UAE Investment Fraud; അമിത ലാഭം വാഗ്ദാനം ചെയ്യുന്ന നിക്ഷേപ തട്ടിപ്പുകൾക്കെതിരെ യുഎഇ ആഭ്യന്തര മന്ത്രാലയവും ദുബായ് പോലീസും പൊതുജനങ്ങൾക്ക് കർശനമായ മുന്നറിയിപ്പ് നൽകി. നിക്ഷേപങ്ങൾക്ക് ഉറപ്പായ ലാഭവും ചുരുങ്ങിയ കാലയളവിൽ കൂടുതൽ പണവും വാഗ്ദാനം ചെയ്ത് നിക്ഷേപകരെ വലയിലാക്കുന്ന സംഘങ്ങൾ സോഷ്യൽ മീഡിയ പ്ലാറ്റ്ഫോമുകളിൽ സജീവമാണെന്ന് അധികൃതർ ചൂണ്ടിക്കാട്ടി. തട്ടിപ്പുകളെ തിരിച്ചറിയാനുള്ള 5 പ്രധാന ലക്ഷണങ്ങൾ ചുവടെ
- ഉടൻ പണം നിക്ഷേപിച്ചില്ലെങ്കിൽ അവസരം നഷ്ടപ്പെടുമെന്ന രീതിയിൽ നിങ്ങളെ സമ്മർദ്ദത്തിലാക്കും.
- വളരെ കുറഞ്ഞ സമയത്തിനുള്ളിൽ വൻതുക ലാഭവിഹിതം വാഗ്ദാനം ചെയ്യും.
- ബിസിനസ് എങ്ങനെയാണ് പ്രവർത്തിക്കുന്നതെന്നോ ലാഭം എങ്ങനെയാണ് ലഭിക്കുന്നതെന്നോ ചോദിച്ചാൽ വ്യക്തമായ മറുപടി നൽകില്ല.
- ബാങ്ക് വിവരങ്ങൾ, ഒടിപി (OTP), മറ്റ് രഹസ്യ വിവരങ്ങൾ എന്നിവ കൈമാറാൻ ആവശ്യപ്പെടും.
- കമ്പനിയുടെ ട്രേഡ് ലൈസൻസോ നേരിട്ടുള്ള ഓഫീസോ പരിശോധിക്കാൻ സാധിക്കില്ല.
അപകടസാധ്യതകൾ
പണം നഷ്ടപ്പെടുന്നത് കൂടാതെ, നിങ്ങളുടെ വ്യക്തിഗത വിവരങ്ങൾ ചോരാനും അവ മറ്റ് കുറ്റകൃത്യങ്ങൾക്ക് ഉപയോഗിക്കപ്പെടാനും സാധ്യതയുണ്ട്. കൂടാതെ ഇത്തരം തട്ടിപ്പുകൾ നിക്ഷേപകർക്ക് വലിയ മാനസികാഘാതവും സാമ്പത്തിക തകർച്ചയും ഉണ്ടാക്കുന്നു.
സുരക്ഷിതമായിരിക്കാൻ യുഎഇ നൽകുന്ന നിർദ്ദേശങ്ങൾ
- ഏതൊരു നിക്ഷേപത്തിന് മുൻപും സ്ഥാപനത്തിന് അംഗീകൃത ലൈസൻസ് ഉണ്ടെന്ന് ഉറപ്പുവരുത്തുക.
- സാമ്പത്തിക കാര്യങ്ങളിൽ വിദഗ്ദ്ധരുമായി ആലോചിച്ച ശേഷം മാത്രം തീരുമാനമെടുക്കുക.
- ഔദ്യോഗിക ലൈസൻസുള്ള സ്ഥാപനങ്ങളുമായി മാത്രം ഇടപാടുകൾ നടത്തുക.
- ഒരിക്കലും വ്യക്തിഗത ബാങ്ക് അക്കൗണ്ടുകളിലേക്ക് പണം കൈമാറരുത്.
- വെരിഫൈഡ് അല്ലാത്ത ആപ്പുകൾ, വെബ്സൈറ്റുകൾ എന്നിവയിലൂടെ പണം നിക്ഷേപിക്കാതിരിക്കുക.
തട്ടിപ്പിന് ഇരയായെന്ന് തോന്നിയാൽ ഉടൻ തന്നെ പോലീസിനെയോ ബന്ധപ്പെട്ട അധികൃതരെയോ വിവരം അറിയിക്കണമെന്നും മന്ത്രാലയം ആവശ്യപ്പെട്ടു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
