുമായിരുന്നുവെന്നും, ടെൻഡർ നടപടികൾ ആരംഭിച്ചതിന് ശേഷം അടിസ്ഥാന വ്യവസ്ഥകളിൽ മാറ്റം വരുത്താനാവില്ലെന്നും കോടതി നിരീക്ഷിച്ചു.

താൽക്കാലിക ക്രമീകരണങ്ങൾക്ക് അനുമതി

പൊതുജനങ്ങൾക്ക് ബുദ്ധിമുട്ട് ഉണ്ടാകാതിരിക്കാൻ സുപ്രീം കോടതി ചില ഇടക്കാല ക്രമീകരണങ്ങൾക്കും അനുമതി നൽകിയിട്ടുണ്ട്. അതനുസരിച്ച്:

-നിലവിലുള്ള സേവനദാതാക്കളുമായി താൽക്കാലികമായി കരാർ തുടരാം.
-അല്ലെങ്കിൽ, മുൻ ലേലത്തിൽ ഏറ്റവും കുറഞ്ഞ നിരക്ക് (L-1) സമർപ്പിച്ച കമ്പനികളെ താൽക്കാലികമായി സേവനത്തിനായി നിയോഗിക്കാം.
-അബുദബി, കുവൈത്ത്, സിംഗപ്പൂർ, കാൻബറ എന്നിവിടങ്ങളിലെ ഇന്ത്യൻ നയതന്ത്ര മിഷനുകളിൽ സേവനങ്ങൾ തടസ്സമില്ലാതെ തുടരാൻ ആവശ്യമായ മറ്റ് താൽക്കാലിക സംവിധാനങ്ങളും വിദേശകാര്യ മന്ത്രാലയത്തിന് ഏർപ്പെടുത്താം.

ഈ ക്രമീകരണങ്ങൾ പുതിയ ടെൻഡർ നടപടികൾ പൂർത്തിയാകുന്നതുവരെ മാത്രമായിരിക്കുമെന്നും കോടതി വ്യക്തമാക്കി.

കേസിന്റെ പശ്ചാത്തലം

വിദേശങ്ങളിലെ ഇന്ത്യൻ കോൺസുലാർ ആപ്ലിക്കേഷൻ സെന്ററുകളുടെ പ്രവർത്തനം പുതിയ കമ്പനികൾക്ക് കൈമാറാൻ വിദേശകാര്യ മന്ത്രാലയം തീരുമാനിച്ചതോടെയാണ് വിവാദം ആരംഭിച്ചത്. യുഎഇയിൽ വർഷങ്ങളായി സേവനം നൽകിയിരുന്ന BLS International, SGIVS Global എന്നീ സ്ഥാപനങ്ങൾക്ക് പുതിയ ടെൻഡറിൽ പങ്കെടുക്കാൻ അവസരം ലഭിച്ചിരുന്നില്ല. തുടർന്ന് യുഎഇയിലെ സേവനങ്ങൾ ഏറ്റെടുക്കാൻ അൽഹിന്ദ് ടൂർസ് & ട്രാവൽസ് തിരഞ്ഞെടുക്കപ്പെടുകയും ജൂലൈ 1 മുതൽ പ്രവർത്തനം ആരംഭിക്കാൻ തീരുമാനിക്കപ്പെട്ടിരുന്നെങ്കിലും, ടെൻഡർ നടപടികളിലെ സാങ്കേതിക മൂല്യനിർണയം അന്യായവും ഭരണഘടന ഉറപ്പുനൽകുന്ന സമത്വ തത്വത്തിന് വിരുദ്ധവുമാണെന്ന് ചൂണ്ടിക്കാട്ടി മറ്റ് കക്ഷികൾ ഡൽഹി ഹൈക്കോടതിയെ സമീപിച്ചു.

ഇതിനെ തുടർന്ന് ജൂലൈ 15-ന് ഡൽഹി ഹൈക്കോടതി ടെൻഡർ നടപടികൾ പൂർണമായും റദ്ദാക്കുകയും പുതിയ ടെൻഡർ ക്ഷണിക്കാൻ ഉത്തരവിടുകയും ചെയ്തു. ആ വിധിയാണ് ഇപ്പോൾ സുപ്രീം കോടതിയും ശരിവെച്ചിരിക്കുന്നത്. നിലവിലെ നിയമനടപടികളുടെ പശ്ചാത്തലത്തിൽ അബുദബിയിലെ ഇന്ത്യൻ എംബസിയിലും ദുബൈയിലെ ഇന്ത്യൻ കോൺസുലേറ്റിലും നേരിട്ടാണ് പാസ്‌പോർട്ട്, വിസ, കോൺസുലാർ അപേക്ഷകൾ സ്വീകരിച്ചുവരുന്നത്. പുതിയ ടെൻഡർ നടപടികൾ പൂർത്തിയായ ശേഷം ഔട്ട്‌സോഴ്‌സ് കേന്ദ്രങ്ങളിലൂടെ സേവനങ്ങൾ വീണ്ടും പൂർണതോതിൽ പുനരാരംഭിക്കും..യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t