സൈക്കിൾ, ഇ-സ്കൂട്ടർ യാത്രികരുടെ സുരക്ഷ ഉറപ്പാക്കുകയും ട്രാഫിക് നിയമങ്ങൾ കർശനമായി പാലിക്കുന്നതിന് പ്രോത്സാഹനം നൽകുകയും ചെയ്യുന്നതിനായി ദുബായ് പൊലീസ് പുതിയ ബോധവത്കരണ ക്യാംപെയ്ൻ ആരംഭിച്ചു. ‘സൈക്ലിസ്റ്റുകളുടെയും ഇ-സ്കൂട്ടർ യാത്രികരുടെയും സുരക്ഷയ്ക്കായി ഒന്നിച്ച്’ എന്ന പേരിൽ പോർട്ട്സ് പൊലീസ് സ്റ്റേഷന്റെ നേതൃത്വത്തിൽ ഡ്രൈഡോക്സ് വേൾഡിലെ ജീവനക്കാരെ ലക്ഷ്യമിട്ടാണ് പരിപാടി സംഘടിപ്പിച്ചത്. പോർട്ട്സ് പൊലീസ് സ്റ്റേഷൻ ഡയറക്ടർ ബ്രിഗേഡിയർ ഡോ. ഹസ്സൻ സുഹൈൽ അൽ സുവൈദി, ഡെപ്യൂട്ടി ഡയറക്ടർ കേണൽ അഹമ്മദ് അബ്ദുല്ല അൽ അദൈദി, റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA), ജനറൽ ഡിപ്പാർട്ട്‌മെന്റ് ഓഫ് ട്രാഫിക്, ഡ്രൈഡോക്സ് വേൾഡ് എന്നിവയുടെ പ്രതിനിധികളുടെ സാന്നിധ്യത്തിലാണ് ക്യാംപെയ്ൻ ഉദ്ഘാടനം ചെയ്തത്. സുരക്ഷിതമല്ലാത്ത യാത്രാരീതികൾ മൂലമുണ്ടാകുന്ന അപകടങ്ങൾ തടയുകയാണ് പദ്ധതിയുടെ പ്രധാന ലക്ഷ്യമെന്ന് അധികൃതർ വ്യക്തമാക്കി. നിശ്ചിതമല്ലാത്ത സ്ഥലങ്ങളിലൂടെ റോഡ് മുറിച്ചുകടക്കുന്നതും വാഹനങ്ങൾക്കിടയിലൂടെ അപകടകരമായി സഞ്ചരിക്കുന്നതും ഗുരുതര അപകടങ്ങൾക്ക് വഴിവെക്കുമെന്നും അവർ മുന്നറിയിപ്പ് നൽകി.

സൈക്കിൾ, ഇ-സ്കൂട്ടർ യാത്രികർ പ്രത്യേകം അനുവദിച്ച ട്രാക്കുകൾ മാത്രമേ ഉപയോഗിക്കാവൂ. മറ്റ് വാഹനങ്ങളിൽ നിന്നും കാൽനടയാത്രക്കാരിൽ നിന്നും ആവശ്യമായ സുരക്ഷാ അകലം പാലിക്കണമെന്നും നിർദേശമുണ്ട്. യാത്രയ്ക്കിടെ ഹെൽമറ്റ്, മുട്ടുസംരക്ഷണ കവചം (Knee Pads), രാത്രിയിൽ വ്യക്തമായി കാണാൻ സഹായിക്കുന്ന പ്രതിഫലന ജാക്കറ്റ് അല്ലെങ്കിൽ ഫ്ലൂറസെന്റ് വസ്ത്രം എന്നിവ നിർബന്ധമായും ധരിക്കണം. സൈക്കിളുകളിലും ഇ-സ്കൂട്ടറുകളിലും മുൻവശത്ത് വെള്ള നിറത്തിലുള്ള ലൈറ്റും പിന്നിൽ ചുവന്ന ലൈറ്റും പ്രവർത്തനക്ഷമമാണെന്ന് ഉറപ്പാക്കണമെന്നും അധികൃതർ അറിയിച്ചു.

വാഹനങ്ങൾക്കും കാൽനടയാത്രക്കാർക്കും തടസ്സമാകുന്ന രീതിയിൽ സൈക്കിളുകളോ ഇ-സ്കൂട്ടറുകളോ പാർക്ക് ചെയ്യരുത്. ട്രാഫിക് സിഗ്നൽ പോസ്റ്റുകളിലോ ലൈറ്റ് പോസ്റ്റുകളിലോ ഇവ ബന്ധിപ്പിക്കുന്നതും അനുവദനീയമല്ല. ഇതിനായി അനുവദിച്ചിട്ടുള്ള പാർക്കിങ് സ്ഥലങ്ങൾ മാത്രം ഉപയോഗിക്കണമെന്നും ദുബായ് പൊലീസ് നിർദേശിച്ചു. ബോധവത്കരണ ക്യാംപെയ്‌നിന്റെ ഭാഗമായി പങ്കെടുത്ത തൊഴിലാളികൾക്ക് ഹെൽമറ്റുകളും സുരക്ഷാ ജാക്കറ്റുകളും ഉൾപ്പെടെയുള്ള സുരക്ഷാ ഉപകരണങ്ങൾ ദുബായ് പൊലീസ് വിതരണം ചെയ്തു. ട്രാഫിക് സുരക്ഷാ സംസ്കാരം ശക്തിപ്പെടുത്തുകയും അപകടങ്ങൾ കുറയ്ക്കുകയും ചെയ്യുകയെന്ന ലക്ഷ്യത്തോടെയാണ് ഈ സംരംഭം നടപ്പാക്കുന്നതെന്ന് അധികൃതർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t