SEWA natural gas project ; അടുക്കളയിൽ ഇനി ഗ്യാസ് സിലിണ്ടർ തീരുമെന്ന പേടി വേണ്ട. പൈപ്പ് വഴി പ്രകൃതിവാതകം നേരിട്ട് വീട്ടിലെത്തുന്ന വൻകിട പദ്ധതി ഷാർജയിലെ ദിബ്ബ അൽ ഹിസ്നിൽ പൂർത്തിയായി. ഷാർജ ഇലക്ട്രിസിറ്റി, വാട്ടർ ആൻഡ് ഗ്യാസ് അതോറിറ്റി 35 മില്യൺ (3.5 കോടി) ദിർഹം ചിലവിട്ടാണ് ഈ സുപ്രധാന പദ്ധതി നടപ്പിലാക്കിയത്. ഷാർജ ഭരണാധികാരിയും സുപ്രീം കൗൺസിൽ അംഗവുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ ദീർഘവീക്ഷണത്തോടെയുള്ള നിർദ്ദേശപ്രകാരമാണ് പദ്ധതി പൂർത്തിയാക്കിയത്. അത്യാധുനിക നിലവാരത്തിൽ നിർമ്മിച്ച ഈ സംവിധാനം ദിബ്ബ അൽ ഹിസ്നിലെ ജനങ്ങൾക്ക് കൂടുതൽ സുരക്ഷിതവും ലാഭകരവുമായ ഇന്ധന ലഭ്യത ഉറപ്പാക്കുന്നു. 46 കിലോമീറ്റർ നീളത്തിലാണ് പ്രകൃതിവാതക പൈപ്പ്‌ലൈൻ ശൃംഖല സ്ഥാപിച്ചിരിക്കുന്നത്. അൽ ഹായ് അൽ ഷമാലി, അൽ ഹായ് അൽ ഗർബി, അൽ ഹിസ്ൻ ഐലൻഡ്, അൽ ദൗബ് എന്നീ നാല് പ്രധാന മേഖലകളെ ഇത് ബന്ധിപ്പിക്കുന്നു. ഏകദേശം 200 വീടുകളിൽ ഇതിനോടകം കണക്ഷനുകൾ നൽകി. ഉപഭോഗം കൃത്യമായി അളക്കാനും നിയന്ത്രിക്കാനുമായി ഓരോ വീട്ടിലും സ്മാർട്ട് മീറ്ററുകളും സ്ഥാപിച്ചിട്ടുണ്ട്. വെർച്വൽ പൈപ്പ്‌ലൈൻ സിസ്റ്റം വഴി പ്രവർത്തിക്കുന്ന പ്രത്യേക പമ്പിംഗ് സ്റ്റേഷൻ വഴി 24 മണിക്കൂറും ഗ്യാസ് വിതരണം ഉറപ്പാക്കും. സാധാരണ ഗ്യാസ് സിലിണ്ടറുകളെ അപേക്ഷിച്ച് പ്രകൃതിവാതകം കൂടുതൽ സുരക്ഷിതവും പരിസ്ഥിതി സൗഹൃദവുമാണെന്ന് സേവ നാച്ചുറൽ ഗ്യാസ് ഡിപ്പാർട്ട്‌മെന്റ് ഡയറക്ടർ എൻജിനീയർ ഇബ്രാഹിം അൽ ബൽഗൂനി പറഞ്ഞു. കാർബൺ പുറന്തള്ളൽ കുറയ്ക്കാനും കുറഞ്ഞ ചെലവിൽ ഇന്ധനം ലഭ്യമാക്കാനും പൈപ്പ്‌ലൈൻ സംവിധാനത്തിലൂടെ സാധിക്കും. ഷാർജയിലെ എല്ലാ നഗരങ്ങളിലും മേഖലകളിലും സുസ്ഥിരവും ആധുനികവുമായ ഊർജ്ജ സംവിധാനം എത്തിക്കുക എന്ന സേവയുടെ തന്ത്രപ്രധാനമായ ലക്ഷ്യത്തിന്റെ ഭാഗമായാണ് ഈ നേട്ടം. അത്യാധുനിക നിരീക്ഷണ സംവിധാനങ്ങളിലൂടെ ഗ്യാസ് വിതരണത്തിന്റെ സുരക്ഷ ഉറപ്പാക്കിയിട്ടുണ്ടെന്നും അധികൃതർ അറിയിച്ചു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t