Abu Dhabi Maritime Safety; അബുദാബിയിലെ ജലപാതകളുടെ സുരക്ഷ ഉറപ്പാക്കുന്നതിനും നിരീക്ഷണം ശക്തമാക്കുന്നതിനുമായി അത്യാധുനിക സംവിധാനങ്ങളോടെയുള്ള പുതിയ ‘വാട്ടർവേ മോണിറ്ററിംഗ് ആൻഡ് കൺട്രോൾ സെന്റർ’ അബുദാബിയിൽ പ്രവർത്തനമാരംഭിച്ചു. ഇന്റഗ്രേറ്റഡ് ട്രാൻസ്‌പോർട്ട് സെന്ററാണ് (അബുദാബി മൊബിലിറ്റി) ഈ പുതിയ പദ്ധതി പ്രഖ്യാപിച്ചത്. അബുദാബി മാരിടൈം, നാഷണൽ ഗാർഡ് എന്നിവയുമായി സഹകരിച്ചാണ് ഈ നൂതന സുരക്ഷാ കേന്ദ്രം സജ്ജമാക്കിയിരിക്കുന്നത്. 45,000 ചതുരശ്ര കിലോമീറ്ററിലധികം വിസ്തൃതിയുള്ള അബുദാബിയിലെ ജലാശയങ്ങളിൽ നിരീക്ഷണവും അനുബന്ധ സേവനങ്ങളും ഏകോപിപ്പിക്കുന്നതിനുള്ള പ്രധാന കേന്ദ്രമാണിത്. സ്മാർട്ട് സിസ്റ്റങ്ങളും അത്യാധുനിക സാങ്കേതികവിദ്യയും ഉപയോഗിച്ച് യാനങ്ങളുടെയും ബോട്ടുകളുടെയും നീക്കങ്ങൾ തത്സമയം നിരീക്ഷിക്കാൻ ഇതിലൂടെ സാധിക്കും. രണ്ടായിരത്തോളം നാവിഗേഷൻ എയിഡുകൾ, സെൻസറുകൾ ഘടിപ്പിച്ച സ്മാർട്ട് വിളക്കുകൾ എന്നിവയുടെ പ്രവർത്തനവും ഈ കേന്ദ്രം വഴി നിരീക്ഷിക്കും. നാൽപ്പതിലധികം സേവനങ്ങൾ ഈ കേന്ദ്രം വഴി ഡിജിറ്റലായി ലഭ്യമാക്കുന്നുണ്ട്. ഫെറികൾ, വാട്ടർ ടാക്സികൾ എന്നിവയുടെ യാത്രകൾ നിരീക്ഷിക്കുന്നതിനൊപ്പം ജലാശയങ്ങളിലെ മാലിന്യങ്ങൾ നീക്കം ചെയ്യാനും സുരക്ഷാ നിയമങ്ങൾ കൃത്യമായി പാലിക്കുന്നുണ്ടെന്ന് ഉറപ്പാക്കാനും ഈ സംവിധാനം സഹായിക്കും. ഏകദേശം 3,600 വിനോദ സഞ്ചാര യാനങ്ങളുടെയും നൂറിലധികം സ്വകാര്യ-പൊതു സൗകര്യങ്ങളുടെയും മേൽനോട്ടം ഈ കേന്ദ്രത്തിന്റെ ചുമതലയിലാണ്. കടൽയാത്രകൾ കൂടുതൽ സുരക്ഷിതമാക്കുന്നതിനും അടിയന്തര സാഹചര്യങ്ങളിൽ അതിവേഗം പ്രതികരിക്കാനും ഈ പുതിയ സംവിധാനം സഹായിക്കുമെന്ന് അധികൃതർ വ്യക്തമാക്കി. നാല് പുതിയ പട്രോൾ ബോട്ടുകൾ, 16 റഡാർ സ്റ്റേഷനുകൾ, നാനൂറിലധികം നിരീക്ഷണ ക്യാമറകൾ എന്നിവ വഴിയാണ് നിരീക്ഷണം ഏകോപിപ്പിക്കുന്നത്. സാദിയാത്ത് ഐലൻഡിലാണ് ഈ കൺട്രോൾ സെന്ററിന്റെ പ്രധാന ആസ്ഥാനം. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t